‘‘বিজেপি নেতৃত্বাধীন কেন্দ্ৰীয় চৰকাৰে উত্তৰ-পূবত ঔদ্যোগিক কৰিড’ৰ স্থাপন কৰাৰ পৰিকল্পনা গ্ৰহণ কৰিছে যিয়ে অঞ্চলটোত নিয়োগ সম্ভাৱনাৰ সৃষ্টি কৰিব।’’
প্ৰতিৰক্ষা মন্ত্ৰী ৰাজনাথ সিঙে বৃহস্পতিবাৰে অৰুণাচল প্ৰদেশৰ টাৱাঙত ১১ সংখ্যক মৈত্ৰী দিৱসত এই মন্তব্য কৰে।
‘‘পৰিকল্পিত ঔদ্যোগিক কৰিদৰে ভাৰত আৰু দক্ষিণ পূব এছিয়াৰ মাজত মাটিৰ দলঙৰ দৰে কাম কৰিব যি নিয়োগ সম্ভাৱনীয়তাৰ লগতে ব্যৱসায় আৰু পৰ্যটনৰ সম্ভাৱনাও বৃদ্ধি কৰিব,’’ ৰাজনাথ সিঙে কয়।
চৰকাৰে পূবলৈ চোৱা নীতিৰ আধাৰত উত্তৰ-পূবৰ বিকাশৰ প্ৰতি বিশেষ গুৰুত্ব দিছে বুলি উল্লেখ কৰি ভাৰতে প্ৰধান মন্ত্ৰী নৰেন্দ্ৰ মোদীৰ নেতৃত্বত বিকাশৰ পথত আগবাঢ়িছে বুলিও সিঙে কয়।
নতুন ভাৰতৰ পথ উত্তৰ-পূবৰ পৰা আৰম্ভ হৈছে বুলি প্ৰতিৰক্ষা মন্ত্ৰী গৰাকীয়ে মন্তব্য কৰে।
ৰাজনাথ সিঙে সীমান্ত অঞ্চলৰ যোগাযোগ ব্যৱস্থা উন্নত কৰাৰ ক্ষেত্ৰত চৰকাৰ বদ্ধপৰিকৰ বুলি মন্তব্য কৰাৰ লগতে টাৱাঙৰ চেলা পাছ, পাচিঘাট বিমানবন্দৰ, ইটানগৰৰ হোলোংগি বিমানবন্দৰ আৰু ৰেইলৱে সংযোগৰ বিষয়েও উল্লেখ কৰে।
অৰুণাচলৰ নতুন যোগাযোগ ব্যৱস্থাই স্থানীয় নাগৰিক, সেনাৰ চলাচলৰ লগতে পৰ্যটন ক্ষেত্ৰক উপকৃত কৰিছে বুলিও মন্ত্ৰী গৰাকীয়ে কয়।
ভাষণত ৰাজনাথ সিঙে অৰুণাচলৰ মুখ্য মন্ত্ৰী পেমা খাণ্ডুৰ আন্তঃৰাজ্যিক আৰু আন্তঃজিলাৰ পথ সমূহক লৈ পঞ্চম বাৰ্ষিক পথ পৰিকল্পনাৰ বিষয়েও উল্লেখ কৰে।
স্থানীয় সংস্কৃতিৰ লগতে সৈন্য বাহিনীৰ বিভিন্ন অস্ত্ৰ-শস্ত্ৰৰ প্ৰদৰ্শনীৰে আয়োজন কৰা মৈত্ৰী উৎসৱ অঞ্চলটোৰ ৰাইজৰ দেশপ্ৰেম আৰু সেনা বাহিনীৰ সৈতে থকা একাত্ম সম্পৰ্কক প্ৰতিফলিত কৰে বুলি ৰাজনাথ সিঙে কয়।
অনুষ্ঠানত অংশগ্ৰহণ কৰি প্ৰতিৰক্ষা মন্ত্ৰীয়ে সীমান্ত অঞ্চলত অৱস্থিত ৰাজ্য সমূহৰ যুৱ সকলক সৈন্য বাহিনীত যোগদানৰ বাবে আহ্বান জনায়।
‘‘অৰুণাচলৰ লোকসকলক দেশভক্তিৰ বাবে জনা যায়। মোৰ মন্ত্ৰ্যালয়ে অৰুণাচলৰ টাৱাঙকে ধৰি বিভিন্ন স্থানত সেনা বাহিনী নিয়োগ কেন্দ্ৰ স্থাপনৰ প্ৰতি লক্ষ্য ৰাখিছো,’’ প্ৰতিৰক্ষা মন্ত্ৰীয়ে কয়।
অনুষ্ঠানৰ শেষত সিঙে টাৱাঙত স্থাপিত যুদ্ধ সংগ্ৰহালয় পৰিদৰ্শন কৰি ১৯৬২ যুদ্ধত প্ৰাণ আহুতি দিয়া সেনা সকলক স্মৰণ কৰে।