মুখ্য মন্ত্ৰী সৰ্বানন্দ সোণোৱালে ২০ ডিচেম্বৰত জনতা ভৱনস্থিত সভাকক্ষত হস্ততাঁত আৰু বস্ত্ৰ শিল্প, ৰেচম বিভাগৰ কাম-কাজৰ পৰ্যালোচনা কৰাৰ উদ্দেশ্যে এক বৈঠকত অংশগ্ৰহণ কৰে।
বৈঠকত ৫০ হাজাৰ পুৰুষ-মহিলাক হস্ততাঁতৰ প্ৰশিক্ষণ প্ৰদান, মাজুলী আৰু মৰাণত নিৰ্মাণৰত আদৰ্শ গাঁৱৰ নিৰ্মাণ কাৰ্য্যৰ অগ্ৰগতিৰ পৰ্যালোচনা কৰে।
আনহাতে, ৰেচম বিভাগৰ নৰ্থ-ইষ্ট ৰিজন টেক্সটাইল প্ৰমোশ্যন স্কীম ৰূপায়ণৰো পৰ্যালোচনা কৰে।
বৈঠকত ঢকুৱাখানা, ডিমৌ, বিহালী, দুধনৈ আৰু মৰিগাঁৱত স্থাপন কৰিবলগীয়া আদৰ্শ ৰেচম গাঁও সম্পৰ্কটো আলোচনা কৰা হয়।
তদুপৰি, বৈঠকতে এন ই চি প্ৰকল্প আৰু ভাৰত চৰকাৰৰ দ্বাৰা ৰূপায়িত আঁচনি সম্পৰ্কতো বিতংভাৱে পৰ্যালোচনা কৰা হয়।
বৈঠকত মুখ্য মন্ত্ৰীয়ে হস্ততাঁত আৰু বস্ত্ৰ শিল্প, ৰেচম বিভাগৰ হিতাধিকাৰী সকল যাতে উপকৃত হ’ব পাৰে তাৰ বাবে বিভাগক সময় নিৰ্দ্ধাৰিত ভাৱে আঁচনি সমূহ ৰূপায়ণ কৰাৰ বাবে নিৰ্দেশ দিয়ে।
আনহাতে, সংখ্যালঘূ কল্যাণ আৰু উন্নয়ন বিভাগৰ আন এক বৈঠকো ২০ ডিচেম্বৰতে মুখ্য মন্ত্ৰীৰ উপস্থিতিত অনুষ্ঠিত হয়।
বৈঠকত সংখ্যালঘূ এলেকাত আদৰ্শ আৱাসিক বিদ্যালয় নিৰ্মাণৰ বিষয়টোও খৰচি মাৰি আলোচনা কৰা হয়।