ভাৰতে ভূটানলৈ ই–২০ পেট্ৰ‘ল যোগান ধৰাৰ এক প্ৰস্তাৱ ভূটানে নাকচ কৰিছে বুলি শেহতীয়াকৈ প্ৰকাশ পোৱা খবৰক কেন্দ্ৰীয় পেট্ৰ‘লিয়াম আৰু প্ৰাকৃতিক গেছ মন্ত্ৰালয়ে নস্যাৎ কৰিছে। মন্ত্ৰালয়ৰ ফালৰ পৰা স্পষ্ট কৰি দিয়া হৈছে যে ভাৰতৰ তেল বিপণন কোম্পানীসমূহে ভূটানলৈ তেনে কোনো প্ৰস্তাৱ আগবঢ়োৱা নাই। লগতে ভূটানলৈ ই–২০ পেট্ৰ‘ল ৰপ্তানি কৰাৰ কোনো আনুষ্ঠানিক সিদ্ধান্ত এতিয়ালৈকে লোৱা হোৱা নাই বুলিও চৰকাৰে জানিবলৈ দিছে। চৰকাৰে এক প্ৰেছ বিবৃতিযোগে জনসাধাৰণক কেৱল মন্ত্ৰালয় আৰু তেল কোম্পানীসমূহৰ চৰকাৰী তথ্যৰ ওপৰতহে বিশ্বাস কৰিবলৈ আহ্বান জনাইছে।
ইয়াৰ কেইদিনমান পূৰ্বে দ্য ভূটানীজ নামৰ এখন সংবাদ পত্ৰত প্ৰকাশ পাইছিল যে ভূটান চৰকাৰে ভাৰতক পৰম্পৰাগত পেট্ৰ‘লৰ যোগান অব্যাহত ৰাখিবলৈ অনুৰোধ জনাইছিল। সংবাদ পত্ৰখনৰ মতে, ভূটানৰ পুৰণি আৰু অপৰ্যাপ্ত ইন্ধন মজুতকৰণ ব্যৱস্থা ইথানল মিহলোৱা পেট্ৰ‘ল ৰখাৰ বাবে উপযোগী নহয়। লগতে ভূটানৰ পাহাৰীয়া ৰাস্তাত বাহনবোৰক অধিক শক্তিৰ প্ৰয়োজন হয়, আৰু ই–২০ পেট্ৰ‘লে তেনে থিয় ৰাস্তাত সঠিকভাৱে কাম নকৰিব পাৰে বুলিও তাত উদ্বেগ প্ৰকাশ কৰা হৈছিল।
ভূটান চৰকাৰৰ এগৰাকী বিষয়াই সংবাদ পত্ৰখনক জনোৱা মতে, তেওঁলোকৰ মাটিৰ তলত থকা ইন্ধনৰ টেংকীবোৰৰ অৱস্থা বৰ্তমান ভাল নহয়। সেয়েহে ইথানল মিহলোৱা ইন্ধন মজুত কৰিলে পানী সোমাই ইন্ধনৰ গুণাগুণ নষ্ট হোৱাৰ আশংকা বহুত বেছি থাকে। উল্লেখযোগ্য যে, ভূটানে ভাৰতৰ পৰা উচ্চ মানদণ্ডৰ পেট্ৰ‘ল আৰু ডিজেল আমদানি কৰে, যিটো ভাৰতৰ সাধাৰণ বজাৰত বিক্ৰী হোৱা ইন্ধনতকৈ বেছি দামৰ।
ভূটানৰ এই খবৰ এনে এক সময়ত ওলাইছে যেতিয়া ভাৰতত ই–২০ পেট্ৰ‘লৰ ব্যৱহাৰক লৈ ব্যাপক চৰ্চা আৰু প্ৰতিবাদ চলি আছে। ভাৰতত ২০ শতাংশ ইথানল আৰু ৮০ শতাংশ পেট্ৰ‘ল মিহলাই প্ৰস্তুত কৰা এই ই–২০ পেট্ৰ‘লৰ ব্যৱহাৰ আৰম্ভ হোৱাৰ পাছত বিশেষকৈ ২০২৩ চনৰ আগৰ পুৰণি বাহনৰ গৰাকীসকলে যথেষ্ট সমালোচনা কৰিছে। বহুলোকে অভিযোগ কৰিছে যে ইয়াৰ ফলত ইন্ধনৰ মাইলেজ বা সক্ষমতা হ্ৰাস পাইছে, মেৰামতিৰ খৰচ বাঢ়িছে আৰু ইঞ্জিনৰ ক্ষতি হৈছে। অৱশ্যে চৰকাৰে মানি লৈছে যে ই–২০ পেট্ৰ‘লৰ বাবে ইন্ধনৰ মাইলেজ সামান্য কমিব পাৰে, কিন্তু ই বাহনৰ গতি আৰু ইঞ্জিনৰ সামগ্ৰিক কাৰ্যক্ষমতা উন্নত কৰে বুলি চৰকাৰে দৃঢ়তাৰে প্ৰকাশ কৰিছে।
