ৰাজ্যখনৰ কৃষকসকলক কৃষি কৰ্মৰ বাবে বৰ্দ্ধিত সুবিধা প্ৰদানৰ লক্ষ্যৰে জলসিঞ্চন বিভাগে কেন্দ্ৰীয় চৰকাৰৰ প্ৰধানমন্ত্ৰী কৃষি সিঞ্চাই যোজনাৰ অধীনত শীঘ্ৰে ৰূপায়ন কৰিব অভিলাষী জলসিঞ্চন আঁচনি ‘হৰ খেত ক’ পানী’।
প্ৰথম পৰ্যায়ত ৰাজ্যখনৰ ১৪ খন জিলাত ৰূপায়ন কৰিবলগীয়া এই আঁচনিয়ে ১.৪০ লাখ কৃষি ভূমি সামৰি ল’ব। ৪৭৭৯ টা বৈদ্যুতিক আৰু সৌৰক্তি চালিত গভীৰ নলীনাদ সংস্থাপনৰ লক্ষ্য নিৰ্দ্ধাৰণ কৰা এই আঁচনিয়ে ১৯ হাজাৰৰো অধিক কৃষক পৰিয়ালক উপকৃত কৰিব।
মুখ্য মন্ত্ৰী সৰ্বানন্দ সোণোৱালে জলসিঞ্চন বিভাগৰ আঁচনি ৰূপায়নৰ অগ্ৰগতি পৰ্যালোচনা কৰি প্ৰস্তাৱিত কেন্দ্ৰীয় আঁচনিখনৰ সফল ৰূপায়নৰ বাবে উপযুক্ত পৰিকল্পনাৰে আগবাঢ়িবলৈ বিভাগক নিৰ্দেশ দিয়ে।
আজি মুখ্য মন্ত্ৰীৰ সভাকক্ষত অনুষ্ঠিত বৈঠকত সোণোৱালে জলসিঞ্চন বিভাগক অধিক জনমুখী কৰি তুলি কৃষকৰ ওচৰ চপাই নিবলৈ বিভাগটোৰ বিষয়াসকলক কেইবালানিও পৰামৰ্শ আগবঢ়ায়।
সোণোৱালে কয় যে প্ৰধানমন্ত্ৰী নৰেন্দ্ৰ মোদীয়ে কৃষকৰ সন্মান আৰু আৰ্থিক সামৰ্থ বৃদ্ধিৰ লক্ষ্যৰে একাধিক আঁচনি গ্ৰহণ কৰিছে। এই আঁচনিসমূহৰ ভিতৰত ‘হৰ খেত ক’ পানী’ অন্যতম।
জলসিঞ্চন বিভাগ কৃষকৰ সৈতে জড়িত বিভাগ হিচাপে এই বিভাগৰ অভিযন্তা আৰু ক্ষেত্ৰ কৰ্মীসকলে কৃষকসকলৰ সৈতে গভীৰ সম্পৰ্ক গঢ়ি তুলিব লাগিব বুলি উল্লেখ কৰি সোণোৱালে অভিযন্তাসকলক প্ৰতি ১৫ দিনৰ মূৰে মূৰে কৃষকসকলৰ সৈতে মত বিনিময় কৰি কৃষকসকলৰ সমস্যা সমূহ বুজি উঠি প্ৰয়োজনীয় পদক্ষেপ গ্ৰহণ কৰিবলৈ কয়।
মুখ্য মন্ত্ৰীয়ে আঁচনি ৰূপায়নৰ অগ্ৰগতি সম্পৰ্কে চৰজমিন পৰ্যবেক্ষণৰ উপৰি নিয়মীয়া পৰ্যালোচনা বৈঠক অনুষ্ঠিত কৰাৰ পোষকতা কৰি এই ক্ষেত্ৰত মন্ত্ৰী ভৱেশ কলিতাক পদক্ষেপ গ্ৰহণ কৰিবলৈ কয়।
আনহাতে, মুখ্য মন্ত্ৰী সোণোৱালে ৰূপায়িত হৈ থকা বা প্ৰস্তাৱিত প্ৰতিখন আঁচনিৰ নাম, ৰূপায়নকাৰী ঠিকাদাৰ বা সংস্থা তথা অনুমোদিত ধন ৰাশি বিজ্ঞাপন আকাৰে প্ৰকাশ কৰি ৰাইজৰ মাজলৈ প্ৰতিখন আঁচনিৰ বাৰ্তা লৈ যাবলৈ বিভাগক নিৰ্দেশ দিয়ে।
আজিৰ পৰ্যালোচনা বৈঠকত জলসিঞ্চন বিভাগৰ ৰাজ্যিক স্বতন্ত্ৰ মন্ত্ৰী ভৱেশ কলিতা, মুখ্য মন্ত্ৰীৰ প্ৰধান সচিব সঞ্জয় লোহিয়া, জলসিঞ্চন বিভাগৰ সচিব ৰাকেশ কুমাৰ, বিভাগৰ দুয়োগৰাকী মুখ্য অভিযন্তা প্ৰমুখ্যে জেষ্ঠ বিষয়াসকল উপস্থিত থাকে।