শিৱসাগৰৰ এজাক শিশুই ঘৰে ঘৰে সংগ্ৰহ কৰা বান সাহায্য জমা দিলে উপায়ুক্তক

ৰাজ্যৰ কিছু কিছু অঞ্চলত বান পৰিস্থিতি স্বাভাৱিক অৱস্থালৈ ঘূৰি আহিছে যদিও শেহতীয়াকৈ ভূটানৰ পৰা নামি অহা পানীয়ে ৰুদ্ৰমূৰ্তি ধাৰণ কৰিছে নামনি অসমৰ বিভিন্ন জিলাত। প্ৰলয়ংকাৰী বানে ঘৰ-দুৱাৰ, খাদ্য বস্তুৰ লগতে পশুধন  হেৰুৱাই ক্ষতিগ্ৰস্ত হোৱা বন্যাৰ্তৰ বাবে আগবাঢ়ি আহিল শিৱসাগৰৰ এজাক শিশু।

শিৱসাগৰ জিলাৰ ন-পাম চামগুৰি শিশু সমাজৰ একাংশ শিশুৱে বান সাহায্যৰ বাবে গাঁৱৰ প্ৰতিঘৰ মানুহৰ পৰা সংগ্ৰহ কৰা সমস্ত ধন আজি শিৱসাগৰ জিলাৰ উপায়ুক্ত এছ লক্ষ্ণণৰ ওচৰত জমা দিয়ে। ধন লোৱাৰ সময়ত আৱেগিক হৈ পৰা উপায়ুক্ত গৰাকীয়ে শিশুসকলক অশেষ ধন্যবাদ জনায়।

ইয়াৰ উপৰি উপায়ুক্ত গৰাকীয়ে এই সমগ্ৰ ধনৰাশি মুখ্য মন্ত্ৰীৰ বান সাহায্য পুঁজিৰ যোগে বানাক্ৰান্ত ৰাইজক প্ৰদান কৰাৰ প্ৰতিশ্ৰুতি প্ৰদান কৰে।

শিৱসাগৰবাসী ৰাইজৰ প্ৰশংসাৰ পাত্ৰ হোৱা এই শিশুসকলৰ বান সাহায্য সংগ্ৰহ কৰা কাৰ্যসূচীত অঞ্চলটোৰ ৰাইজৰ লগতে নৱ উদ্দিত নামৰ এটা স্বেচ্ছাসেৱী অনুষ্ঠানে সহযোগিতা আগবঢ়াইছিল।