ৰাষ্ট্ৰীয় ৰাজধানী দিল্লীৰ লালকিল্লাৰ সমীপত সোমবাৰে সন্ধিয়া সংঘটিত হয় এক শক্তিশালী বিস্ফোৰণ। ১৩ জন লোক নিহত হোৱাৰ লগতে বহু কেইজন আহত হয়। বিস্ফোৰণৰ কিছু সময়ৰ পূৰ্বে তোলা চিচিটিভি ফুটেজত দেখা গৈছে যে ভিৰৰ মাজেৰে আই-২০ গাড়ী এখন চলি আছে। গাড়ীৰ ভিতৰত চালকৰ চিটত বহি থকা দেখা পোৱা ক’লা মাস্ক পৰিধান কৰা লোকজন উগ্ৰপন্থী মহম্মদ উমৰ বুলি সন্দেহ কৰা হৈছে। সন্দেহজনক গাড়ীখনৰ এই ফুটেজ বিস্ফোৰণৰ তদন্তৰ এক গুৰুত্বপূৰ্ণ যোগসূত্ৰ হিচাপে প্ৰমাণিত হ’ব পাৰে।
চিচিটিভিৰ ফুটেজত স্পষ্টকৈ দেখা গৈছে যে যেতিয়া পথটো অতি ব্যস্ত আছিল তেতিয়া এখন বগা ৰঙৰ আই-২০ গাড়ী সেই অঞ্চলৰ মাজেৰে পাৰ হৈ গৈছিল। ট্ৰেফিক জামৰ মাজেৰে গাড়ীখন চলি আছিল।
ফুটেজ অনুসৰি গাড়ী চলোৱা ব্যক্তিজনৰ মুখখন ক’লা মাস্কেৰে ঢাকি ৰখা আছিল। গাড়ীৰ সন্মুখত মাস্ক পৰিধান কৰা চিকিৎসকজন হৈছে ফৰিদাবাদ মডিউলৰ পলাতক উগ্ৰপন্থী মহম্মদ উমৰ।
যিখন হুণ্ডাই আই-২০ত এই বিস্ফোৰণ সংঘটিত হৈছিল, সেইখন প্ৰথমে মহম্মদ ছলমানৰ আছিল যদিও তেওঁ নাদীমক বিক্ৰী কৰিছিল আৰু পিছত তেওঁ ৰয়েল কাৰ জ’নৰ ফৰিদাবাদৰ এজন ইউজ্ড কাৰ ব্যৱসায়ীক বিক্ৰী কৰিছিল। পিছত তাৰিক আৰু তাৰ পিছত উমৰে কিনিছিল।
দিল্লীৰ লালকিল্লাৰ বাহিৰত সংঘটিত গাড়ী বোমা বিস্ফোৰণক সন্দেহজনক সন্ত্ৰাসবাদী আক্ৰমণ বুলি এতিয়াও তদন্ত চলি আছে। তদন্তকাৰীয়ে নিশ্চিত কৰিছে যে হুণ্ডাই আই-২০ খন বিস্ফোৰক সামগ্ৰীৰে ভৰপূৰ আছিল আৰু ইচ্ছাকৃতভাৱে ৰেড ফ’ৰ্ট মেট্ৰ’ ষ্টেচনৰ গেট ১ৰ ওচৰত বিস্ফোৰণ কৰোৱা হৈছিল।
শীৰ্ষ চোৰাংচোৱা সূত্ৰই ইণ্ডিয়া টুডেক জনোৱা মতে, এই বিস্ফোৰণত ৮ জন লোক নিহত হোৱাৰ লগতে কেইবাজনো লোক আহত হৈছে, যিসকল এল এন জে পি চিকিৎসালয়ত চিকিৎসাধীন হৈ আছে।
বিষয়াসকলে কয় যে এই আক্ৰমণ আত্মঘাতী শৈলীৰ এক অভিযান যেন লাগে। জম্মু-কাশ্মীৰৰ পুলৱামাৰ বাসিন্দা তাৰিকে গাড়ীখন ক্ৰয় কৰাৰ অভিযোগ উত্থাপন কৰি সোধা-পোছাৰ বাবে আটক কৰি ৰখা হৈছে। ফৰিদাবাদৰ এটা উগ্ৰপন্থী মডিউলৰ সৈতে তেওঁৰ সম্পৰ্কৰ তদন্ত চলাই আছে তদন্তকাৰীয়ে। তাৰিক বোমা বিস্ফোৰণৰ মাষ্টাৰমাইণ্ড বুলি অনুমান কৰা হৈছে।
প্ৰাৰম্ভিক চোৰাংচোৱাৰ প্ৰতিবেদন অনুসৰি গাড়ীখনত বিস্ফোৰক সামগ্ৰী ভৰ্তি হৈ আছিল আৰু ইয়াক ভিৰ স্থানলৈ লৈ যোৱা হৈছিল। সন্ধিয়া ৬:৫২ বজাত গাড়ীখন বিস্ফোৰণৰ ফলত কাষৰীয়া বাহনসমূহত অগ্নিকাণ্ড সংঘটিত হয়।
প্ৰত্যক্ষদৰ্শীয়ে জনায় যে এই বিস্ফোৰণ ইমানেই শক্তিশালী আছিল যে ষ্ট্ৰীট লাইট নুমাই গৈছিল আৰু জুইৰ শিখা কেইবা ফুট ওপৰলৈ উঠিছিল। বিস্ফোৰণৰ কাৰণৰ তদন্ত অব্যাহত আছে।
