প্ৰধানমন্ত্ৰী নৰেন্দ্ৰ মোদীয়ে ২০২২ চনৰ মে’ৰ পৰা ২০২৪ চনৰ ডিচেম্বৰৰ ভিতৰত ৩৮টা বিদেশ ভ্ৰমণ কৰিছিল আৰু ইয়াৰ বাবে মুঠ খৰচ হৈছে ২৫৮ কোটি টকা। বৃহস্পতিবাৰে ৰাজ্যসভাত এই কথা সদৰী কৰিছে কেন্দ্ৰীয় চৰকাৰে।
ৰাজ্যসভাত এক প্ৰশ্নৰ উত্তৰত বৈদেশিক পৰিক্ৰমা ৰাজ্যিক মন্ত্ৰী পবিত্ৰ মাৰ্ঘেৰিটাই বিদেশ ভ্ৰমণৰ বাবে প্ৰধানমন্ত্ৰীৰ ব্যয়ৰ হিচাপ আগবঢ়ায়। তেওঁ কয় যে এটা ভ্ৰমণত সৰ্বাধিক ব্যয় হৈছে ২০২৩ চনৰ জুন মাহত মোডীৰ আমেৰিকা ভ্ৰমণত। কেৱল সেই ভ্ৰমণৰ মুঠ খৰচ আছিল ২২ কোটি টকাৰ অলপ বেছি।
আনহাতে, ২০২৪ চনৰ ছেপ্টেম্বৰ মাহত আমেৰিকা ভ্ৰমণৰ বাবে ১৫ কোটিৰ অলপ বেছি খৰচ হয় । ২০২৩ চনৰ মে’ মাহত জাপান ভ্ৰমণৰ বাবে প্ৰায় ১৭ কোটি টকা খৰচ হৈছিল। আকৌ ২০২২ চনৰ মে’ মাহত নেপাল ভ্ৰমণৰ খৰচ আছিল ৮০ লাখ টকাৰ অলপ বেছি।
এই সময়ছোৱাত মোদীয়ে জাৰ্মানী, কুৱেইট, ডেনমাৰ্ক, ফ্ৰান্স, সংযুক্ত আৰব আমিৰশ্বাহী উজবেকিস্তান, অষ্ট্ৰেলিয়া, দক্ষিণ আফ্ৰিকা, গ্ৰীচ, পোলেণ্ড, ৰাছিয়াকে ধৰি বহু দেশ ভ্ৰমণ কৰিছিল।
বৃহস্পতিবাৰে ৰাজ্যসভাত এই তথ্য জানিব বিচাৰিছিল বিৰোধী দলৰ নেতা মল্লিকাৰ্জুন খাৰ্গেই। প্ৰধানমন্ত্ৰীৰ প্ৰতিটো বিদেশ ভ্ৰমণৰ লগত নিজ নিজ দেশত থকা ভাৰতীয় দূতাবাসৰ পৰা আৰম্ভ কৰি হোটেলত থকা, যাতায়ত আৰু অন্যান্য খৰচকে ধৰি ব্যয়ৰ বিশদ বিৱৰণ দিব লাগে বুলি দাবী জনাইছিল। ইয়াৰ পিছতে বৈদেশিক পৰিক্ৰমা মন্ত্ৰালয়ে এই তথ্য প্ৰদান কৰে।
উল্লেখ্য যে যোৱা ফেব্ৰুৱাৰী মাহত মোডীয়ে পুনৰ আমেৰিকা ভ্ৰমণ কৰিছিল। ড’নাল্ড ট্ৰাম্প পুনৰ কাৰ্যভাৰ গ্ৰহণ কৰাৰ পিছত এইটোৱেই আছিল প্ৰধানমন্ত্ৰীৰ প্ৰথম আমেৰিকা ভ্ৰমণ। দুদিনীয়া ভ্ৰমণৰ সময়ত ট্ৰাম্পৰ সৈতে মোডীয়ে দীঘলীয়া বৈঠকত মিলিত হৈছিল।
