অনলাইন ক্লাছত ছাত্ৰীক যৌন ইংগিত প্ৰদান কৰাৰ অভিযোগত চেন্নাইৰ এজন ৫৯ বৰ্ষীয় শিক্ষকক গ্ৰেপ্তাৰ কৰা হৈছে।
সেসাদ্ৰী বালা বিদ্যা ভৱন স্কুল নামৰ বিদ্যালয়খনৰ নিলম্বিত শিক্ষকজনক ‘প্ৰটেকচন অৱ চিল্ড্ৰেণ ফ্ৰম ছেক্সুৱেল অফেন্ছ’ ((POCSO) আইনৰ অধীনত গ্ৰেপ্তাৰ কৰা হৈছে।
কালি প্ৰকাশ পোৱা এক বাতৰিমতে, বিদ্যালয়খনৰ ছাত্ৰ-ছাত্ৰীসকলে শিক্ষকগৰাকীৰ ওপৰত যথাযোগ্য ব্যৱস্থা ল’বলৈ অনলাইন অভিযান আৰম্ভ কৰিছিল।
ছাত্ৰ-ছাত্ৰীসকলে জনোৱামতে, লকডাউনৰ সময়ত অনলাইন ক্লাছত শিক্ষকজনে এখন টাৱেল পিন্ধি ক্লাছ লৈছিল।
তেওঁ ছাত্ৰীসকললৈ হোৱাটচাপযোগেও কামুকসুলভ বাৰ্তাও প্ৰেৰণ কৰিছিল।
তদুপৰি শিক্ষকজনে এগৰাকী ছাত্ৰীক চিনেমা চাবলৈও লগ ধৰাৰ কথা ছাত্ৰ-ছাত্ৰীসকলে জানিবলৈ দিছিল।
ছাত্ৰ-ছাত্ৰীসকলে সামাজিক মাধ্যমযোগে অভিযোগ কৰিছিল যে বিদ্যালয় কৰ্তৃপক্ষক শিক্ষকগৰাকীৰ যৌন আতিশয্যৰ বিষয়টো উত্থাপন কৰাৰ পাছতো কোনো ব্যৱস্থা লোৱা হোৱা নাই।
বিদ্যালয়খনৰ প্ৰাক্তন ছাত্ৰ-ছাত্ৰীসকলেও বিদ্যালয় কৰ্তৃপক্ষলৈ এখন বিজ্ঞপ্তি প্ৰেৰণ কৰিছিল।
বিজ্ঞপ্তিখনত প্ৰকাশ কৰা মতে, একাউণ্টেন্সি এণ্ড বিজনেছ ষ্টাডিজৰ ৰাজাগোপালন নামৰ এই শিক্ষকজনে যোৱা ২০ বছৰ ধৰি এনেধৰণে বিদ্যালয়খনৰ ছাত্ৰীসকলৰ ওপৰত যৌন নিৰ্যাতন চলাই আহিছে।
তদুপৰি ভুক্তভোগী ছাত্ৰীসকলে তেওঁৰ বিৰুদ্ধে কিবা অভিযোগ উত্থাপন কৰিলে শিক্ষকজনে পৰীক্ষাৰ নম্বৰ কমাই দিয়াৰো ভাবুকি প্ৰদান কৰি আহিছে বুলি বিজ্ঞপ্তিখনত প্ৰকাশ কৰা হৈছিল।
ৰাজ্যখনৰ শাসনাধিষ্ঠ দল ডিএমকেৰ সাংসদ কানিমঝীয়ে বিষয়টো সম্পৰ্কত ব্যৱস্থা লোৱা হ’ব বুলি জনোৱাৰ এদিন পাছতেই শিক্ষকগৰাকীক গ্ৰেপ্তাৰ কৰা হৈছে।
