জনবিৰোধী শ্ৰমিক বিৰোধী কেন্দ্ৰীয় চৰকাৰ হুছিয়াৰ, নতুন পেঞ্চন নীতি তৎকালে বাতিল কৰক, ভাৰতীয় ৰে’ল শিল্পক ব্যক্তিগত কৰণ নীতি শীঘ্ৰে প্ৰত্যাহাৰ কৰক আদি শ্লোগানেৰে উত্তাল কৰে ৰে’ল নগৰী লামডিঙৰ ৰাজ পথ।
ৰে’ল শ্ৰমিক সকলৰ মুখে মুখে কেৱল প্ৰধান মন্ত্ৰী নৰেন্দ্ৰ মোদী নেতৃত্বাধীন বিজেপি চৰকাৰৰ হঠকাৰী নীতি সমূহক লৈ সৰৱ চৰ্চাৰে কালিৰ পৰা তিনিদিনীয়া বিস্তৃত কাৰ্যসূচীৰে ৰে’ল শ্ৰমিক সকলৰ একমাত্ৰ শক্তিশালী সংগঠন এন এফ ৰে’লৱে মজদুৰ ইউনিয়নৰ কেন্দ্ৰীয় কাৰ্যনিৰ্বাহক সভা সূচনা কৰে পুৱা কেন্দ্ৰীয় সভাপতি দিলীপ চক্ৰৱৰ্তীয়ে পতাকা উত্তোলন কৰি।
ইয়াৰ পিছতে শ্বহীদ তৰ্পণ কৰে বিশিষ্ট ৰে’ল শ্ৰমিক নেতা সুভাষ সিঙে। কাৰ্যসূচী অনুসৰি পুৱা ১১ বজাৰ পৰা এন এফ ৰে’লৱে কাটিহাৰ আলিপুৰ দুৱাৰ ৰঙিয়া তিনিচুকীয়া আৰু লামডিঙৰ ৫৩ টা শাখাৰ পৰা অহা প্ৰতিনিধি সকলে এক বিশাল শোভাযাত্ৰা উলিয়াই ৰে’ল নগৰী লামডিঙত।
কাৰ্যনিৰ্বাহক সভাত অংশগ্ৰহন কৰিবলৈ লামডিঙত উপস্থিত হয় কেন্দ্ৰীয় সহকাৰী সাধাৰণ সম্পাদক পুলক গগৈ। লামডিং ৰে’লৱে কলনীস্থিত চিলড্ৰেন পাৰ্কত মুকলি সভা অনুষ্ঠিত হয়।
কেন্দ্ৰীয় সভাপতি দিলীপ চক্ৰৱৰ্তীয়ে সভাপতিত্ব কৰা সভাত অল ইণ্ডিয়া ৰেলৱেমেনচ ফেডাৰেচনৰ সহকাৰী সাধাৰণ সম্পাদক তথা ওৱেষ্ট চেন্ট্ৰেল ৰে’লৱে এমপ্লইজ ইউনিয়নৰ সাধাৰণ সম্পাদক মুকেশ গালাভ অল ইণ্ডিয়া ৰেলৱেমেনচ ফেডাৰেচনৰ ক্ষেত্ৰিয় সম্পাদক পীযূষ চক্ৰৱৰ্তী এন এফ ৰে’লৱে মজদুৰ ইউনিয়নৰ সাধাৰণ সম্পাদক আশীস বিশ্বাস আৰু আন আন কেন্দ্ৰীয় নেতা সকলৰ সমাবেশ ঘটে কাৰ্যনিৰ্বাহক সভাত।
মুখ্য অতিথি ৰূপে যোগদান কৰি অল ইণ্ডিয়া ৰেলৱেমেনচ ফেডাৰেচনৰ সহকাৰী সাধাৰণ সম্পাদক মুকেশ গালাভে কেন্দ্ৰীয় চৰকাৰে ইটোৰ পিচত সিটো জন বিৰোধী শ্ৰমিক বিৰোধী নীতি গ্ৰহণ কৰি ভাৰতীয় সভ্যতা সংস্কৃতি আৰু অৰ্থনীতিৰ ৰূপৰেখা স্বৰূপ ৰে’ল শীল্পটো ৰক্ষা কৰিবলৈ ধাৰাবাহিক আন্দোলন কৰি যাবলৈ আহ্বান জনায়।
লগতে এন এফ ৰে’লৱে মজদুৰ ইউনিয়নৰ কেন্দ্ৰীয় সাধাৰণ সম্পাদক আশীস বিশ্বাস ক্ষেত্ৰিয় সম্পাদক পীযূষ চক্ৰৱৰ্তী আদি নেতা সকলেও ভাষণ প্ৰদান কৰে। মুকলি সভাত এন এফ ৰে’লৱেৰ মহাপ্ৰৱন্ধক চেতন শ্ৰীবাস্তৱ উপস্থিত থাকে বিশিষ্ট অতিথি ৰূপে।
লামডিং শাখাৰ আতিথ্যত অনুষ্ঠিত হোৱা কাৰ্যনিৰ্বাহক সভাত সন্ধিয়ালৈ বৰ্ণাঢ্য সাংস্কৃতিক অনুষ্ঠান অনুষ্ঠিত কৰা হয়। কাৰ্যসূচী অনুসৰি আজি পুৱা ১০ বজাৰ পৰা মূল কাৰ্যনিৰ্বাহক সভা অনুষ্ঠিত হৈছে বুলি ৰে’ল শ্ৰমিক নেতা পুলক গগৈয়ে সদৰি কৰিছে।
