গুৱাহাটীৰ গিৰিজানন্দ চৌধুৰী বিশ্ববিদ্যালয়ৰ স্কুল অৱ ফাৰ্মাচিউটিকেল ছায়েন্সেছে ২০২৫ চনৰ ২২ নৱেম্বৰত “Pharmacists as Advocates of Vaccination” শীৰ্ষক বিষয়বস্তুৰে ৰাষ্ট্ৰীয় ফাৰ্মাচী সপ্তাহ উদযাপন কৰে। এই উপলক্ষে বিশ্ববিদ্যালয়ৰ এনএছএছ গোট-১ৰ সহযোগত “প্ৰকৃতিৰ ফাৰ্মাচী সংৰক্ষণ: ঔষধি আৰু বিপন্ন উদ্ভিদৰ ওপৰত এক কৰ্মশালা” শীৰ্ষক দিনজোৰা এখন কৰ্মশালা আয়োজন কৰা হয়। এই কৰ্মশালাৰ মূল লক্ষ্য আছিল ঔষধি উদ্ভিদৰ চিকিৎসা গুণাগুণ আৰু বিপন্ন প্ৰজাতিসমূহৰ সংৰক্ষণৰ প্ৰয়োজনীয়তা সম্পৰ্কে জনসজাগতা সৃষ্টি কৰা।
বিশিষ্ট ব্যক্তি সকলৰ উপস্থিতিত এক উদ্বোধনী অনুষ্ঠানেৰে এই উদযাপন কাৰ্যসূচীৰ আৰম্ভণি হয়। শ্ৰীমন্ত শংকৰ একাডেমিৰ সভাপতি যশোদা ৰঞ্জন দাসে আদৰণি ভাষণ প্ৰদান কৰে। ইয়াৰ পিছতে বিশ্ববিদ্যালয়ৰ আচাৰ্য জয়ন্ত ডেকাই এক সাৰুৱা ভাষণ আগবঢ়ায়, য’ত তেখেতে আধুনিক ফাৰ্মাচিউটিকেল শিক্ষাৰ সৈতে পৰম্পৰাগত ঔষধি জ্ঞানৰ সংমিশ্ৰণৰ গুৰুত্বৰ ওপৰত আলোকপাত কৰে।
বিশেষজ্ঞৰ আলোচনা চক্ৰত গুৱাহাটী চিকিৎসা মহাবিদ্যালয় হস্পিটেলৰ ইনষ্টিটিউট অৱ ফাৰ্মাচীৰ ড০ বৰ্ণালী দত্ত আৰু গিৰিজানন্দ চৌধুৰী বিশ্ববিদ্যালয়ৰ উদ্ভিদ বিজ্ঞান বিভাগৰ ড০ বিৰিণা ভূঞাকে ধৰি কেইবাগৰাকীও বিশিষ্ট বক্তাই অংশগ্ৰহণ কৰে। উভয় বিশেষজ্ঞই ঔষধি উদ্ভিদৰ বৈজ্ঞানিক প্ৰাসংগিকতা, ইয়াৰ সংৰক্ষণৰ প্ৰত্যাহ্বান আৰু ভাৰতৰ বিশাল ফাইটোফাৰ্মাচিউটিকেল ঐতিহ্যক সুৰক্ষিত কৰাত যুৱ ফাৰ্মাচিষ্টসকলৰ ভূমিকাৰ ওপৰত গুৰুত্ব আৰোপ কৰে। উদ্বোধনী অনুষ্ঠানটো শলাগৰ শৰাইৰে সমাপ্ত হয়।
উদযাপনৰ অংশ হিচাপে, ঋতুভিত্তিক ঔষধি উদ্ভিদৰ এক প্ৰদৰ্শনীৰ আয়োজন কৰা হয় যিয়ে ছাত্ৰ-ছাত্ৰী আৰু অধ্যাপকসকলৰ মাজত ব্যাপক আগ্ৰহৰ সৃষ্টি কৰে। প্ৰদৰ্শনীখনত স্থানীয়ভাৱে উপলব্ধ বিভিন্ন প্ৰজাতিৰ উদ্ভিদ আৰু সেইবোৰৰ নথিবদ্ধ ঔষধি গুণাগুণ প্ৰদৰ্শন কৰা হয়।
এনএছএছ গোট-১ৰ ছাত্ৰ-ছাত্ৰী আৰু স্বেচ্ছাসেৱকসকলে গিৰিজানন্দ চৌধুৰী বিশ্ববিদ্যালয় চৌহদত বৃক্ষৰোপণ কাৰ্যসূচীৰ নেতৃত্ব দিয়ে। ইয়াৰ জৰিয়তে বিশ্ববিদ্যালয়ৰ “গ’ গ্ৰীণ” পদক্ষেপৰ আধাৰত পৰিৱেশৰ বহনক্ষমতাৰ প্ৰতি থকা প্ৰতিশ্ৰুতি পুনৰ ব্যক্ত কৰা হয়।
পৰৱৰ্তী সময়ত অংশগ্ৰহণকাৰীসকলে গিৰিজানন্দ চৌধুৰী বিশ্ববিদ্যালয়ৰ ঔষধি উদ্ভিদ উদ্যান পৰিদৰ্শন কৰে, য’ত তেওঁলোকক চিকিৎসাগতভাৱে গুৰুত্বপূৰ্ণ বিভিন্ন প্ৰজাতিৰ উদ্ভিদৰ সৈতে পৰিচয় কৰাই দিয়া হয়। অনুষ্ঠানৰ সামৰণিত SAIF আৰু DST-FIST গৱেষণা কেন্দ্ৰৰ এক নিৰ্দেশিত ভ্ৰমণ কৰা হয়। ইয়াৰ জৰিয়তে ছাত্ৰ-ছাত্ৰীসকলে ঔষধ আৱিষ্কাৰ আৰু ফাইটোকেমিকেল অধ্যয়নত ব্যৱহৃত উন্নত বিশ্লেষণাত্মক আৰু গৱেষণা যন্ত্ৰপাতিৰ বিষয়ে জ্ঞান আহৰণৰ সুযোগ লাভ কৰে। অনুষ্ঠানৰ আহ্বায়ক ড০ অনুপম শৰ্মাই শেষত শলাগৰ শৰাই আগবঢ়ায়।
