পঞ্জাৱত ৮ লাখ টকাৰ উৎকোচ লোৱাৰ অভিযোগত চিবিআইয়ে গ্ৰেপ্তাৰ কৰিছে এজন আৰক্ষী বিষয়াক। জানিব পৰা মতে তেওঁ ৰোপাৰ ৰেঞ্জৰ ডি আই জি পদত আছিল। কেন্দ্ৰীয় তদন্তকাৰী সংস্থাটোৱে অভিযুক্ত বিষয়াজনৰ ঘৰত তালাচী চলাই নগদ ৫ কোটি টকা, এখন বিলাসী গাড়ী, এখন বিশাল ঘড়ীকে ধৰি বহু সামগ্ৰী উদ্ধাৰ কৰিছে বুলি সংবাদ মাধ্যমৰ সূত্ৰসমূহে প্ৰকাশ কৰিছে।
সূত্ৰসমূহে দাবী কৰিছে যে ডি আই জি হৰচৰণ সিং ভুল্লাৰ ২০০৯ চনৰ বেচৰ আই পি এছ বিষয়া। কিছুদিন পূৰ্বে আকাশ বাট্টা নামৰ এজন ব্যৱসায়ীয়ে তেওঁৰ বিৰুদ্ধে আৰক্ষীত এজাহাৰ দাখিল কৰিছিল।
তেওঁ অভিযোগ কৰিছিল যে বিষয়াজনে তেওঁক ৮ লাখ টকা নিদিলে ভুৱা গোচৰত ফচাই দিয়াৰ ভাবুকি দিছিল। বৃহস্পতিবাৰে চিবিআইয়ে এই গোচৰ ৰুজু কৰে।
জানিব পৰা মতে, অভিযুক্ত বিষয়াজনৰ লগতে তেওঁৰ কৃষ্ণ নামৰ এজন সহযোগীকো গ্ৰেপ্তাৰ কৰা হৈছে। অভিযোগ উত্থাপন হৈছে যে এই ব্যক্তিজনে যিকোনো উৎকোচৰ ক্ষেত্ৰত মধ্যভোগী হিচাপে কাম কৰিছিল।
বৃহস্পতিবাৰে আৰক্ষীয়ে অভিযুক্তক ধৰিবলৈ জাল পাতিছিল। ভুল্লাৰৰ দাবী অনুসৰি টকা দিবলৈ কৃষ্ণৰ ওচৰ পালেগৈ আকাশ। টকাখিনি লোৱাৰ লগে লগে আৰক্ষী তাত উপস্থিত হৈ তেওঁক গ্ৰেপ্তাৰ কৰে।
এই ধনৰ কথা ব্যক্তিজনৰ আগত ফোনযোগে স্বীকাৰোক্তি দিয়াৰ পিছতে ভূল্লাৰকো গ্ৰেপ্তাৰ কৰা হয়। শুকুৰবাৰে আদালতত হাজিৰ কৰা হ’ব অভিযুক্ত দুজনক।
বৃহস্পতিবাৰে অভিযুক্ত আই পি এছ বিষয়াৰ সৈতে জড়িত বিভিন্ন স্থানত তালাচী চলোৱা হয়। চিবিআইৰ বিষয়াসকলে তালাচীত যি পালে থুলমূলকৈ সেয়া হ’ল – প্ৰায় ৫ কোটি নগদ ধন, ডেৰ কেজি সোণ আৰু গহনা, পঞ্জাৱৰ অস্থাৱৰ সম্পত্তিৰ নথি-পত্ৰ, মাৰ্চিডিজ আৰু অ’ডিৰ চাবি, ২২টা অতি দামী ঘড়ী, ৪০ লিটাৰ সুৰা, লকাৰৰ চাবি, আগ্নেয়াস্ত্ৰ ইত্যাদি।
