আৰ্থিক সাহায্যৰ পাছতো সমস্যা আঁতৰা নাই চৰকাৰৰ। এইবাৰ ৰিজাৰ্ভ বেংকৰ পৰা লভ্যাংশৰ ভাগ বিচাৰিব পাৰে কেন্দ্ৰই। ৰাষ্ট্ৰীয় সংবাদ মাধ্যম ‘Times Now’ য়ে এই দাবী কৰিছে।
সংবাদ মাধ্যমটোৱে দাবী কৰিছে যে চলিত বিত্তীয় বৰ্ষৰ শেষৰ পিনে দেশৰ অৰ্থনীতিক উদ্ধাৰৰ বাবে কেন্দ্ৰ ৰিজাৰ্ভ বেংকৰ দ্বাৰস্থ হ’ব পাৰে।
শীৰ্ষ বেংক সংস্থাটোৰ লভ্যাংশৰ পৰা প্ৰায় ৩০ হাজাৰ কোটি টকা বিচাৰিব পাৰে কেন্দ্ৰই।
চৰকাৰৰ এগৰাকী শীৰ্ষ আমোলাই উক্ত সংবাদ সংস্থাটোক জানিবলৈ দিছে,’’প্ৰয়োজন হ’লে চৰকাৰে ৰিজাৰ্ভ বেংকক ইয়াৰ লভ্যাংশৰ পৰা ২৫ৰ পৰা ৩০ হাজাৰ কোটি টকা সাহায্য বিচাৰিব পাৰে। জানুৱাৰিৰ পাছতে এই বিষয়ে হিচাপ কৰা হ’ব।‘’
জানিব পৰা মতে, পূৰ্ব নিৰ্দ্ধাৰিত ৰাজহ ঘাটিৰ লক্ষ্য পূৰণৰ বাবেই পুনৰ আৰ বি আইৰ দ্বাৰস্থ হ’ব পাৰে কেন্দ্ৰ।
আনহাতে, আৰ্থিক মন্দাৱস্থাৰ মাজতে চলিত বছৰত লক্ষ্যৰ তুলনাত ডিএছটি বহু কম পৰিমানে আহৰণ হৈছে। তদুপৰি, অৰ্থনীতিৰ এই দুৰ্দশা চম্ভালিবলৈ বজাৰ নগদ ধনৰ যোগানৰ প্ৰয়োজন।
পৰিসংখ্যা মতে, আৰ্থিক বৃদ্ধিৰ হাৰ ৬ বছৰৰ ভিতৰত সৰ্বনিম্ন। এই হাৰ বৰ্তমান ৫ শতাংশ। ৰিজাৰ্ভ বেংকে জনাইছে যে জিডিপিৰ পূৰ্বাভাস নহালৈকে আৰ্থিক অৱস্থাক লৈ কোনো পদক্ষেপ গ্ৰহণ কৰিব পৰা নাযাব।
উল্লেখযোগ্য যে কিছুদিন পূৰ্বে ৰিজাৰ্ভ বেংক অফ ইণ্ডিয়াৰ জমা টকাৰ পৰা এক বৃহৎ অংশ কেন্দ্ৰক প্ৰদান কৰা হৈছিল। কেন্দ্ৰ আৰু আৰ বি আইৰ দীঘলীয়া আলোচনাৰ পাছত মুঠ ১ লাখ ৭৬ হাজাৰ কোটি টকা কেন্দ্ৰক সাহায্য হিচাপে দিয়াৰ সিদ্ধান্ত লৈছিল শীৰ্ষ বেংকটোৱে।
