কেন্দ্ৰত বিজেপি চৰকাৰ শাসনলৈ অহাৰ পিছৰে পৰা দেশৰ বিভিন্ন গুৰুত্বপূৰ্ণ ঠাই, ক্ৰীড়াক্ষেত্ৰ আৰু পথৰ নাম সলনি কৰাৰ ধাৰা অব্যাহত আছে। শেহতীয়াকৈ এগৰাকী বিজেপি সাংসদে দিল্লীৰ নাম সলনি কৰি ‘ইন্দ্ৰপ্ৰস্থ’ ৰাখিবলৈ কেন্দ্ৰীয় গৃহমন্ত্ৰী অমিত শ্বাহলৈ পত্ৰ প্ৰেৰণ কৰিছে।
সাংসদগৰাকীৰ মতে, দিল্লী কেৱল এখন আধুনিক চহৰেই নহয়, বৰঞ্চ ভাৰতীয় সভ্যতাৰ আত্মা। তেওঁ যুক্তি দিছে যে বাৰাণসী, প্ৰয়াগৰাজ, উজ্জয়িন আৰু অযোধ্যাই যেতিয়া এতিয়াও নিজৰ ‘প্ৰাচীন পৰিচয়’ বজাই ৰাখিছে, তেন্তে দিল্লীকো সেই গৌৰৱময় ৰূপলৈ ঘূৰাই অনা উচিত।
দিল্লীৰ চান্দনী চ’কৰ বিজেপি সাংসদ প্ৰবীণ খাণ্ডেলৱালে কেন্দ্ৰীয় গৃহমন্ত্ৰী অমিত শ্বাহলৈ পত্ৰ লিখি এই অনুৰোধ জনাইছে। তেওঁ কেৱল ৰাজধানীৰ নাম সলনি কৰাই নহয়, লগতে পুৰণি দিল্লী ষ্টেচনৰ নাম ‘ইন্দ্ৰপ্ৰস্থ জংচন’ আৰু আন্তঃৰাষ্ট্ৰীয় বিমানবন্দৰৰ নাম ‘ইন্দ্ৰপ্ৰস্থ বিমানবন্দৰ’ হিচাপে নামাকৰণ কৰাৰো প্ৰস্তাৱ আগবঢ়াইছে।
খাণ্ডেলৱালে শ্বাহলৈ লিখা পত্ৰত কয় যে যদি এই পদক্ষেপ গ্ৰহণ কৰা হয়, তেন্তে ইয়াৰ দ্বাৰা দিল্লীৰ ঐতিহাসিক, সাংস্কৃতিক আৰু সভ্যতামূলক শিপা উজ্জ্বল হৈ উঠিব। তেওঁৰ মতে, দিল্লীৰ ইতিহাস হাজাৰ হাজাৰ বছৰ পুৰণি, আৰু পাণ্ডৱসকলে নিৰ্মাণ কৰা ইন্দ্ৰপ্ৰস্থটোও সেই পৰম্পৰাৰ সৈতে জড়িত।
তেওঁ লগতে ৰাষ্ট্ৰীয় ৰাজধানীত পঞ্চপাণ্ডৱৰ প্ৰতিমূৰ্তি স্থাপন কৰিবলৈ অনুৰোধ জনায়। তেওঁৰ ভাষাত, ‘পৱিত্ৰ ইন্দ্ৰপ্ৰস্থ’ত পাণ্ডৱৰ প্ৰতিমূৰ্তি স্থাপন কৰিলে ভাৰতীয় সংস্কৃতি, ইতিহাস আৰু বিশ্বাসক উজ্জ্বল কৰি তুলিব।
“প্ৰধানমন্ত্ৰী নৰেন্দ্ৰ মোডীৰ সাংস্কৃতিক নৱজাগৰণৰ দৃষ্টিভংগীৰ লগত সংগতি ৰাখি যদি অযোধ্যা, কাশী, প্ৰয়াগৰাজৰ দৰে প্ৰাচীন চহৰবোৰ পুনৰুজ্জীৱিত কৰিব পৰা যায়, তেন্তে দিল্লী কিয় নহয়?” খাণ্ডেলৱালে পত্ৰখনত এইদৰে উল্লেখ কৰে।
সাংসদগৰাকীয়ে দিল্লীৰ মুখ্যমন্ত্ৰী ৰেখা গুপ্তাকে ধৰি আন মন্ত্ৰীসকললৈও একে অনুৰোধেৰে চিঠি লিখিছে।
উল্লেখ্য যে বিজেপিয়ে দেশক হিন্দু ৰাষ্ট্ৰ নিৰ্মাণৰ বাবে প্ৰয়াস কৰি আহিছে যিটো ভাৰতীয় সংবিধানৰ পৰিপন্থী, যি দেশৰ গণতন্ত্ৰকো নস্যাৎ কৰিছে ।
