সমগ্র দেশ জোকাৰি যোৱা ১৭০ ৰ জনৰো অধিক লোকৰ মৃত্যু হোৱা তথা যোৱা ২১ ফেব্ৰুৱাৰীৰ প্ৰায় এসপ্তাহ ধৰি গোলাঘাট আৰু যোৰহাট জিলাত হোৱা বৃহৎ সুৰা ট্রেজেদিৰ ঘটনা সন্দৰ্ভত অৱশেষত কালি অৰ্থাৎ ২৯ মে’ত গোলাঘাট আৰক্ষীয়ে অভিযোগনামা দাখিল কৰে।
উক্ত ঘটনা সন্দৰ্ভত (পি আৰ চি ৪১৮/১৯) আৰক্ষীয়ে এহেজাৰ পৃষ্ঠৰো অধিক এক বৃহৎ আকাৰৰ অভিযোগনামা গোলাঘাটৰ মুখ্য ন্যায়িক দণ্ডাধীশ কিৰণ লাল বৈষ্ণৱৰ আদালতত দাখিল কৰে।
প্ৰাপ্ত তথ্য অনুসৰি আৰক্ষী বিষয়া পার্থ প্ৰতিম শইকীয়াৰ নেতৃত্বত আৰক্ষীৰ এক বিশেষ তদন্তকাৰী গোটে উক্ত ঘটনাৰ তদন্ত কৰিছিল। বুধবাৰে দাখিল কৰা অভিযোগনামাৰ জৰিয়তে উক্ত তদন্তকাৰী দলটোৱে সৰ্বমুঠ ৪১ জন ব্যক্তিৰ বিৰুদ্ধে অভিযোগনামা দাখিল কৰা বুলি জানিব পৰা গৈছে।
উক্ত ৪১ জনৰ ভিতৰৰ ১৫ জনৰ বিৰুদ্ধে ভাৰতীয় দণ্ডবিধিৰ ১২০(বি)/৩২৮/৩০৪ধাৰাৰ লগতে আসাম এক্সাইছ এক্টৰ ৫৫ ধাৰাত অভিযোগনামা আৰু ২৬ জনৰ বিৰুদ্ধে আসাম এক্সাইছ এক্টৰ ৫৫ ধাৰাত অভিযোগনামা দাখিল কৰিছে। ৬৫ গৰাকী সাক্ষী থকা এই গোচৰটোৰ অহা ১১ জুনৰ পৰা মুখ্য ন্যায়িক দণ্ডাধীশৰ আদালতত বিচাৰ প্ৰক্ৰিয়া আৰম্ভ হ’ব।
আদালতত দাখিল কৰা অভিযোগনামাত আৰক্ষীয়ে কাৰ্বি আংলঙৰ খটখটিত থকা ‘ৰেডিয়েন্ত মেনুফেকছাৰ প্ৰাইভেট লিমিটেড’ নামৰ সুৰা উদ্যোগটোৰ পৰা ৩৯ নং ৰাষ্ট্ৰীয় ঘাইপথেৰে মিঠানলৰ সুৰাভৰ্তি টেংকাৰসমূহ ৰাজ্যৰ বিভিন্ন জিলালৈ প্ৰেৰণ কৰা হয় বুলি উল্লেখ কৰাৰ কথা জানিব পৰা গৈছে।
আনহাতে আৰক্ষীৰ তৎপৰতাপূৰ্ণ পদক্ষেপকলৈ জিলাখনৰ জনসাধাৰণ আশাবাদী হৈ পৰিছে আৰু আদালতে বিচাৰ প্ৰক্ৰিয়াৰ মাজেৰে শীঘ্ৰে দোষী ব্যক্তিক শাস্তি প্ৰদান কৰিব বুলি আশা প্ৰকাশ কৰিছে।
