ক’ৰ’না ভাইৰাছৰ সময়ত ঘোষণা কৰা ল’কডাউন সন্দৰ্ভত আজি শিৱসাগৰ জিলা প্ৰশাসনৰ লগত এক গুৰুত্বপূৰ্ণ বৈঠকত মিলিত হয় মুখ্য মন্ত্ৰী সৰ্বানন্দ সোণোৱাল।
শিৱসাগৰ জিলা উপায়ুক্তৰ কাৰ্য্যালয়ৰ চ্যুকাফা সভাক্ষত অনুষ্ঠিত এই বৈঠকত মুখ্য মন্ত্ৰী গৰাকীয়ে জনসাধাৰণক সামাজিক দূৰত্ব বজাই ৰাখিবলৈ আহ্বান জনায়।
স্বাস্থ্য বিভাগে ক’ৰ’না ভাইৰাছৰ সংক্ৰমণৰ পৰা হাত সাৰি থাকিবলৈ যিবিলাক পৰামৰ্শ দিছে সেইসমূহ মানি চলিবলৈ মুখ্যমন্ত্ৰীয়ে লগতে সকলোকে আহ্বান জনায়।
‘‘ক’ৰ’না ভাইৰাছৰ পৰা পৰিত্ৰাণ লভাৰ একমাত্ৰ উপায় হ’ল সামাজিক দূৰত্ব মানি চলা। যি কোনো কষ্টৰ বিনিময়ৰ হলেও জনসাধাৰণে সামাজিক দূৰত্ব মানি চলক,’’ সোণোৱালৰ আহ্বান।
‘‘আমাৰ সমাজখন যাতে ৰোগ মুক্ত হৈ থাকে তাৰ বাবে দেশৰ প্ৰধান মন্ত্ৰীয়ে যি ২১ দিনীয়া ল’কডাউন কাৰ্যসূচী ঘোষণা কৰিছে, তাক অসমৰ প্ৰতিটো পৰিয়ালৰ প্ৰতিজন ব্যক্তিক আন্তৰিকতা আৰু নিষ্ঠাৰে পালন কৰিবলৈ আহ্বান জনাইছো,’’ সোণোৱালে লগতে কয়।
এই লকডাউন কাৰ্যসূচীক প্ৰতিজন ব্যক্তিয়ে সমাজৰ মংগলৰ বাবে দায়িত্ব সহকাৰে পালন কৰাৰ লগতে চৰকাৰে বান্ধি দিয়া নীতি নিৰ্দেশনা মানি চলিবলৈ অনুৰোধ কৰে মুখ্যমন্ত্ৰীয়ে।
যিসকল ব্যক্তিয়ে চৰকাৰী নীতি-নিৰ্দেশনা উলংঘা কৰে চৰকাৰে সমাজৰ বৃহত্তৰ স্বাৰ্থৰ প্ৰতি লক্ষ্য ৰাখি সেই সকলৰ বিৰুদ্ধে কঠোৰ শাস্তিমূলক ব্যবস্থা লবলৈ বাধ্য হ’ব।
ল’কডাউনৰ সময়ত যাতে জনসাধাৰণে বাহিৰলৈ ওলাই আহিবলগীয়া নহয় তাৰ বাবে চৰকাৰ আৰু জিলা প্ৰশাসনে অত্যৱশ্যকীয় সামগ্ৰী প্ৰত্যেকৰ ঘৰে ঘৰে যোগান ধৰাৰ ব্যৱস্থা কৰিছে বুলিও সোণোৱালে জানিবলৈ দিয়ে।
স্বাস্থ্য বিভাগে সকলো জিলাতে উপাযুক্ত চিকিৎসা সেৱা প্ৰদান কৰিবলৈ ব্যৱস্থা কৰিছে বুলি তেওঁ জনায়।
বৈঠকত মুখ্য মন্ত্ৰীৰ লগতে মন্ত্ৰী যোগেন মহন, শিৱসাগৰ জিলা উপায়ুক্ত লক্ষ্মীনন্দন গগৈৰ লগতে বহু চৰকাৰী বিষয়া কৰ্মচাৰী উপস্থিত থাকে।