২০২৫ চনতো চীনৰ জনসংখ্যা হ্ৰাস পাইছে। ইয়াকে লৈ একেৰাহে চতুৰ্থবাৰৰ বাবে দেশখনৰ জনসংখ্যা হ্ৰাস পাইছে। চীন চৰকাৰৰ তথ্যত এই ছবিখন পোহৰলৈ আহিছে।
জন্মৰ হাৰ অভিলেখ পৰিমানে নিম্ন স্তৰলৈ নামি অহাৰ লগে লগে ভৱিষ্যতে এই পৰিস্থিতি আৰু বেয়া হ’ব পাৰে বুলি বিশেষজ্ঞসকলে আশংকা কৰিছে।
চৰকাৰী তথ্য অনুসৰি চীনৰ জনসংখ্যা ৩৩ লাখ ৯০ হাজাৰ হ্ৰাস পাই ১৪০ কোটি ৫০ লাখ হৈছে। ইয়াত কোৱা হৈছে যে ২০২৫ চনত মাত্ৰ ৭৯ লাখ ২০ হাজাৰ শিশুৰ জন্ম হৈছে যিটো ২০২৪ চনৰ তুলনাত ১৭ শতাংশ কম।
চীন চৰকাৰৰ পৰিসংখ্যা অনুসৰি ২০২৪ চনৰ তুলনাত ২০২৫ চনত মৃত্যুৰ সংখ্যা প্ৰায় ১কোটি ১৩ লাখ বৃদ্ধি পাইছে, যিটো ১৯৬৮ চনৰ পিছত সৰ্বাধিক। প্ৰতি ১০০০ জনত জন্মৰ হাৰ ৫.৬৩ শতাংশলৈ হ্ৰাস পাইছে।
উইচকনচিন-মেডিচন বিশ্ববিদ্যালয়ৰ এজন বিশেষজ্ঞই কয় যে ২০২৫ চনত জন্মৰ হাৰ ১৭৩৮ চনৰ স্তৰৰ ওচৰ চাপিছে, সেই সময়ত চীনৰ মুঠ জনসংখ্যা আছিল মাত্ৰ ১৫ কোটি।
বৃদ্ধ লোকৰ সংখ্যা বৃদ্ধি আৰু অৰ্থনীতিৰ প্ৰত্যাহ্বান
২০২২ চনৰ পৰা চীনৰ জনসংখ্যা হ্ৰাস পাবলৈ আৰম্ভ কৰিছে আৰু মানুহৰ বয়স দ্ৰুতগতিত বৃদ্ধি পাইছে।
চৰকাৰী তথ্য অনুসৰি চীনৰ ২৩ শতাংশ জনসংখ্যা এতিয়া ৬০ বছৰৰ ওপৰত। ২০৩৫ চনৰ ভিতৰত এই সংখ্যা ৪০ কোটি হ’ব। ফলত এক বিশাল কৰ্মশক্তিয়ে কৰ্মক্ষেত্ৰ এৰিব, যাৰ ফলত পেঞ্চনৰ বাজেটৰ ওপৰত বৃহৎ চাপ পৰিব।
এই চাপৰ সৈতে মোকাবিলা কৰিবলৈ চীন চৰকাৰে ইতিমধ্যে পুৰুষৰ অৱসৰৰ বয়স ৬৩ আৰু মহিলাৰ ৫৮ বছৰলৈ বৃদ্ধি কৰিছে।
বিয়াত অনিহা আৰু এক সন্তান নীতিৰ প্ৰভাৱ
চীনত জন্মৰ হাৰ হ্ৰাস পোৱাৰ এটা প্ৰধান কাৰণ হ’ল বিবাহৰ সংখ্যা হ্ৰাস। ২০২৪ চনত বিবাহৰ হাৰ অভিলেখ ২০ শতাংশ হ্ৰাস পাইছিল। কিন্তু ২০২৫ চনত নিয়ম শিথিল হোৱাৰ পিছত (যিকোনো ঠাইতে বিবাহ পঞ্জীয়ন) বছৰৰ শেষৰ ফালে বিবাহৰ হাৰ কিছু বৃদ্ধি পাবলৈ ধৰিলে।
চীনৰ দীৰ্ঘদিনীয়া “এক সন্তান নীতি” (১৯৮০ৰ পৰা ২০১৫) মানুহৰ পাৰিবাৰিক আৰু সামাজিক চিন্তাধাৰাত স্থায়ী পৰিৱৰ্তন আনিছে, যিটোৱে এতিয়া জন্মৰ হাৰ বৃদ্ধিৰ ক্ষেত্ৰত বাধাৰ সৃষ্টি কৰিছে।
নতুন চৰকাৰী পৰিকল্পনা
চহৰ অঞ্চল আৰু জীৱন-যাপন ব্যয়বহুল হোৱাৰ বাবে এতিয়া মানুহৰ সন্তান জন্ম দিয়াৰ প্ৰতি আগ্ৰহ কম। এই সমস্যাৰ সমাধানৰ বাবে চীনে বৃহৎ অৰ্থনৈতিক পৰিকল্পনা হাতত লৈছে। ৰয়টাৰৰ তথ্য অনুসৰি চীনে এই বছৰ জন্মৰ হাৰ বৃদ্ধি কৰিবলৈ প্ৰায় ২৫.৮ বিলিয়ন ডলাৰ ব্যয় কৰিব পাৰে।
নতুন চৰকাৰী পদক্ষেপৰ ভিতৰত আছে ৰাষ্ট্ৰীয় শিশু ভাট্টা, যিটো যোৱা বছৰৰ পৰা আৰম্ভ হৈছে। চৰকাৰে ঘোষণা কৰিছে যে ২০২৬ চনৰ পৰা আইভিএফ প্ৰক্ৰিয়াকে ধৰি গৰ্ভৱতী মহিলাৰ সকলো চিকিৎসা খৰচ ৰাজ্যিক বীমাৰ দ্বাৰা আদায় দিয়া হ’ব।
বৰ্তমান চীনত প্ৰতিগৰাকী মহিলাৰ বাবে এটাকৈ সন্তান আছে, যিটো বিশ্বৰ ভিতৰতে সৰ্বনিম্ন দেশসমূহৰ ভিতৰত অন্যতম।
বিশেষজ্ঞসকলে কয় যে যদি বৰ্তমানৰ ধাৰা অব্যাহত থাকে তেন্তে শতিকাৰ শেষলৈকে সন্তান জন্ম দিয়াৰ ক্ষমতাসম্পন্ন মহিলাৰ সংখ্যা তিনি চতুৰ্থাংশ হ্ৰাস পাই ১০ কোটিতকৈও কম হ’ব পাৰে।
