কেন্দ্ৰীয় চৰকাৰৰ কৰ্মচাৰী আৰু শ্ৰমিক সংঘই (কনফেডাৰেশ্যন অফ চেন্ট্ৰেল গৱৰ্ণমেন্ট এমপ্লয়িজ এণ্ড ওৱৰ্কাৰ্ছ) ১২ ফেব্ৰুৱাৰীত এদিনীয়া দেশজোৰা ধৰ্মঘটৰ আহ্বান জনাইছে।
কেবিনেট সচিবলৈ লিখা এখন পত্ৰত চিচিজিইডব্লিউৱে স্পষ্ট কৰি দিছে যে যদিহে ইয়াৰ মূল দাবী, যেনে অষ্টম দৰমহা আয়োগ গঠনৰ চৰ্তাৱলী উন্নত কৰা আৰু পুৰণি পেঞ্চন আঁচনি (অ’পিএছ) পুনৰ বাহাল কৰা আদি দাবীসমূহ পূৰণ নহয় তেন্তে সমগ্ৰ দেশতে কাম বন্ধ কৰা হ’ব। ২০ শতাংশ অন্তৱৰ্তীকালীন সকাহ আৰু ১৮ মাহৰ বাকী থকা মৰগীয়া বানচক লৈ জীৱনপণ সংগ্ৰামত নামিছে কেন্দ্ৰীয় চৰকাৰৰ কৰ্মচাৰীসকল।
চিচিজিইডব্লিউৰ আটাইতকৈ গুৰুত্বপূৰ্ণ দাবী অষ্টম দৰমহা আয়োগৰ কাৰ্য পৰিধিৰ (টাৰ্মছ অৱ ৰেফাৰেন্স) ওপৰত। স্বচ্ছ দৰমহা বৃদ্ধি নিশ্চিত কৰিবলৈ কৰ্মচাৰী পক্ষৰ (এন চি-জে চি এম) পৰামৰ্শসমূহ আয়োগৰ টাৰ্মছ অৱ ৰেফাৰেন্সত স্পষ্টভাৱে অন্তৰ্ভুক্ত কৰিব লাগে বুলি জোৰ দিছে কৰ্মচাৰীসকলে।
দৰমহা আয়োগৰ পৰামৰ্শ সম্পূৰ্ণৰূপে কাৰ্যকৰী নোহোৱালৈকে চলিত বৰ্ষৰ ১ জানুৱাৰীৰ পৰা কাৰ্যকৰী হোৱাকৈ সকলো কৰ্মচাৰী আৰু পেঞ্চনাৰক ২০ শতাংশ অন্তৱৰ্তীকালীন সকাহ প্ৰদান কৰিবলৈ সংগঠনটোৱে তীব্ৰ দাবী জনাইছে।
ইয়াৰ উপৰিও আন এটা ডাঙৰ দাবী হ’ল ডিয়াৰনেছ এলাৱেন্সৰ ৫০ শতাংশ (ডি এ/ডি আৰ) মূল দৰমহা আৰু পেঞ্চনৰ সৈতে তাৎক্ষণিকভাৱে একত্ৰিত কৰা। মন কৰিবলগীয়া যে ২০২৫ চনৰ নৱেম্বৰ মাহত অষ্টম দৰমহা আয়োগ গঠন কৰা হৈছিল আৰু আয়োগক প্ৰতিবেদন দাখিল কৰিবলৈ ১৮ মাহৰ সময় দিয়া হৈছে যদিও কৰ্মচাৰীসকলে আৰু অপেক্ষা কৰিবলৈ ইচ্ছুক নহয়।
এই ধৰ্মঘটৰ আটাইতকৈ স্পৰ্শকাতৰ দিশটো হ’ল পেঞ্চনৰ বিষয়টো। কেন্দ্ৰীয় চৰকাৰে আৰম্ভ কৰা নতুন পেঞ্চন আঁচনি আৰু ইউনিফাইড পেঞ্চন আঁচনি সম্পূৰ্ণৰূপে নাকচ কৰিছে কৰ্মচাৰীসকলে। সংগঠনটোৰ স্পষ্ট দাবী যে সকলো কেন্দ্ৰীয় কৰ্মচাৰীৰ বাবে কোনো চৰ্ত নোহোৱাকৈ পুৰণি পেঞ্চন আঁচনি (OPS) পুনৰ কাৰ্যকৰী কৰা উচিত।
ইয়াৰ উপৰিও অৱসৰৰ তাৰিখৰ ভিত্তিত পেঞ্চনাৰসকলৰ মাজত হোৱা বৈষম্যৰ অন্ত পেলাবলৈও দাবী উত্থাপন কৰা হৈছে। লগতে কৰ্মচাৰীসকলে দাবী জনাইছে যে ১৫ বছৰৰ পৰিৱৰ্তে ১১ বছৰৰ পিছত কমিউটেড পেঞ্চন আদায় বন্ধ কৰক, যাতে বৃদ্ধ পেঞ্চনাৰসকলে তেওঁলোকৰ হাতত অধিক ধন পায়।
কোভিড মহামাৰীৰ সময়ত বন্ধ কৰি ৰখা ১৮ মাহৰ ডিয়াৰনেছ ভাট্টা/ডিয়ৰনেছ ৰিলিফ বকেয়াৰ বিষয়টোও বিশেষভাৱে ধৰ্মঘটৰ কাৰ্যসূচীত অন্তৰ্ভুক্ত কৰা হৈছে। কৰ্মচাৰীসকলে বিচাৰে যে চৰকাৰে আৰু কোনো পলম নকৰাকৈ এই বকেয়াসমূহ পৰিশোধ কৰক।
সংগঠনটোৰ দাবীসমূহৰ ভিতৰত আছে নূন্যতম পেঞ্চন প্ৰতিমাহে ৯ হাজাৰ টকালৈ বৃদ্ধি কৰাৰ লগতে চাৰিখন নতুন শ্ৰম আইন বাতিল কৰা। সংগঠনটোৱে কয় যে চৰকাৰে শ্ৰমিকৰ প্ৰতি বৈষম্যমূলক মনোভাৱ গ্ৰহণ কৰিছে, যিটো আৰু সহ্য কৰা নহ’ব। এই ক্ষোভৰে ফল ২০২৬ চনৰ ১২ ফেব্ৰুৱাৰীৰ ধৰ্মঘট।
