বিগত প্ৰায় দুই সপ্তাহ ধৰি চামগুৰিৰ বিভিন্ন ঠাইত দিনে-নিশাই উপদ্ৰৱ চলোৱা বনৰীয়া হাতীৰ চাৰি জনীয়া জাকটোক অৱশেষত মঙলবাৰে বন বিভাগৰ লোকে খেদি পঠিয়াবলৈ সক্ষম হয়।
হাতীৰ জাকটোৱে হাঁহচৰা বৰালী গাঁৱৰ পথাৰত বিঘাই বিঘাই ধান খেতি বিনষ্ট কৰাৰ লগতে ব্ৰহ্মচাৰি আৰু গেন্ধালি গাঁৱত কেইবাটাও বাসগৃহ ভাঙি লণ্ডভণ্ড কৰিছিল।
উল্লেখ্য যে উদমাৰি খণ্ড বন বিষয়াৰ কাৰ্যালয়ৰ কেইজনমান বনৰক্ষীয়ে বহুদিনৰ পৰা হাতীৰ জাকটোক কাৰ্বি পাহাৰলৈ খেদি পঠিয়াবলৈ চেষ্টা কৰিছিল যদিও বাৰে বাৰে ব্যৰ্থ হোৱাত বন বিভাগৰ বিৰুদ্ধে তীব্ৰ ক্ষোভ প্ৰকাশ কৰিছিল স্থানীয় কৃষক তথা ভুক্তভোগি ৰাইজে।
অৱশেষত মঙলবাৰে চাপানালা খণ্ড বন বিষয়াৰ কাৰ্যালয়ৰ কেইজনমান বনৰক্ষীৰ সহযোগত উদমাৰি উপ খণ্ড বন বিভাগৰ বনৰক্ষীয়ে যুটীয়াভাবে হাতীৰ জাকটো খেদিবলৈ অভিযান চলায়।
মঙলবাৰে সন্ধিয়াৰ পৰা দোভাগ নিশা পৰ্য্যন্ত চলোৱা অভিযানত বন কৰ্মীৰ দলটোৱে হাতী চাৰিটাক পাহাৰৰ দিশে কিছু দূৰ খেদি পঠিয়াবলৈ সক্ষম হয়।
উল্লেখ্য যে বিয়লি ভাগৰ পৰা চামগুৰি অঞ্চলত আৰম্ভ হোৱা এজাক ডাঠ বৰষুণৰ বাবে বন বিভাগৰ অভিযানকাৰী দলটো কিছু সময় থমকি ৰ’ব লগীয়া হৈছিল। কিন্তু পৰৱৰ্তী সময়ত বৰষুণৰ মাজতেই হাতী খেদা অভিযানটো অব্যাহত ৰাখে।
বনৰীয়া হাতীৰ উপদ্ৰৱৰ পৰা বৃহত্তৰ অঞ্চলৰ ৰাইজ তথা কৃষক সকল সাময়িকভাৱে সকাহ পাব বুলি আশা কৰিছে উদমাৰি উপ খণ্ড বন বিষয়াৰ কাৰ্যালয়ৰ বনৰক্ষী সকলে।