ক’ৰ’না মহামাৰীৰ সংক্ৰমণে অসমৰ বিভিন্ন প্ৰান্তৰ জন জীৱনক প্ৰভাৱিত কৰি তুলিছে।
ক’ৰ’নাৰ সংক্ৰমণৰ বাবে অধিক সংখ্যক কাম-কাজ বন্ধ হৈ থকাৰ বাবে দিন হাজিৰা কৰা লোক, খেতিয়ককে ধৰি তেওঁলোকৰ পৰিয়ালৰ লোক সকল আৰ্থিক দৈন্যতাৰ সন্মুখিন হ’বলগীয়া হৈছে।
মঙলবাৰে ৰাজ্যৰ এটা পৰিয়ালে আৰ্থিক দৈন্যতাৰ বাবে নিজ সন্তানক বিক্ৰী কৰিবলগীয়া হোৱা ঘটনা পোহৰলৈ আহিছে।
ক’ৰ’না মহামাৰী আৰু বানপানীয়ে সৰ্বশ্ৰান্ত কৰা পৰিয়াল বোৰৰ আৰ্থিক দৈন্যতাৰ প্ৰতি লক্ষ্য ৰাখি মানৱ দেহ সৰবৰাহকাৰী সকলে নিজৰ কুচ-কাৱাজ বৃদ্ধি কৰিছে।
কোকৰাঝাৰ জিলাৰ কচুগাঁও জিলাৰ এছ বসুমতাৰী নামৰ লোকজনে অলপতে গুজৰাটৰ পৰা উভতি আহিছিল।
ক’ৰ’নাৰ বাবে তেওঁ নিজৰ কাম হেৰুৱাইছিল আৰু খালী পকেট লৈ নিজ গৃহলৈ উভতি আহিবলগীয়া হৈছিল।
নিজৰ ঘৰখন চলাবৰ বাবে তেওঁ নিজৰ গাঁৱতো কোনোধৰণৰ কৰ্মৰ সন্ধান লাভ কৰা নাছিল।
তেওঁৰ ঘৰত নিজ পত্নীৰ লগতে এটা দুবছৰীয়া সন্তান আৰু এটা চাৰিমহীয়া সন্তান আছিল।
সেই সময়তে এগৰাকী মহিলাই তেওঁলোকৰ ওচৰ চাপে আৰু তেওঁলোকে নিজৰ চাৰিমহীয়া সন্তানটোক কাৰ্বি আংলঙত বিক্ৰী কৰি দিয়ে।
মহিলা গৰাকীয়ে শিশুটোক লৈ যোৱাৰ বাবদ পৰিয়ালটোৰ পিতৃ-মাতৃৰ হাতত ৪৫,০০০ টকা অৰ্পন কৰে।
আনহাতে, সন্তানটোৰ মাতৃয়ে এই দুখ সহ্য কৰিব নোৱাৰি ঘটনা সন্দৰ্ভত কচুগাঁও আৰক্ষীক খবৰ দিয়ে আৰু আৰক্ষীয়ে সন্তানটোৰ পিতৃক আটক কৰে।
আৰক্ষীয়ে পিতৃ গৰাকীৰ ভাষ্যৰ ভিত্তিত কোকৰাঝাৰ চহৰৰ পৰা শিশুটিক উদ্ধাৰ কৰে আৰু মাতৃৰ হাতত তুলি দিয়ে।
শিশু সৰবৰাহৰ ঘটনাৰ লগত জড়িত সকলো লোকক আৰক্ষীয়ে গ্ৰেপ্তাৰ কৰিবলৈ সক্ষম হৈছে।