উজনি অসমৰ মাৰ্ঘেৰিটাৰ অন্যতম লাভজনক ৰাজহুৱা খণ্ডৰ প্ৰতিষ্ঠান উত্তৰ-পূব কয়লা ক্ষেত্ৰৰ পৰা কৰ্মচাৰী সকলক দেশৰ অন্য প্ৰান্তৰ কয়লা উদ্যোগলৈ বদলিৰ বাবে আবেদনৰ নিৰ্দেশক কেন্দ্ৰ কৰি প্ৰতিষ্ঠানটোৰ ভৱিষ্যতকলৈ অনিশ্চয়তা সৃষ্টি হৈ থকাৰ সময়তে দুদিনীয়া ভ্ৰমণসূচীৰে মাৰ্ঘেৰিটা আৰু অৰুণাচল প্ৰদেশৰ জয়ৰামপুৰলৈ অহা ভাৰত চৰকাৰৰ কেন্দ্ৰীয় কয়লা মন্ত্ৰী প্ৰহ্লাদ যোশীয়ে শ্ৰমিকসকলৰ ভবিষ্যকলৈ চলি থকা অনিশ্চয়তাৰ কথা অস্বীকাৰ কৰিছে ।
কেন্দ্ৰীয় মন্ত্ৰীগৰাকীয়ে উত্তৰ-পূব কয়লা ক্ষেত্ৰ বন্ধৰ কোনোধৰণৰ পৰিকল্পনা নাই বুলি স্পষ্ট কৰি দি তাৰ সলনি ইয়াক অধিক উৎপাদনক্ষম কৰি তোলাৰ পৰিকল্পনাৰ বিষয়ে সদৰী কৰে।
যোশীয়ে দুটা নতুন কয়লা প্ৰকল্প স্থাপনৰ ক্ষেত্ৰত সুদীৰ্ঘ বছৰৰ পৰা হৈ থকা স্থিতাৱস্থা দূৰীকৰণৰ বাবে কেন্দ্ৰীয় বন মন্ত্ৰী প্ৰকাশ জাভেদকাৰৰ সৈতে আলোচনা কৰিব বুলিও আশ্বাস দিয়ে।
উত্তৰ-পূব কয়লা ক্ষেত্ৰৰ কয়লা উৎপাদন এক হাজাৰ মিলিয়ন ট্ৰনলৈ বৃদ্ধি কৰাৰ সিদ্ধান্ত গ্ৰহন কৰা হৈছে বুলি কেন্দ্ৰীয় মন্ত্ৰীগৰাকীয়ে কয় ।
যোশীয়ে দেশৰ প্ৰধান মন্ত্ৰীয়ে প্ৰতিজন কেন্দ্ৰীয় মন্ত্ৰীকে বছৰেকত এবাৰ হলেও উত্তৰ-পূব ভ্ৰমণ কৰি ইয়াৰ আন্তঃগাঠনি আৰু অৰ্থনৈতিক বিকাশৰ বাবে ব্যৱস্থা লবলৈ পৰামৰ্শ দিয়াৰ কথা সাংবাদিকক জানিবলৈ দিয়ে।
স্থানীয় ক্ষুদ্ৰ উদ্যোগ সমূহে ৫ মাহে কয়লা ক্ৰয়ৰ পৰা বঞ্চিত হোৱাৰ সমস্যা অতিশীঘ্ৰে দূৰ কৰিবলৈ স্থানীয় বিধায়ক আৰু মুখ্যমন্ত্ৰীৰ সৈতেও তেওঁ আলোচনাত মিলিত হ’ব বুলি জনায়।
জয়ৰামপুৰ আৰু মাৰ্ঘেৰিটা মহকুমাৰ লিডুৰ টিয়ক কলিয়ৰীত অনুষ্ঠিত দুটা অনুষ্ঠানত অংশগ্ৰহণ কৰি কেন্দ্ৰীয় মন্ত্ৰী গৰাকীয়ে কেইবাটাও জনকল্যাণমূলক আঁচনিৰ কথা ঘোষণা কৰে।
