দায়িত্বশীল ভাৱমূৰ্তিৰ বাবে থানাসমূহৰ সৰ্বাঙ্গিণ উন্নয়ন অভিযান আঁচনিৰ অধীনত নিৰ্মাণ কৰা অসমৰ ৭৩ খন থানাৰ ভিতৰত যোৰহাট জিলাৰ টীয়ক আৰক্ষী থানাৰ লগতে শিৱসাগৰ সদৰ আৰক্ষী থানা আৰু গোলাঘাট জিলাৰ সৰুপথাৰ আৰক্ষী থানা কেইখন আজি মুখ্যমন্ত্ৰী সৰ্বানন্দ সোণোৱালে টীয়ক আৰক্ষীথানাৰ পৰাই উদ্বোধন কৰে।
এই উদ্দেশ্যে আজি ১০৫ বছৰীয়া পুৰণি টীয়ক থানাত উপস্থিত হৈ উক্ত থানা উদ্বোধন কৰাৰ লগতে ডিজিটেল প্ৰক্ৰিয়াৰে আন দুখন থানাও উদ্বোধন কৰে মুখ্যমন্ত্ৰীগৰাকীয়ে।
উক্ত উদ্বোধনী অনুষ্ঠানত মুখ্যমন্ত্ৰীৰ লগতে ৰাজহ আৰু দুৰ্যোগ প্ৰশমন বিভাগৰ মন্ত্ৰী যোগেন মহন, লোকসভাৰ সাংসদ তপন গগৈ, ৰাজ্য সভাৰ সাংসদ কামাখ্যা প্ৰসাদ তাছা, বিধায়ক ৰেণুপমা ৰাজখোৱা, ভৱেন ভড়ালী, ৰূপজ্যোতি কুৰ্মী, ঋতুপৱন বৰুৱা, কৃষি বিপণণ পৰিষদৰ অধ্যক্ষ পালিত বৰা, আৰক্ষী সঞ্চালক প্ৰধান ভাস্কৰজ্যোতি মহন্ত প্ৰমুখ্যে বহু কেইগৰাকী বিশিষ্ট অতিথি উপস্থিত থাকে।
উদ্বোধনী অনুষ্ঠানত মুখ্যমন্ত্ৰী সোণোৱালে কয় যে আধুনিক বিশ্বৰ বিজ্ঞান প্ৰযুক্তি ব্যৱহাৰ কৰি অসম আৰক্ষীয়ে বিশেষ দক্ষতা প্ৰদৰ্শন কৰিছে।
আৰক্ষীৰ পূৰ্ণাংগ পৰ্যায়ৰ যোগ্যতা আহৰণৰ লক্ষ্যৰে মৈত্ৰীৰ দৰে আঁচনি ৰূপায়ণ কৰাৰ ফলত যোৱা চাৰি বছৰত অপৰাধ জনিত ঘটনা বহু নিয়ন্ত্ৰিত হৈছে। বৰ্তমান থানা সমূহ হৈ পৰিছে আস্থা আৰু বিশ্বাসৰ স্থান বুলিও তেওঁ কয়।
নৱনিৰ্মিত টীয়ক আৰক্ষী থানাৰ ভৱনটো উদ্বোধন কৰাৰ আগতে উজনি অসমৰ অন্যতম তীৰ্থক্ষেত্ৰ কাকজানৰ লাহদৈগড় স্থিত ঐতিহাসিক ঢেকীয়াখোৱা বৰনামঘৰৰ ১ কোটি ১০ লাখ টকাৰে নিৰ্মাণ কৰিব লগীয়া এটা ৰঙ্গমঞ্চৰ আধাৰশিলা স্থাপন কৰেl
ঐতিহাসিক ঢেকীয়াখোৱা বৰনামঘৰত অনুষ্ঠিত এক চমু সভাত মুখ্যমন্ত্ৰী সৰ্বানন্দ সোনোৱালে অংশগ্ৰহণ কৰেl ইয়াৰ পিছতে মুখ্যমন্ত্ৰী সৰ্বানন্দ সোনোৱালে টীয়কৰ ৰজাবাৰীস্থিত এটা বানপানীৰ শিবিৰত উপস্থিতিহৈ পৰিস্থিতীৰ বুজ লয়।
