যোৱা তিনিদিন ধৰি সঘনে সলনি হোৱা পঞ্জাৱৰ ৰাজনৈতিক দৃশ্যপটৰ অন্ত পেলাই আজি ৰাজ্যৰ মুখ্যমন্ত্ৰী হিচাপে শপত ল’লে চৰণজিত সিং চন্নীয়ে।
তেওঁৰ লগতে সুখজিন্দৰ ৰান্ধাৱা আৰু অ’পি চৌনীয়েও ৰাজ্যৰ উপ মুখ্যমন্ত্ৰী হিচাপে শপত লয় ।
আজি শপত গ্ৰহণ অনুস্থানত উপস্থিত থাকে দলৰ শীৰ্ষ নেতা ৰাহুল গান্ধী।
শনিবাৰে পঞ্জাৱৰ মুখ্যমন্ত্ৰী পদৰ পৰা অমৰিন্দ্ৰৰ সিঙে পদত্যাগ কৰাৰ এদিন পিছত কালি কংগ্ৰেছ হাইকামাণ্ডে চৰণজিত সিং চন্নীৰ নাম মুখ্যমন্ত্ৰী হিচাপে ঘোষণা কৰিছিল। চমকৌৰ চাহিবৰ বিধায়ক চৰণজিত সিং চন্নীয়ে ইয়াৰ পূৰ্বে শিৰোমণি আকালি দল আৰু বিজেপি মিত্ৰজোঁটৰ চৰকাৰ কালত বিৰোধী দলৰ নেতা হিচাপে কাৰ্যনিৰ্বাহ কৰিছিল।
উল্লেখ্য যে চৰণজিত সিং চন্নী পঞ্জাৱৰ প্ৰথমজন দলিত মুখ্যমন্ত্ৰী হিচাপে নিৰ্বাচিত হৈছে। চন্নীক কংগ্ৰেছৰ শীৰ্ষ নেতা ৰাহুল গান্ধীৰ ঘনিষ্ঠ বুলি জনা যায়।
পঞ্জাৱ কংগ্ৰেছৰ মুৰব্বী নৱজোৎ সিং সিদ্ধু আৰু দলৰ জেষ্ঠ নেতা সুখজিন্দৰ ৰান্ধাৱাই হিন্দু নেতা সুনীল জখৰৰ নাম মুখ্যমন্ত্ৰী হিচাপে বিৰোধিতা কৰাৰ পাছত কংগ্ৰেছ হাইকামাণ্ডে চৰণজিত সিং চন্নীক মুখ্যমন্ত্ৰী পদৰ পাৰ্থী হিচাপে মনোনীত কৰিছিল।
মুখ্যমন্ত্ৰী হিচাপে চন্নীৰ নাম প্ৰস্তাৱ হোৱাৰ পিছতে বহু কেইগৰাকী ৰাজনৈতিক নেতাই সংবাদ মাধ্যমৰ আগত জানিবলৈ দিয়ে যে, ৩২ শতাংশ দলিত জনসংখ্যা থকা ৰাজ্যখনত এজন দলিত নেতাক মুখ্যমন্ত্ৰী হিচাপে নিযুক্তি দিয়াটো এক বৃহৎ ৰাজনৈতিক সিদ্ধান্ত। ই ৰাজ্যৰ বিৰোধী ৰাজনৈতিক দলসমূহৰ ৰাজনৈতিক নীতিত প্ৰভাৱ পেলাব।
ইতিমধ্যে ৰাজ্যখনৰ মুখ্য বিৰোধী দল আপ- এ চন্নীৰ নিযুক্তিত আদৰণি জনাইছে। অৱশ্যে ৰাজ্যখনৰ আন এটা শক্তিশালী আঞ্চলিক দল শিৰোমণি আকালি দলে এই সম্পৰ্কে বৰ্তমানলৈকে কোনো মতামত দাঙি ধৰা নাই।
আনহাতে,২০১৮ চনত এগৰাকী প্ৰশাসনিক বিষয়াই চন্নীৰ বিৰুদ্ধে আপত্তিজনক পত্ৰ প্ৰেৰণৰ যি অভিযোগ তুলিছিল,সেই অভিযোগৰ ভিত্তিত এক নতুন বিতৰ্কৰ সৃষ্টি কৰিছে বিজেপিয়ে।
