কৰ্মসংস্থানৰ অনিশ্চয়তাত দিশহাৰা দেশ! কাম নাপাই হতাশ যোগ্য নিবনুৱা; প্ৰতিবেদনে কি কয়?

দেশত কৰ্মসংস্থানৰ সমস্যাই কি যে ভয়াবহ ৰূপ ধাৰণ কৰিছে সেয়া ক্ৰমে স্পষ্ট হৈ পৰিছে। নিবনুৱা সমস্যাই ইমানেই মাৰাত্মক ৰূপ ধাৰণ কৰিছে যে দেশৰ এক বৃহৎ সংখ্যক লোকে আনকি কৰ্মসংস্থানৰ চেষ্টাও পৰিত্যাগ কৰিছে।

মুম্বাইৰ এটি বেচৰকাৰী সংস্থা চেন্টাৰ ফৰ মনিটৰিং ইণ্ডিয়ান ইক’নমি প্ৰাইভেট লিমিটেডৰ তথ্য অনুসৰি লাখ লাখ ভাৰতীয় যোগ্য চাকৰি বিচাৰি নাপাই হতাশ হৈ পৰিছে। বিশেষকৈ মহিলাসকল সম্পূৰ্ণভাৱে কৰ্মসংস্থানৰ জগতখনৰ পৰা আঁতৰি গৈছে।  

বিশ্বৰ বিকাশশীল অৰ্থনৈতিক শক্তি হিচাপে উত্থান ঘটা ভাৰতত কিন্তু ২০১৭চনৰ পৰা ২০২২লৈকে এই পাঁচ বছৰত দেশৰ শ্ৰমশক্তিৰ উন্নয়নত অংশগ্ৰহণ উল্লেখযোগ্যভাৱে হ্ৰাস পাইছে। এই হাৰ ৪৬শতাংশৰ পৰা ৪০ শতাংশলৈ হ্ৰাস পাইছে। এইক্ষেত্ৰত মহিলাৰ স্থিতি অধিক শোচনীয়।

লগতে পঢ়ক: ভুৱা বাতৰি প্ৰচাৰ! ১৬টা জনপ্ৰিয় ইউটিউব চেনেল নিষিদ্ধ কৰিলে মোদী চৰকাৰে; চাওক তালিকা

সমীক্ষা অনুসৰি দুই কোটিৰো অধিক কৰ্ম প্ৰত্যাশী লোক হতাশ হৈ পৰিছে। তেওঁলোকে আনকি কাম পোৱাৰ আশাও বাদ দিছে। মাত্ৰ ৯ শতাংশইহে এতিয়াও কামৰ সন্ধান কৰিছে আৰু ভাল কাম বিচাৰি আছে।

সেইদৰে, চাকৰিৰ বয়স থকা দেশৰ প্ৰায় ৪৫লাখ চাকৰি প্ৰত্যাশীয়ে কাম পোৱাৰ আশা পৰিত্যাগ কৰিছে। আমেৰিকা আৰু ৰাছিয়া মিলি যি মুঠ জনসংখ্যা তাৰ সমানেই ভাৰতৰ এই হতাশ হৈ পৰা কৰ্ম প্ৰাৰ্থীৰ সংখ্যা।  

বিশেষজ্ঞসকলৰ মতে বিষয়টো যথেষ্ট উদ্বেগজনক। তেওঁলোকে অনুমান কৰে যে ভাৰত বৰ্তমান মধ্যমীয়া আয়ৰ দেশ হিচাপেই থাকিব আৰু তাতকৈ আগবঢ়াৰ সম্ভাৱনা নাই। তদুপৰি, তেওঁলোকে বৰ্তমান পৰিস্থিতিত দেশত আৰ্থিক বৈষম্য বৃদ্ধি পোৱাৰো আশংকা ব্যক্ত কৰিছে।

লগতে পঢ়ক: দৰে-দামে মিলিল! টুইটাৰ এতিয়া এলন মাস্কৰ; নগদ ৪,৪৪০কোটি ডলাৰত কৰিলে ক্ৰয়

দৰাচলতে ভাৰতত নতুন কৰ্মসংস্থানৰ সৃষ্টি নোহোৱাটো এক দীৰ্ঘদিনীয়া অভিযোগ। কেবল মাত্ৰ কেইটামান চৰকাৰী চাকৰিৰ বাবেই লাখ লাখ নিবনুৱাই আবেদন কৰে। কাৰিকৰী শিক্ষিত নিবনুৱাইও আনকি কৰ্মসংস্থানৰ বাবে হাবাথুৰি খাবলগীয়া হৈছে।