আজি দুটিকৈ শিশু সন্ধানহীন হোৱা ঘটনাই সমগ্ৰ মাৰ্ঘেৰিটা মহকুমাতে চাঞ্চল্যৰ সৃষ্টি কৰিছে।
প্ৰাপ্ত খবৰ অনুসৰি তিনিচুকীয়া জিলাৰ মাৰ্ঘেৰিটা মহকুমাৰ লেখাপানী আৰক্ষী থানাৰ অন্তৰ্গত খাৰাংকং গাঁৱৰ দুজন শিশু নিৰুদ্দেশ হয়।
আজি দুপৰীয়া ঘৰৰ কাষতে খেলি থকা অৱস্থাত নিৰুদ্দেশ হোৱা দুই কণমানি শিশু ক্ৰমে দেৱজিত শইকীয়াৰ পুত্ৰ কপিল শইকীয়া(৭) আৰু কৃষ্ণ কান্ত সন্দিকৈৰ পুত্ৰ বিতোপন সন্দিকৈ(৮) ওৰফে বিপ্লৱ ।
পৰিয়ালৰ লোকে দুই কণমানিৰ সন্ধানত সমগ্ৰ গাঁওতে বিচাৰ খোচাৰ কৰে যদিও সন্ধ্যালৈকে দুই শিশুৰ সন্ধান নোপোৱাতে পৰিয়ালৰ লগতে সমগ্ৰ গাওঁখনৰ লোক চিন্তিত হৈ পৰিছে।
ঘৰৰ কাষৰ পৰাই কাণসমনীয়া দুই শিশু খেলি থকা অৱস্থাত কি পৰিস্থিতি সন্ধানহীন হ’ল সেই সম্পৰ্কে বাতৰি লিখা সময়লৈকে জানিব পৰা হোৱা নাই।
দুই শিশুৰ সন্ধান লাভ নকৰাত পৰিয়ালৰ লোকে ইতিমধ্যেই লেখাপানী আৰক্ষী থানাত খবৰ দিয়াত আৰক্ষীয়ে সমগ্ৰ ঘটনাৰ অনুসন্ধান আৰম্ভ কৰিছে।
অন্যহাতে যদি কোনোবা সদাশয় ব্যক্তিয়ে এই শিশু দুজনৰ কিবা খবৰ বা তথ্য লাভ কৰে তেন্তে অতি শীঘ্ৰে স্থানীয় আৰক্ষী থানা অথবা 9101656963 নম্বৰত যোগাযোগ কৰিবলৈ পৰিয়ালৰ তৰফৰ পৰা অনুৰোধ জনাইছে ।
