তথাকথিত পৰিৱৰ্তনৰ ঢৌৱে স্পৰ্শ নকৰা মুখ্য মন্ত্ৰীৰ নিজা সমষ্টি মাজুলীৰ বাট-পথৰ দুৰৱস্থাক লৈ বাতৰি পৰিৱেশিত হৈ আহিছে যদিও চৰকাৰৰ সুদৃষ্টি এতিয়াও পৰা নাই।
বাট-পথৰ শোচনীয় অৱস্থাত ৰোগীৰ পৰা, কণ কণ ছাত্ৰ-ছাত্ৰীয়ে নৈমিত্তিক দুৰ্ভোগ ভুগি থাকিব লগীয়া হৈছে।
কেইদিন মানৰ পূৰ্বে ঠেলাত গৰ্ভৱতী মহিলাক নিয়াৰ এটা দৃশ্যই বাতৰিৰ শিৰোনাম দখল কৰাৰ পিছত মুখ্য মন্ত্ৰীৰ সমষ্টিটোৰে এক নং বৰ নলনি নামৰ গাঁওখনত দেখা গৈছে কণ কণ শিশুৱে একাঁঠু বোকাৰে ভৰা পথৰ ওপৰেৰে বিদ্যালয়লৈ যোৱা দৃশ্য।
গাঁওখন ৰঙাচাঁহী গাঁও পঞ্চায়তৰ আন্তর্গত আৰু বিদ্যালয়খনৰ নাম ভোলাচুক নলনি প্ৰাথমিক বিদ্যালয়।
একাঁঠু বোকা গচকি দৈনিক কণ কণ ছাত্ৰ-ছাত্ৰীসকল বিদ্যা আহৰণৰ বাবে যাব লগীয়া হয় যদিও চৰকাৰ আৰু প্ৰশাসনৰ কোনো পৰিকল্পনা নাই পথটো আৰু ছাত্ৰ-ছাত্ৰীসকলৰ সমস্যাক লৈ।
বৃহৎ অঞ্চলটোৰ আন আন লোকসকলেও একেই দুৰ্ভোগৰ মাজেৰে আহ-যাহ কৰিব লগীয়া হয়।
২০১৮ চনৰ ২ জুলাইত বিজেপিৰ সকলো বিধায়কৰ সৈতে গড়কাপ্টানী বিভাগ আৰু বিভাগীয় মন্ত্ৰী হিমন্ত বিশ্বৰ এখন পৰ্য্যালোচনা বৈঠক অনুষ্ঠিত হৈছিল, য’ত মুখ্য মন্ত্ৰীও উপস্থিত আছিল।
উক্ত বৈঠকত গড়কাপ্টানী বিভাগে সকলো বিধায়কক তেওঁলোকৰ সমষ্টিত নিৰ্মাণ আৰু মেৰামতি কৰিব লগীয়া বাট-পথবোৰৰ তালিকা দিবলৈ নিৰ্দেশ দিছিল।
পৰ্যালোচনা বৈঠকৰ অন্তত তাত উপস্থিত থকা মুখ্য মন্ত্ৰী সৰ্বানন্দ সোণোৱালে অসমৰ ৩৩খন জিলাৰ প্ৰতিটো সমষ্টিৰ ৰাস্তা-পদূলি আধুনিক ৰূপত নিৰ্মাণ কৰাৰ বাবে চৰকাৰে ব্যৱস্থা গ্ৰহণ কৰা বুলি জানিবলৈ দিছিল।
মুখ্য মন্ত্ৰীৰ ভাষ্যটো আছিল,- “যাতায়াত আৰু যোগাযোগ ব্যৱস্থা শক্তিশালী ৰূপত গঢ় দিয়াটো এইখন চৰকাৰৰ মূল উদ্দেশ্য। কাৰণ যাতায়াত আৰু যোগাযোগ ব্যৱস্থা শক্তিশালী হ’লেহে অৰ্থনীতি, শিক্ষা, বাণিজ্য আদি সকলো দিশত এখন সমাজ আগবাঢ়ি যাব পাৰে।” তেওঁ লগতে কয়, “২০২০ চনৰ ভিতৰত ৰাজ্যখনৰ সকলো প্ৰধান পথ পকী কৰা হ’ব। এই ক্ষেত্ৰত বিধায়কসকলে গুৰুত্বপূৰ্ণ ভূমিকা ল’ব লাগিব।”
উক্ত বৈঠকত বিভাগীয় মন্ত্ৰী হিমন্ত বিশ্বই কৰা ঘোষণামতে, যোৱা বছৰৰ বাৰিষাৰ পিছতে সকলো বাট-পথৰ নিৰ্মাণ আৰু মেৰামতিৰ কাম কৰাৰ কথা আছিল।
কিন্তু এই সকলোবোৰ কেৱল ঘোষণা আৰু ৰাজনৈতিক চমক হৈয়ে যে থাকিল ৰাজ্যখনৰ বাট-পথৰ অৱস্থাই প্ৰমাণ কৰে।
