মুখ্য মন্ত্ৰী সৰ্বানন্দ সোণোৱালে শুকুৰবাৰে গোৱালপাৰা জিলাৰ বানপীড়িত অঞ্চল ভ্ৰমণ কৰি বানপীড়িত ৰাইজৰ পৰিস্থিতিৰ বুজ লয়।
শুকুৰবাৰে গোৱালপাৰা জিলা ভ্ৰমণৰ সময়ত মুখ্য মন্ত্ৰী সোণোৱালে আগিয়া বালিজানা ছোৱালী উচ্চ মাধ্যমিক বিদ্যালয় আৰু দ্বাৰকা প্ৰাথমিক বিদ্যালয়ত স্থাপন কৰা অস্থায়ী আশ্ৰয় শিৱিৰ পৰিদৰ্শন কৰি তাত আশ্ৰয় গ্ৰহণ কৰা শিশুসকলৰ লগতে অন্যান্য আৱাসীসকলৰ সৈতে মত-বিনিময় কৰে।
শিবিৰ দুটাত আশ্ৰয় গ্ৰহণ কৰা লোকসকললৈ পৰ্যাপ্ত আৰু উন্নত মানৰ খাদ্য, খোৱাপানী, চিকিৎসা আদি সা-সুবিধা আগবঢ়াবলৈ জিলা উপায়ুক্তক মুখ্য মন্ত্ৰীয়ে নিৰ্দেশ দিয়ে।
যিহেতু সামাজিক দূৰত্ব কোভিড-১৯ক পৰাভূত কৰাৰ মূল অস্ত্ৰ হিচাপে বৰ্তমানলৈ পৰিগণিত হৈছে সেয়ে আশ্ৰয় শিৱিৰসমূহতো কঠোৰ ৰূপত সামাজিক দূৰত্ব বাহাল ৰখাতো জিলা প্ৰশাসনে সুনিশ্চিত কৰিব লাগিব বুলি সোণোৱালে লগতে কয়।
মুখ্য মন্ত্ৰীয়ে স্থানীয় সংহত শিশু উন্নয়ন প্ৰকল্পৰ কাৰ্যালয়ো ভ্ৰমণ কৰে আৰু আশ্ৰয় শিৱিৰসমূহত থকা শিশুসকলৰ বাবে গ্ৰহণ কৰা ব্যৱস্থাৱলীৰ বুজ লয়।
তেওঁ আশাকৰ্মীসকলৰ সৈতেও মত-বিনিময় কৰে আৰু বান-খহনীয়াৰ লগতে কোভিড-১৯ৰ সময়ত ৰাজ্যখনলৈ আগবঢ়োৱা নিস্বাৰ্থ সেৱাৰ বাবে শলাগ লয়।
