বৌৰ্ণভিটাক ‘স্বাস্থ্যকৰ পানীয়’ৰ তালিকাৰ পৰা আঁতৰাইছে কেন্দ্ৰই। সকলো ই-কমাৰ্চ কোম্পানীকে কেন্দ্ৰীয় বাণিজ্য আৰু উদ্যোগ মন্ত্ৰালয়ে এই নিৰ্দেশ প্ৰদান কৰিছে। অনলাইন মাৰ্কেটিং কোম্পানীসমূহে আৰু নিজৰ চাইট বা প্লেটফৰ্মত বৌৰ্ণভিটা বা অনুৰূপ পানীয়ক ‘স্বাস্থ্যকৰ পানীয়’ শিতানত তালিকাভুক্ত কৰিব নোৱাৰিব বুলি কেন্দ্ৰই নিৰ্দেশ দিয়ে। ইয়াৰ কাৰণ হ’ল চেনিৰ অধিক মাত্ৰা।
কেন্দ্ৰীয় মন্ত্ৰালয়ে এক বিবৃতিত কয় যে শিশু অধিকাৰ সুৰক্ষা আয়োগ (চিপিচিআৰ) আইন, ২০০৫ৰ ৩ নং ধাৰাৰ অধীনত ৰাষ্ট্ৰীয় শিশু অধিকাৰ সুৰক্ষা আয়োগ গঠন কৰা হৈছে। চিপিচিআৰ আইনৰ ১৪ নং ধাৰাত তদন্ত চলাইছিল। ইয়াৰ পাছত খাদ্য সুৰক্ষা আৰু নিয়ন্ত্ৰণ (FSS) আইন (২০০৬) অনুসৰি স্বাস্থ্যসন্মত পানীয়ৰ কোনো সংজ্ঞা নাই। এনচিপিচিআৰৰ তদন্তত এইটোও দেখা গৈছে যে বৌৰ্ণভিটাত নিৰ্ধাৰিত মাত্ৰাতকৈ অতিৰিক্ত চেনি থাকে।
ইয়াৰ পূৰ্বে এনচিপিচিআৰে এফএছএছআইক নিৰ্দেশ দিছিল যে- শক্তি পৰিপূৰকক ‘স্বাস্থ্যসন্মত পানীয়’ বুলি অভিহিত কৰা আৰু নিৰ্মাণৰ সময়ত নিৰ্দেশনা, সুৰক্ষাৰ নিয়ম পালন নকৰা কোম্পানীসমূহৰ বিৰুদ্ধে ব্যৱস্থা গ্ৰহণ কৰা হ’ব। কিন্তু এই কথা উল্লেখ্য যে, খাদ্য আইনত ‘স্বাস্থ্যকৰ পানীয়’ৰ কোনো সংজ্ঞা নাই। চলিত মাহৰ আৰম্ভণিতে এফএছএছআইয়ে সকলো অনলাইন মাৰ্কেটিং কোম্পানীক বিক্ৰী কৰা সকলো সামগ্ৰীৰ সঠিক শ্ৰেণীবিভাজন কৰিবলৈ নিৰ্দেশ দিছিল। নিৰ্দেশনাত উল্লেখ আছিল যে,দুগ্ধ বা শস্য ভিত্তিক পানীয়ক ‘স্বাস্থ্য পানীয়’ হিচাপে বজাৰত বিক্ৰী কৰিব নোৱাৰি।
শেহতীয়াকৈ ইউটিউবত এজন ভ্লগাৰে বৌৰ্ণভিটালৈ আঙুলিয়াই দিয়ে। ইউটিউবাৰজনে কয় যে ইয়াৰ উপাদানসমূহ স্বাস্থ্যকৰ নহয়। ইয়াত অতিৰিক্ত চেনি, ক’ক’ আৰু ক্ষতিকাৰক ৰং থাকে। ইয়াৰ পাছতহে বিষয়টো কেন্দ্ৰৰ দৃষ্টিগোচৰ হোৱা বুলি অনুমান কৰা হৈছে।
