চলিত বছৰৰ ১ ফেব্ৰুৱাৰিতে উকলিছিল ম্যাদ। কিন্তু কৰ’না ভাইৰাছৰ পৰিস্থিতিৰ বাবে কেইবাবাৰো সময়সীমা বৃদ্ধি কৰি অৱশেষত অহা ৩১ ডিচেম্বৰ অন্তিম সময়সীমা নিৰ্দ্ধাৰণ কৰা হৈছিল।
পিচে, সেই সময়সীমা আকৌ বৃদ্ধি কৰিলে। নতুন নিৰ্দেশনা অনুসৰি অহা বছৰৰ ৩১ মাৰ্চ পৰ্যন্ত বৃদ্ধি কৰা হৈছে ড্ৰাইভিং লাইচেন্স, গাড়ীৰ পঞ্জীয়ন, ফিটনেছ প্ৰমানপত্ৰকে ধৰি বিভিন্ন গুৰুত্বপূৰ্ণ নথিৰ নবীকৰণৰ দিন।
দেওবাৰে কেন্দ্ৰীয় পথ পৰিবহন মন্ত্ৰ্যালয়ে জানিবলৈ দিয়ে যে কৰ’না পৰিস্থিতিৰ বাবে পুনৰ ম্যাদ বৃদ্ধি কৰা হৈছে।
নিৰ্দেশনা অনুসৰি, যোৱা ১ ফেব্ৰুৱাৰিত ম্যাদ উকলি যোৱা বা নতুন বছৰৰ ৩১ মাৰ্চৰ ভিতৰত যিসমূহ নথিৰ ম্যাদ উকলিব, সেইবোৰ ৩১ মাৰ্চলৈকে নবীকৰণ কৰিব পৰা যাব।
ইয়াকে লৈ চতুৰ্থবাৰৰ বাবে ড্ৰাইভিং লাইচেন্স, গাড়ীৰ পঞ্জীয়ন, ফিটনেছ প্ৰমানপত্ৰকে ধৰি বিভিন্ন গুৰুত্বপূৰ্ণ নথিৰ নবীকৰণৰ ম্যাদ বৃদ্ধি কৰা হ’ল।
যোৱা আগষ্টত কেন্দ্ৰই এই ম্যাদ ৩১ ডিচেম্বৰলৈকে বৃদ্ধি কৰিছিল।
ইয়াৰ পাছতে সকলো ৰাজ্য আৰু কেন্দ্ৰীয় শাসিত অঞ্চলক এখন নিৰ্দেশনা দি জনোৱা হৈছে যে লকডাউনৰ বাবে ড্ৰাইভিং লাইচেন্সৰ দৰে নথিসমূহ নাগৰিকসকলে নবীকৰণ কৰিব পৰা নাই।
এতিয়া সেই নবীকৰণ কৰাৰ বাবে দেশৰ সকলো পৰিবহন কাৰ্যালয়ৰ সন্মুখত লোকে ভিৰ কৰিছে আৰু দীঘলীয়া শাৰী পাতিবলগীয়া হৈছে। ফলত সামাজিক দূৰত্বৰ বিধি উলংঘা কৰা হৈছে বুলি অনুভৱ কৰিছে সংশ্লিষ্ট কৰ্তপক্ষই।
এনে পৰিস্থিতিত সাধাৰণ নাগৰিক, পৰিবহন সংস্থা তথা আন সংস্থাসমূহে যাতে সমস্যা বা লাঞ্চনাৰ বলি হ’বলগীয়া নহয় সেয়া নিশ্চিত কৰিবলৈ ৰাজ্য আৰু কেন্দ্ৰীয় শাসিত অঞ্চলসমূহক কেন্দ্ৰই নিৰ্দেশ দিছে।
