অসম আৰক্ষীৰ উপ-পৰিদৰ্শক জোনমণি ৰাভাৰ সন্দেহজনক মৃত্যুৰ গোচৰৰ তদন্তৰ বাবে গুৱাহাটীত উপস্থিত হৈছে কেন্দ্ৰীয় তদন্তকাৰী সংস্থা তথা চিবিআইৰ এটা দল।
সূত্ৰ অনুসৰি ডি আই জি লাভলী কাটিয়াৰৰ তত্বাৱধানত দিল্লীৰ পৰা চি বি আইৰ দলটো বুধবাৰে সন্ধিয়া গুৱাহাটীত উপস্থিত হয়।
উল্লেখ্য যে বুধবাৰে পুৱা কেন্দ্ৰীয় চৰকাৰে জোনমণি ৰাভাৰ মৃত্যুৰ গোচৰৰ তদন্ত চিবিআইক অৰ্পণ কৰিছিল।
কৰ্মী, ৰাজহুৱা অভিযোগ আৰু পেঞ্চন মন্ত্ৰালয়ৰ এক আদেশত কোৱা হৈছে যে “দিল্লী বিশেষ আৰক্ষী প্ৰতিষ্ঠা আইন, ১৯৪৬ (১৯৪৬ চনৰ ২৫)ৰ ধাৰা ৬ৰ সৈতে থকা ধাৰা ৫ৰ উপ-ধাৰা (১)ৰ দ্বাৰা প্ৰদান কৰা ক্ষমতা প্ৰয়োগ কৰি, কেন্দ্ৰীয় চৰকাৰে অসম ৰাজ্য চৰকাৰৰ সন্মতি সাপেক্ষে, ২০.০৫.২০২৩ তাৰিখৰ অধিসূচনা নং ইচিএফ নং ৩০২৬২১/২০ অনুসৰি গৃহ আৰু ৰাজনৈতিক বিভাগৰ দ্বাৰা চাৰিটা গোচৰৰ তদন্তৰ বাবে দিল্লী বিশেষ আৰক্ষী প্ৰতিষ্ঠানৰ সদস্যসকলৰ ক্ষমতা আৰু বিচাৰ ক্ষমতা সমগ্ৰ অসম ৰাজ্যলৈ হস্তান্তৰিত কৰা হৈছে।”
উল্লেখ্য যে জোনমণি ৰাভাৰ সন্দেহজনক মৃত্যুক লৈ বিভিন্ন ধৰণৰ কথা-বতৰা, সাক্ষী আদিয়ে আত্মপ্ৰকাশ কৰাৰ পিছতেই উচ্চ স্তৰীয় তদন্ত হোৱাৰ দাবী তুলিছিল অসমৰ সচেতন মহল আৰু ৰাভাৰ পৰিয়ালৰ লোকে। তাৰপিছতেই আজি প্ৰায় ১ মাহ পিছত এই গোচৰ চিবিআইৰ অধীনলৈ যায়।
