সোমবাৰে সন্ধিয়া ৬.৫২ বজাত কঁপি উঠিছিল দেশৰ ৰাজধানী। লালকিল্লাৰ পৰা অলপ দূৰৈত ট্ৰেফিক চিগনেলত হোৱা এক বৃহৎ বিস্ফোৰণত পথত সিঁচৰতি হৈ পৰিছিল মানুহৰ দেহৰ অংগ।
জম্মু-কাশ্মীৰত কেইবাবাৰো উগ্ৰপন্থী আক্ৰমণ আৰু সেনাৰ সৈতে সংঘৰ্ষৰ মাজতো নৰেন্দ্ৰ মোদীৰ শাসনকালত ৰাজধানীৰ বুকুত এইটোৱেই আছিল প্ৰথমটো বিস্ফোৰণ। দুদিনৰ অন্তত অৱশেষত কেন্দ্ৰীয় চৰকাৰে দিল্লী বিস্ফোৰণক ‘সন্ত্রাসবাদী আক্রমণ’ বুলি অভিহিত কৰিলে৷
বুধবাৰে তদন্তকাৰী দলসমূহক এই কাণ্ডটো “অতি জৰুৰী আৰু পেছাদাৰিত্ব”ৰে চাবলৈও নিৰ্দেশ দিয়া হৈছিল। বুধবাৰে কেন্দ্ৰীয় কেবিনেট বৈঠকত প্ৰধানমন্ত্ৰী নৰেন্দ্ৰ মোদীয়ে নিৰ্দেশ দিয়ে যে দোষী আৰু তেওঁলোকৰ পৃষ্ঠপোষকসকলক বিলম্ব নকৰাকৈ ন্যায়ৰ আওতালৈ আনিব লাগে।
বৈঠকৰ অন্তত চৰকাৰে প্ৰকাশ কৰা বিবৃতিটোত কোৱা হৈছে যে, “২০২৫ চনৰ ১০ নৱেম্বৰৰ সন্ধিয়া লালকিল্লাৰ সমীপত হোৱা গাড়ী বিস্ফোৰণৰ জৰিয়তে দেশ বিৰোধী শক্তিয়ে সংঘটিত কৰা এক জঘন্য সন্ত্ৰাসবাদী কাণ্ডৰ সাক্ষী হৈ পৰিছে। এই বিস্ফোৰণৰ ফলত একাধিক লোকৰ মৃত্যু হোৱাৰ লগতে আন কেইবাজনো লোক আহত হৈছে।” বিবৃতিটোত ইয়াক ‘কাপুৰুষোচিত কাম’ বুলিও উল্লেখ কৰা হৈছে।
প্ৰসংগক্ৰমে ‘অপাৰেচন সিন্দুৰ’ৰ সময়ত প্ৰধানমন্ত্ৰী নৰেন্দ্ৰ মোদীয়ে ঘোষণা কৰিছিল যে ভাৰতৰ বিৰুদ্ধে যিকোনো আক্ৰমণক ‘যুদ্ধ’ (‘যুদ্ধৰ কাৰ্য্য’) বুলি গণ্য কৰা হ’ব। কিন্তু দিল্লী কাণ্ডৰ ৪৮ ঘন্টা আৰু ঘটনাত জৈছ সংযোগ পোৱাৰ পাছতো এই আক্ৰমণৰ আঁৰত কোন আছিল সেই বিষয়ে আনুষ্ঠানিকভাৱে কোনো উল্লেখ কৰা হোৱা নাছিল। কেৱল সেয়াই নহয়, চৰকাৰে এই ঘটনাক এতিয়ালৈকে ‘সন্ত্রাসবাদী আক্রমণ’ বুলিও উল্লেখ কৰা নাছিল৷
তদুপৰি, মঙলবাৰে পুৱা ভূটানলৈ ৰাওনা হয় নৰেন্দ্ৰ মোডী। গৃহমন্ত্ৰী অমিত শ্বাহে এই ঘটনাৰ বাবে দায়ীসকলক ‘বিচাৰি উলিওৱাৰ’ৰ নিৰ্দেশ দিছিল। দুদিনীয়া ভূটান ভ্ৰমণৰ অন্তত বুধবাৰে দেশলৈ উভতি আহে প্ৰধানমন্ত্ৰীগৰাকী। তেওঁ আহতসকলক সাক্ষাৎ কৰে। তাৰ পিছত তেওঁ সন্ধিয়া কেন্দ্ৰীয় কেবিনেট বৈঠকৰ অধ্যক্ষতাও কৰে।
অৱশেষত দিল্লী বিস্ফোৰণক ‘সন্ত্রাসবাদী আক্রমণ’ বুলি অভিহিত কৰিলে নতুন দিল্লীয়ে৷ তাৎপৰ্যপূৰ্ণ যে যিকোনো সন্ত্ৰাসবাদী আক্ৰমণৰ পিছত বিজেপি বা নতুন দিল্লীয়ে পাকিস্তানৰ প্ৰতি আঙুলি টোৱাই আহিছে। অৱশ্যে ইউএপিএ অৰ্থাৎ সন্ত্ৰাসবাদ বিৰোধী আইনৰ অধীনত এফআইআৰ দাখিল কৰা হৈছে। নতুন দিল্লীয়ে এতিয়া পাকিস্তানৰ বিৰুদ্ধে কিবা ব্যৱস্থা ল’বলৈ ওলাইছে নেকি? গোটেই দেশখনে তালৈকে চাই আছে।
