মুখ্য মন্ত্ৰী সৰ্বানন্দ সোণোৱালে আজি দুপৰীয়া মাজুলীৰ ভকত চাপৰিত ব্ৰহ্মপুত্ৰ বোৰ্ডে খহনীয়া প্ৰতিৰোধ আঁচনিৰ অধীনত কৰা জিঅ’ বেগ সংস্থাপন কাৰ্য পৰিদৰ্শন কৰে। মাজুলীৰ উপায়ুক্ত দেৱপ্ৰসাদ মিশ্ৰ আৰু ব্ৰহ্মপুত্ৰ বোৰ্ডৰ বিষয়া-অভিযন্তাক লগত লৈ মুখ্য মন্ত্ৰী গৰাকীয়ে নিমাতিঘাটৰ পৰা ৰ’-ৰ’ জাহাজেৰে আহি পোনে পোনে ভকত চাপৰি অংশত বোৰ্ডৰ কাম-কাজ চাবলৈ যায়।
পৰিদৰ্শনৰ পাছতে মুখ্য মন্ত্ৰী সোণোৱালে ব্ৰহ্মপুত্ৰ বোৰ্ডৰ আঁচনি ৰূপায়ণ কাৰ্যত হোৱা বিসংগতিক লৈ তীব্ৰ অসন্তুষ্টি প্ৰকাশ কৰে।
বিসংগতি সন্দৰ্ভত সাংবাদিকৰ আগত মুখ্য মন্ত্ৰী সোণোৱালে কয়, ‘ব্ৰহ্মপুত্ৰ বোৰ্ডৰ কামৰ গুণমান ভাল হোৱা নাই। সেয়ে ভকত চাপৰিত এনে অৱস্থা হৈছে। এই আঁচনিখনৰ নামত হোৱা গাফিলতি সহ্য কৰা নহ’ব। মই এই বিষয়ে লগে লগেই জৰুৰী ব্যৱস্থা গ্ৰহণৰ বাবে বোৰ্ডক নিৰ্দেশ দিছো’।
‘মই মাজুলীবাসীৰ প্ৰতিনিধি হিচাপে মাজুলীৰ ৰাইজৰ জীৱন-সম্পত্তিৰ সুৰক্ষাৰ দিশত যিকোনো পদক্ষেপ ল’বলৈ প্ৰস্তুত আছো। কোনোবা অভিযন্তাই কামত গাফিলতি কৰিছে যদি তেওঁলোকৰ বিৰুদ্ধে কঠোৰ ব্যৱস্থা গ্ৰহণ কৰিবলৈ মই ব্ৰহ্মপুত্ৰ বোৰ্ডৰ অধ্যক্ষক কৈছো। বোৰ্ডে কাম ভালদৰে কৰিবই লাগিব। ইয়াত ফাঁকি মাৰিলে নহ’ব।’
উল্লেখ্য যে মুখ্য মন্ত্ৰীগৰাকীৰ নিৰ্দেশত ইতিমধ্যে বোৰ্ডৰ অধ্যক্ষ ৰাজীৱ যাদৱে নতুন দিল্লীৰ পৰা যোৱা ৯ মে’ত ভকত চাপৰিলৈ আহি ক্ষতিগ্ৰস্ত অংশ পৰিদৰ্শন কৰি যায়।
