নৱবৰ্ষৰ প্ৰথম আৰু দ্বিতীয় দিন দুটাত সন্ত্ৰাসবাদী আক্ৰমণে জোকাৰি পিছতে জম্মু-কাশ্মীৰৰ দুই সীমান্ত জিলা ৰাজৌৰী আৰু পুঞ্চত নিৰাপত্তা ব্যৱস্থা বৃদ্ধিৰ বাবে আজি বৃহৎ সংখ্যক চি আৰ পি এফ কোম্পানী নিয়োগ কৰিছে গৃহ বিভাগে।
প্ৰকাশিত খবৰ অনুসৰি ১৮ টা চিআৰপিএফ কোম্পানীৰ প্ৰায় ১,৮০০ গৰাকী জোৱানক মুখ্যতঃ পুঞ্চ আৰু ৰাজৌৰী জিলাত নিয়োগ কৰাৰ বাবে জম্মু অঞ্চললৈ তাৎক্ষণিকভাৱে প্ৰেৰণ কৰা হ’ব।
তথ্য অনুসৰি, জম্মু-কাশ্মীৰত অন্যান্য স্থানসমূহত নিয়োজিত আঠটা চিআৰপিএফ কোম্পানী অতি সোনকালে সেই স্থানসমূহৰ পৰা আঁতৰাই পুঞ্চ আৰু ৰাজৌৰীত মোতায়েন কৰা হ’ব। আনহাতে দিল্লীৰ পৰা ১০ টা চিআৰপিএফ কোম্পানী জিলা দুখনত নিয়োজিত কৰা হ’ব।
উল্লেখ্য যে, দেওবাৰে সন্ধিয়া ৰাজৌৰীৰ ডাংৰি গাঁৱত ভয়ংকৰ আক্ৰমণ সংঘটিত হৈছিল। হঠাৎ ২ বন্দুকধাৰীয়ে আক্ৰমণ কৰিছিল গাঁওখনত। গাঁৱৰ তিনিটা ঘৰত প্ৰৱেশ কৰি নিৰ্বিচাৰে গুলীচালনা আৰম্ভ কৰিছিল দুই বন্দুকধাৰীয়ে। প্ৰথম অৱস্থাত এই আক্ৰমণত ২ গৰাকী লোকৰ মৃত্যুৰ খবৰ পোৱা গৈছিল।
পিছত ৰাজৌৰী চিকিৎসা মহাবিদ্যালয়ত আৰু ২ গৰাকী স্থানীয় গাঁওবাসীয়ে প্ৰাণ হেৰুৱাইছিল। আনহাতে সংকটজনক অৱস্থাত থকা আন দুগৰাকী ব্যক্তিক উন্নত চিকিৎসাৰ বাবে জম্মুলৈ লৈ যোৱা হৈছিল।
এই ঘটনাৰ পিছদিনাই ঘটনাত নিহত হোৱা এগৰাকী ব্যক্তিৰ ঘৰৰ সমীপত সংঘটিত হোৱা আই ই ডি বিস্ফোৰণত দুটা শিশু নিহত হোৱাৰ লগতে ছয়জন লোক আহত হয়।
লক্ষণীয়ভাৱে, নিৰাপত্তা বাহিনীৰ প্ৰচেষ্টাৰ ফলত যোৱা কেইবছৰমানৰ পৰা জম্মু-কাশ্মীৰত সন্ত্ৰাসবাদী কাণ্ড হ্ৰাস পাইছে আৰু প্ৰধানমন্ত্ৰী নৰেন্দ্ৰ মোদীৰ নেতৃত্বত সন্ত্ৰাসবাদৰ ওপৰত নিৰাপত্তা বাহিনীৰ সম্পূৰ্ণ নিয়ন্ত্ৰণ আছে বুলি বছৰৰ শেষৰ ফালে কেন্দ্ৰীয় গৃহ মন্ত্ৰালয়ে এক প্ৰতিবেদনত উল্লেখ কৰিছিল।
কিন্তু ধাৰাবাহিকভাৱে দুটা দিনত সন্ত্ৰাসবাদীৰ কূটাঘাতে সাধাৰণ নাগৰিকৰ প্ৰাণ কাঢ়ি নিয়া তথা পুনৰ অধিকসংখ্যক সেনা নিয়োগ কৰিবলগীয়া পৰিস্থিতিয়ে গৃহ মন্ত্ৰালয়ৰ এই প্ৰতিবেদনক একপ্ৰকাৰে নাকচ কৰি পেলাইছে বুলি অভিযোগ উঠিছে।