শিৱসাগৰ জিলাৰ ডিমৌত সংঘটিত শোকাৱহ দুৰ্ঘটনাত মুখ্য মন্ত্ৰী সোণোৱালে গভীৰ শোক প্ৰকাশ কৰিছে।
এক প্ৰেছ বিজ্ঞপ্তি যোগে মুখ্য মন্ত্ৰী সোণোৱালে দুৰ্ঘটনাত প্ৰাণ হেৰুৱা যাত্ৰী সকলৰ আত্মাৰ সদগতি কামনা কৰাৰ লগতে শোক সন্তপ্ত পৰিয়ালবৰ্গৰ প্ৰতি সহমৰ্মিতা প্ৰকাশ কৰে।
মুখ্য মন্ত্ৰীয়ে চিকিৎসালয়ত চিকিৎসাধীন হৈ থকা আহত যাত্ৰী সকলৰো আশু আৰোগ্য কামনা কৰিছে।
আনহাতে, সোণোৱালে পৰিবহন আয়ুক্ত বিৰেন্দ্ৰ মিট্টালক এই দুৰ্ঘটনাৰ তদন্ত কৰি চৰকাৰৰ ওচৰত প্ৰতিবেদন দাখিল কৰিবলৈ নিৰ্দেশ দিছে।
তদুপৰি, দুৰ্ঘটনাটোত আহত যাত্ৰী সকলৰ চিকিৎসাৰ বাবে প্ৰয়োজনীয় সকলো ব্যৱস্থা গ্ৰহণ কৰিবলৈ স্বাস্থ্য বিভাগৰ লগতে শিৱসাগৰ আৰু ডিব্ৰুগড় জিলাৰ উপায়ু্ক্ত দুগৰাকীক মুখ্য মন্ত্ৰী সোণোৱালে নিৰ্দেশ প্ৰদান কৰিছে।
উল্লেখযোগ্য যে, আজি ৰাতিপুৱা শিৱসাগৰৰ ডিমৌৰ থাওৰা দ’লৰ ৩৭ নং ৰাষ্ট্ৰীয় ঘাইপথত এখন দ্ৰুতবেগী আল্ট্ৰা বাছ আৰু এখন ট্ৰেভেলাৰৰ মাজত সংঘটিত হোৱা মুখামুখি সংঘৰ্ষত ৯ গৰাকী লোকৰ মৃত্যু হোৱা বুলি জিলা প্ৰশাসনৰ তৰফৰ পৰা সদৰী কৰা হৈছে। ইয়াৰ ভিতৰত ৭ গৰাকী লোকক ইতিমধ্যে চিনাক্ত কৰণ কৰা হৈছে।