কঠোৰ ন্যায়ালয়: চন্দ্ৰপুৰত স্থাপন কৰিব নোৱাৰিব ডাম্পিং গ্ৰাউণ্ড
গুৱাহাটী মহানগৰীৰ উপকণ্ঠৰ চন্দ্ৰপুৰত চৰকাৰে স্থাপন কৰা ডাম্পিং গ্ৰাউণ্ডৰ বিৰুদ্ধে অঞ্চলটোৰ ৰাইজ সৰৱ হৈ থকাৰ সময়তে আজি গুৱাহাটী উচ্চ ন্যায়ালয়ে অহা ১৪ দিনলৈ চন্দ্ৰপুৰত জাৱৰ নেপেলাবলৈ চৰকাৰক নিৰ্দেশ দিয়ে ।
ডাম্পিং গ্ৰাউণ্ডৰ সলনি তাত এটা জাৱৰ নিষ্কাষণ প্ৰকল্প গঢ়াৰো পোষকতা কৰা হৈছে।
এই বিষয়ে চৰকাৰে ১৪ দিনৰ ভিতৰত আদালতক জনাব লাগিব। উল্লেখ্য চন্দ্ৰপুৰ ডাম্পিং গ্ৰাউণ্ড স্থাপনৰ বিৰুদ্ধে প্ৰৱল প্ৰতিবাদ হোৱাৰ সময়তে অধিবক্তা প্ৰদীপ বৰুৱাই এই সন্দৰ্ভত গুৱাহাটী উট্ট ন্যায়ালয়ত এখন ৰাজহুৱা স্বাৰ্থ জৰিত আবেদন কৰিছিল।
উক্ত আবেদনৰ শুনানি গ্ৰহণ কৰিয়েই আদালতে আজি এই নিৰ্দেশ দিয়ে। উল্লেখ্য
ৰাষ্ট্ৰীয় সেউজ ন্যায়াধীকৰণে গুৱাহাটী পৌৰ নিগমক পেলনীয়া জাৱৰ জোথৰৰ ডাম্পিং গ্ৰাউণ্ড স্থানান্তৰৰ নিৰ্দেশ দিছিল।
পূৰ্বে ৰাষ্ট্ৰীয় সেউজ ন্যায়াধীকৰণে এই ডাম্পিং গ্ৰাউণ্ড চন্দ্ৰপুৰ অঞ্চললৈ স্থানান্তৰ কৰাৰ বাবে নিৰ্দেশ দিছিল।
ডাম্পিং গ্ৰাউণ্ড দীপৰ বিলৰ সমীপৰ পশ্চিম বৰাগাঁৱত থকা স্থানৰ পৰা চন্দ্ৰপুৰৰ প্ৰস্তাৱিত স্থানলৈ নিয়াৰ বাবে পদক্ষেপ গ্ৰহণ কৰিবলৈ কোৱা হৈছিল।
কেইবাগৰাকীও পৰিৱেশবিদ তথা সামাজিক কৰ্মীয়ে পশ্চিম বৰাগাঁৱত থকা ডাম্পিং গ্ৰাউণ্ডৰ পেলনীয়া জাৱৰ জোঁথৰে প্ৰদূষণ সৃষ্টি কৰাৰ অভিযোগ তুলি দীপৰ বিলৰ পানী প্ৰদূষিত কৰাৰ লগতে জৈৱ বৈচিত্ৰৰ প্ৰতিও ভাবুকিৰ সৃষ্টি কৰাৰ বিষয়ে চৰকাৰক অৱগত কৰি আৰু ইয়াক উক্ত স্থানৰ পৰা স্থানান্তৰ কৰাৰ বাবে আহ্বান জনাই আহিছিল আৰু ইয়াৰ পৰিপ্ৰেক্ষিততে ডাম্পিং গ্ৰাউণ্ড চন্দ্ৰপুৰলৈ স্থানান্তৰিত কৰাৰ সিদ্ধান্ত লোৱা হৈছিল।