কেন্দ্ৰীয় মাধ্যমিক শিক্ষা ব’ৰ্ডে (CBSE) ২০২৬ চনৰ পৰা দশম শ্ৰেণীৰ ছাত্ৰ-ছাত্ৰীৰ বাবে দুবাৰকৈ ব’ৰ্ড পৰীক্ষা অনুষ্ঠিত কৰাৰ নতুন ব্যৱস্থাৰ সন্দৰ্ভত এক বিশেষ স্পষ্টীকৰণ জাৰি কৰিছে। ব’ৰ্ডৰ নিৰ্দেশনা অনুসৰি, প্ৰথমখন ব’ৰ্ড পৰীক্ষাত ছাত্ৰ-ছাত্ৰীসকল অৱতীৰ্ণ হোৱাটো এতিয়াৰে পৰা সম্পূৰ্ণ বাধ্যতামূলক হ’ব।
ব’ৰ্ডে স্পষ্ট কৰি দিছে যে যিসকল ছাত্ৰ-ছাত্ৰীয়ে প্ৰথম পৰীক্ষাত কমেও তিনিটা মূল বিষয়ত অংশগ্ৰহণ নকৰে, তেওঁলোকক “এচেন্সিয়েল ৰিপিট” (Essential Repeat) হিচাপে শ্ৰেণীভুক্ত কৰা হ’ব। এনে শিক্ষাৰ্থীসকলে একে বছৰতে অনুষ্ঠিত হ’বলগীয়া দ্বিতীয়খন ব’ৰ্ড পৰীক্ষাত অৱতীৰ্ণ হোৱাৰ সুযোগ লাভ নকৰিব। তাৰ পৰিৱৰ্তে তেওঁলোকে পিছৰ বছৰৰ ফেব্ৰুৱাৰী মাহত অনুষ্ঠিত হ’বলগীয়া মূল পৰীক্ষালৈ অপেক্ষা কৰিব লাগিব।
চি বি এছ ইৰ পৰীক্ষা নিয়ন্ত্ৰক সনয়ম ভৰদ্বাজে এই সন্দৰ্ভত কয় যে প্ৰথম ব’ৰ্ড পৰীক্ষাত সকলো ছাত্ৰ-ছাত্ৰীৰ উপস্থিতি বাধ্যতামূলক। তেওঁ উল্লেখ কৰে যে যিসকল ছাত্ৰ-ছাত্ৰী উত্তীৰ্ণ আৰু যোগ্য বুলি বিবেচিত হ‘ব, তেওঁলোকে বিজ্ঞান, গণিত, সমাজ বিজ্ঞান আৰু ভাষাৰ যিকোনো তিনিটা বিষয়ত নিজৰ নম্বৰ উন্নত কৰিবলৈ দ্বিতীয়খন পৰীক্ষাত বহিব পাৰিব।
অৱশ্যে, তেওঁ সতৰ্ক কৰি কয়, “প্ৰথম পৰীক্ষাত যদি কোনো ছাত্ৰই তিনিটা বা তাতকৈ অধিক বিষয়ত ব্যৰ্থ হয় (Fail), তেন্তে তেওঁক দ্বিতীয় পৰীক্ষাত অৱতীৰ্ণ হ’বলৈ দিয়া নহ’ব। এনে ছাত্ৰ-ছাত্ৰীক ‘এচেন্সিয়েল ৰিপিট’ শিতানত স্থান দিয়া হ’ব আৰু তেওঁলোকে পৰৱৰ্তী বছৰৰ ফেব্ৰুৱাৰীতহে পৰীক্ষাত বহিব পাৰিব।”
দশম শ্ৰেণীৰ একাংশ ছাত্ৰ-ছাত্ৰীয়ে বিশেষ কাৰণত প্ৰথম পৰীক্ষাত অনুপস্থিত থাকি কেৱল দ্বিতীয় পৰীক্ষাত অৱতীৰ্ণ হ’বলৈ অনুমতি বিচাৰি কৰা অনুৰোধৰ পিছতে চি বি এছ ই ব’ৰ্ডে এই কঠোৰ নিৰ্দেশনা জাৰি কৰিছে। ব’ৰ্ডৰ এই পদক্ষেপে পৰীক্ষাত ছাত্ৰ-ছাত্ৰীৰ গাম্ভীৰ্য আৰু নিয়মীয়া উপস্থিতি নিশ্চিত কৰিব বুলি ধাৰণা কৰা হৈছে।
