হাজো সমষ্টিৰ বিজেপিৰ বিধিয়িকা সুমন হৰিপ্ৰিয়াই আজি সংবাদ মাধ্যমৰ আগত মন্তব্য কৰিছে যে চৰৰ পৰা অসমৰ মানুহৰ ওপৰত “ৰাসায়নিক আক্ৰমণ” চলিছে।
বিধায়িকাগৰাকীৰ দাবী, চৰ অঞ্চলত খেতি কৰা লোকসকলে শাক-পাচলিত অত্যধিক ৰাসায়নিক দ্ৰব্য প্ৰয়োগ কৰি অসমীয়া মানুহৰ স্বাস্থ্যক টাৰ্গেট কৰি লৈছে।
প্ৰাক্তন ছাত্ৰ সন্মিলন এখনত অনুষ্ঠিত মেডিকেল কেম্পত উপস্থিত আছিল বিজেপিৰ বিধায়িকাগৰাকী।
“চৰ অঞ্চলত যিবোৰ খাদ্য সামগ্ৰী ইমান বেছি ৰাসায়নিক সাৰ, ঔষধ থাকে যে আমি পাচলিৰ নামত কেমিকেলহে খাই আছো। গতিকে কেন্সাৰ নহৈ কি হ’ব?”, চাৰিওফালে কেন্সাৰ ৰোগীৰ সংখ্যা বৃদ্ধি হোৱা সন্দৰ্ভত মত আগ বঢ়াই বিধায়িকাগৰাকীৰ মন্তব্য। তেওঁৰ মতে, দিল্লী, বোম্বেই, বি বৰুৱা সকলোতে কেন্সাৰ ৰোগী ভৰি পৰিছে।
“২০০ গ্ৰাম ওজনৰ লাওটো ৰাতিটোৰ ভিতৰতে ৩ কেজি ওজনৰ কৰি দিয়ে। মুৰ্গীবিলাক চাব, ২০০/৩০০ গ্ৰাম ওজনৰ মুৰ্গী এটাক কল খুৱাই দিয়া হয়, কলৰ ভিতৰত মিডিচিন থাকে, খাই তিনি কেজি ওজনৰ হৈ যায়। সেইবোৰ আমি খাওঁ। মাছৰ পেটত ভালকৈ চাব। এইবোৰ চব কেমিকেল মৰা মাছ, এক ৰাতিৰ ভিতৰত দুই-তিনি কেজি হৈ যায়”, অদ্ভুত দাবী বিধায়িকাগৰাকীৰ।
“আমাৰ মানুহ”ক আক্ৰমণ কৰা হৈছে বুলি দাবী কৰি সুমন হৰিপ্ৰিয়াৰ মন্তব্য, “আমাৰ মানুহ বুলি এই কাৰণে কৈছো যে তেওঁলোকে নিজে ভালবোৰ খায়। দুই ধৰণৰ খেতি থাকে। এবিধ বেপাৰৰ বাবে, এবিধ নিজে খাবৰ বাবে”।
আনহাতে নিঃসন্তান দম্পতীৰ সংখ্যা বৃদ্ধি পাইছে বুলি দাবী কৰি বিধায়িকাগৰাকীয়ে কয়, “আমাৰ বিয়া হোৱা মহিলাবিলাকৰ আজিকালি বাচ্চা নহয়। চিকিৎসালয়, ফাৰ্টিলিটি চেণ্টাৰত লাইন। চৰ অঞ্চল বা বাহিৰৰ পৰা যিসকল আহিছে সেইবোৰ মহিলাৰ ১০-১২-২০টাকৈ বাচ্ছা। ৰাসায়নিক দ্ৰব্য মিহলি কৰা খাদ্য খাই বন্ধ্যা হৈছে”।
সাম্প্ৰদায়িক আৰু বিতৰ্কিত মন্তব্য কৰা বিজেপিৰ নেতা-বিধায়কৰ স্বভাৱৰ পৰা আঁতৰি নাথাকি বিধায়িকাগৰাকীয়ে ৰাসায়নিক আক্ৰমণো লাভ জেহাদৰ দৰেই এটা আক্ৰমণ বুলি কয়।
নিজৰ মন্তব্যৰ সপক্ষে কোনো প্ৰমাণ বা তথ্য দাঙি নধৰা বিধায়িকাগৰাকীয়ে চৰ অঞ্চলত উৎপাদন কৰা পাচলি খোৱা বন্ধ কৰিবলৈও আহ্বান জনায়।
ৰাজ্যখনৰ বৃহৎ সংখ্যক মানুহৰ জীৱিকাৰ প্ৰতি কোনো দায়বদ্ধতা আৰু উদ্বিগ্নতাৰ প্ৰকাশ নঘটিল জনপ্ৰতিনিধিগৰাকীৰ ভাষ্যত।
অথবা “মাৰাত্মক” বুলি দাবী কৰা ৰাসায়নিক সাৰ আৰু কীটনাশকৰ উৎপাদন, বিক্ৰী ক’ত আৰু কোনখন চৰকাৰৰ অধীনত হৈছে সেই সন্দৰ্ভত নিমাতে থাকিল বিধায়িকাগৰাকী। লগতে এইবোৰৰ বিক্ৰী অথবা ব্যৱহাৰ বন্ধ কৰিবলৈ নিজৰ দলৰ চৰকাৰক আহ্বান নজনালে।