অৰুণাচলৰ জয়ৰামপুৰত উপস্থিত হৈ যোশীয়ে নামপুং বিধান সভা সমষ্টিৰ বাবে কেইবাটাও গুৰুত্বপূৰ্ণ ঘোষণা কৰাৰ লগতে মাৰ্ঘেৰিটা সমষ্টিবাসীৰ বাবে ক’ল ইণ্ডিয়া লিমিটেডৰ চি এছ আৰ পুঁজিৰ পৰা এখন ৰাষ্ট্ৰীয় পৰ্যায়ৰ অত্যাধুনিক সুবিধা বিশিষ্ট ষ্টেডিয়াম, মাৰ্ঘেৰিটাৰ কয়লা ভিত্তিক ক্ষুদ্ৰ উদ্যোগ সমূহৰ বাবে ৰেহাই ভিত্তিত কয়লা যোগান, ক’ল ইণ্ডিয়া পৰিচালিত চিকিৎসালয়খনত অত্যাধুনিক সা-সুবিধা প্ৰদানকে ধৰি সামগ্ৰিক উন্নয়নৰ সন্দৰ্ভত কেইবাটাও গুৰুত্বপূৰ্ণ ঘোষণা কৰে৷
তেওঁ কয়লা খনিৰ কাষৰীয়া পাহাৰীয়া অঞ্চলৰ ৰাইজে বহুদূৰ বাটকুৰি বাই গৈ পাহাৰৰ জুৰিৰ পৰা পানী সংগ্ৰহ কৰি আনিব লগা হোৱাটো দুৰ্ভাগ্যজনক বুলি উল্লেখ কৰি অসন্তুষ্টি প্ৰকাশ কৰাৰ লগতে বাট-পথৰ সুচল ব্যৱস্তা নথকাটো দুৰ্ভাগ্যজনক বুলি কয়।
কেন্দ্ৰীয় মন্ত্ৰীগৰাকীয়ে টিককত এটি পানীৰ প্ৰকল্পৰ বাবে ৩৫ লাখ টকা অনুমোদন জনাইছে বুলি জানিবলৈ দিয়ে। কেন্দ্ৰীয় খাদ্য সংশাধন উদ্যোগ মন্ত্ৰী আৰু স্থানীয় সাংসদ ৰামেশ্বৰ তেলী, মাৰ্ঘেৰিটাৰ বিধায়ক ভাস্কৰ শৰ্মা আৰু চুবুৰীয়া অৰুণাচলৰ নামপুং সমষ্টিৰ বিধায়ক লাইচাম চিমাই কেন্দ্ৰীয় মন্ত্ৰী গৰাকীৰ ভ্ৰমণসূচীৰ সময়ত সংগ দিয়ে৷
সাংবাদিকে সোধা প্ৰশ্নৰ উত্তৰত তেও মাৰ্ঘেৰিটাত কয়লা চিণ্ডিকেট চলি থকাৰ সন্দৰ্ভত অৱগত নহয় বুলি উল্লেখ কৰি কয়লা ব্লকৰ ক্ষেত্ৰত চৰকাৰ দ্বায়বদ্ধ বুলি কয় ।
নগাঁৱৰ সাংসদ প্ৰদ্যুত বৰদলৈয়ে কয়লা চিণ্ডিকেট চলি থকা বুলি কৰা অভিযোগৰ সন্দৰ্ভত সাংবাদিকে সোধা প্ৰশ্নৰ উত্তৰত কেন্দ্ৰীয় মন্ত্ৰী গৰাকীয়ে কয় যে – তেওঁ কেইবাবাৰো মাৰ্ঘেৰিটাৰ বিধায়ক আৰু মন্ত্ৰী আছিল গতিকে তেওঁৰ ওচৰত নিশ্চয় তথ্য আছে , সেই তথ্য তেওঁ দাখিল কৰক নিশ্চিত ভাৱে ৰাজ্য চৰকাৰে ব্যৱস্থা ল’ব ।
আনহাতে, ক’ল ইণ্ডিয়াই ১০০ শতাংশ বিদেশী বিনিয়োগৰ (FDI ) পৰা মুক্ত হৈ থাকিব বুলি মত প্ৰকাশ কৰে।
কেন্দ্ৰীয় মন্ত্ৰী গৰাকীৰ ভ্ৰমণৰ সময়ত কয়লা শ্ৰমিক সংগঠন সমূহৰ লগতে বিভিন্ন দল সংগঠনে সম্বৰ্ধনা জনায়।
