দেশবাসীৰ গৰিষ্ঠ সংখ্যক নাগৰিকৰ অমতত জাপি দিয়া নাগৰিকত্ব (সংশোধন) আইনখনক লৈ আন এক ষড়যন্ত্ৰত লিপ্ত হ’ব পাৰে কেন্দ্ৰীয় চৰকাৰ।
পূৰ্বৰ ব্যৱস্থা মতে এই আইনখনৰ অধীনত নাগৰিকত্বৰ বাবে আবেদন কৰিবলৈ জিলা দণ্ডাধীশৰ জৰিয়তে যাব লাগিছিল যদিও এতিয়া সেয়া পোনপটীয়াকৈ আৰু অনলাইন প্ৰক্ৰিয়াৰ মাজেৰে কৰিবলৈ দিয়াৰ সিদ্ধান্ত ল’ব পাৰে কেন্দ্ৰীয় চৰকাৰে।
“আমি জিলা দণ্ডাধীশৰ সলনি এটা নতুন কৰ্তৃপক্ষ স্থাপনৰ কথা চিন্তা কৰিছো আৰু আৱেদন কৰা, নথি পৰীক্ষা কৰা আৰু ভাৰতৰ নাগৰিকত্ব প্ৰদান কৰা- এই গোটেই প্ৰক্ৰিয়াটো অনলাইন কৰাৰ কথা ভাবি আছো”, কেন্দ্ৰীয় গৃহ মন্ত্ৰ্যালয়ৰ এটা সূত্ৰই কয়।
গৃহ মন্ত্ৰ্যালয়ৰ সূত্ৰটোৰ ভাষ্যৰ পিছত এই ধাৰণা কৰা হৈছে যে বহুকেইখন ৰাজ্যই আইনখনৰ বিৰোধিতা কৰা আৰু ৰাজ্যবোৰত এই আইন প্ৰযোজ্য নকৰাৰ হুংকাৰ দিয়াৰ পৰিপ্ৰেক্ষিতত কেন্দ্ৰীয় চৰকাৰে এই সিদ্ধান্ত ল’ব পাৰে।
কেৰালা, পশ্চিম বংগ, পাঞ্জাব আদিকে ধৰি বহুকেইখন ৰাজ্যই বিতৰ্কিত আইনখনৰ বিৰুদ্ধে আৰম্ভণিৰ পৰাই স্থিতি গ্ৰহণ কৰি আহিছে আৰু ইয়াক কাৰ্য্যকৰী নকৰাৰ হুংকাৰ দি আহিছে।
কেৰালা বিধানসভাই ৩১ ডিচেম্বৰত CAA-ৰ বিৰোধিতা কৰি এটা প্ৰস্তাৱ গ্ৰহণ কৰিছিল। পশ্চিম বংগৰ মুখ্য মন্ত্ৰী মমতা বেনাৰ্জীয়েও আইনখনৰ ক্ষেত্ৰত যুদ্ধংদেহি মনোভাব লৈছে।
অনলাইন প্ৰক্ৰিয়াৰ জৰিয়তে ৰাজ্যসমূহৰ স্থিতি আৰু ভূমিকাক সম্পূৰ্ণ আওকাণ কৰিব পৰা যাব।
তাৰোপৰি জিলা দণ্ডাধীশৰ পৰিৱৰ্তে নতুন কৰ্তৃপক্ষক দায়িত্ব দি নথি-পত্ৰ প্ৰক্ৰিয়াটোত এটা সৰলীকৰণ বা নিখুঁততা-বৰ্জিত বাট ল’ব পৰা যাব।
অসমৰ মুখ্য মন্ত্ৰী সৰ্বানন্দ সোণোৱালে অসমৰ মানুহক বুজাই আহিছে যে সম্পূৰ্ণ নথি-পত্ৰ সহ জিলা কৰ্তৃপক্ষৰ ওচৰত আৱেদন কৰাৰ পিছত, সেই নথি তন্ন তন্নকৈ পৰীক্ষা কৰা হ’ব। তাৰ পিছতহে, গ্ৰহণযোগ্য বিবেচিত হ’লেহে ব্যক্তিজনক নাগৰিকত্ব দিয়া হ’ব।
ইতিপূৰ্বে সোণোৱালে অসমত তেনেই কম সংখ্যক মানুহেহে আইনখনৰ অধীনত নাগৰিকত্ব পাব বুলি কোৱা কথাও অমিত শ্বাহৰ “অসম সৰ্বাধিক প্ৰভাৱিত হ’ব” মন্তব্যই অসত্য প্ৰমাণ কৰিছিল।