অসম আৰু মিজোৰামৰ মাজত সীমা বিবাদ তুংগত থকাৰ সময়তে অসম তথা মিজোৰামৰ মুখ্যমন্ত্ৰীদ্বয়ক দিল্লীলৈ মাতি পঠিয়ালে কেন্দ্ৰীয় গৃহমন্ত্ৰী অমিত শ্বাহে।
কাইলৈ দুয়োখন ৰাজ্যৰ মুখ্যমন্ত্ৰীদ্বয়ে দিল্লীত উপস্থিত হৈ সীমা বিবাদ নিষ্পত্তিৰ বাবে গৃহ মন্ত্ৰী শ্বাহৰ সৈতে বৈঠকত মিলিত হ’ব বুলি জানিব পৰা গৈছে।
উল্লেখ্য কেন্দ্ৰীয় গৃহ সচিবৰ নিৰ্দেশ অনুসৰি আজি অসম তথা মিজোৰামৰ মুখ্য সচিব দ্বয়ে দিল্লীত উপস্থিত হৈ বিশেষ বৈঠকত মিলিত হৈছে।
সীমা সমস্যাৰ আশু সমাধান সূত্ৰ বিচাৰি আজি কেন্দ্ৰীয় গৃহ দপ্তৰে অসম তথা মিজোৰামৰ দুই মুখ্য সচিবক দিল্লীলৈ মাতি পঠিয়ায়।
সেইমৰ্মে অসমৰ মুখ্য সচিব জিষ্ণু বৰুৱাই পুৱাই দিল্লীলৈ উৰা মাৰে।
কেন্দ্ৰীয় গৃহ সচিব অজয় কুমাৰ ভাল্লাৰ নিৰ্দেশ অনুসৰি মিজোৰামৰ মুখ্য সচিব লালনুনমাৱিয়া চৌংগয়ো দিল্লীলৈ গৈছে।
উল্লেখ্য অসম-মিজোৰাম সীমান্তত মিজো আৰক্ষীৰ গুলীত এতিয়ালৈকে ছজন আৰক্ষীৰ জোৱান আৰু এজন সাধাৰণ নাগৰিকৰ মৃত্যু ঘটিছে।
সীমান্তত এতিয়াও পৰিস্থিতি জটিল হৈয়ে আছে।
সীমা বিবাদ নিষ্পত্তিৰ বাবে অসমৰ মুখ্যমন্ত্ৰী হিমন্ত বিশ্ব শৰ্মাই কেন্দ্ৰীয় গৃহ মন্ত্ৰী অমিত শ্বাহৰ হস্তক্ষেপ কামনা কৰিছিল। ইয়াৰ পিছতে কেন্দ্ৰীয় গৃহ সচিবে দুই ৰাজ্যৰ মুখ্য সচিব দুগৰাকীক দিল্লীলৈ মাতি পঠিয়ায়।
ইপিনে সীমান্তত গুলীচালনাৰ ঘটনাটোকলৈ মিজোৰামে এতিয়াও অসমকে দোষাৰোপ কৰি আহিছে।
