অসমৰ সৰ্বাঙ্গীন বিকাশ আৰু উন্নয়নৰ প্ৰতি লক্ষ্য ৰাখি মুখ্যমন্ত্ৰী হিমন্ত বিশ্ব শৰ্মাই ৰাজ্যখনৰ বিভিন্ন জিলাসমূহৰ বাবে নতুন অভিভাৱক মন্ত্ৰীসকলৰ নাম ঘোষণা কৰিছে। জিলা প্ৰশাসনৰ সৈতে মিলি সুশাসন আৰু সমৃদ্ধিৰ দিশত ৰাজ্যখনক আগুৱাই নিয়াৰ উদ্দেশ্যে এই বিশেষ পদক্ষেপ গ্ৰহণ কৰা হৈছে বুলি মুখ্যমন্ত্ৰীগৰাকীয়ে প্ৰকাশ কৰে।
মুখ্যমন্ত্ৰীগৰাকীৰ এই নতুন তালিকা অনুসৰি ৰামেশ্বৰ তেলীক তিনিচুকীয়া আৰু যোৰহাট জিলাৰ দায়িত্ব অৰ্পণ কৰা হৈছে। আনহাতে অতুল বৰাই কামৰূপ মেট্ৰ‘ আৰু ধেমাজি জিলাৰ অভিভাৱক মন্ত্ৰী হিচাপে দায়িত্ব পালন কৰিব। চৰণ বড়োক কোকৰাঝাৰ, বাক্সা আৰু চিৰাং জিলাৰ দায়িত্ব দিয়াৰ বিপৰীতে অজন্তা নেওগক মৰিগাঁও আৰু কামৰূপ জিলাৰ দায়িত্ব অৰ্পণ কৰা হৈছে। একেদৰে অশ্বিনী ৰায় সৰকাৰক বঙাইগাঁও আৰু বৰপেটা, অশোক সিংহলক দৰং আৰু ধুবুৰী, লগতে বিমল বড়াক শিৱসাগৰ আৰু চৰাইদেউ জিলাৰ দায়িত্ব দিয়া হৈছে। বিশ্বজিৎ দৈমাৰীয়ে নলবাৰী আৰু শোণিতপুৰ জিলাৰ অভিভাৱক মন্ত্ৰীৰ দায়িত্ব লাভ কৰাৰ সময়তে জয়ন্ত মল্লবৰুৱাক তামুলপুৰ আৰু গোৱালপাৰা জিলাৰ দায়িত্ব দিয়া হৈছে। ইয়াৰ লগতে কৌশিক ৰায়ক শ্ৰীভূমি আৰু হাইলাকান্দি, কেশৱ মহন্তক দক্ষিণ শালমাৰা-মানকাচৰ আৰু উত্তৰ লখিমপুৰ, কৃষ্ণেন্দু পলক ডিমা হাছাও আৰু কাছাৰ, তথা নীলিমা দেৱীক বজালী আৰু ওদালগুৰি জিলাৰ দায়িত্ব অৰ্পণ কৰা হৈছে। আনহাতে, পীযুষ হাজৰীকাই নগাঁও, হোজাই, কাৰ্বি আংলং আৰু পশ্চিম কাৰ্বি আংলং জিলাৰ দৰে গুৰুত্বপূৰ্ণ দায়িত্ব পালন কৰিব। একেদৰে ডা: ৰণোজ পেগুক বিশ্বনাথ আৰু গোলাঘাট জিলাৰ, আৰু সুশান্ত বৰগোহাঁইক মাজুলী আৰু ডিব্ৰুগড় জিলাৰ অভিভাৱক মন্ত্ৰী হিচাপে নিযুক্তি দিয়া হৈছে।
এই নতুন দায়িত্ব অৰ্পণ কৰাৰ পাছত মুখ্যমন্ত্ৰী হিমন্ত বিশ্ব শৰ্মাই আশা প্ৰকাশ কৰি কয় যে মন্ত্ৰীসকলে জিলা প্ৰশাসনৰ সৈতে অতি ঘনিষ্ঠভাৱে সমন্বয় ৰক্ষা কৰি নিজৰ নিজৰ জিলাসমূহত কাম কৰিব। তেওঁ লগতে কয় যে এই পদক্ষেপে ৰাজ্যখনৰ উন্নয়ন, সুশাসন আৰু সমৃদ্ধিৰ যাত্ৰাক নিশ্চিতভাৱে অধিক দ্ৰুত আৰু গতিশীল কৰি তুলিব।
