যোৱা কেইসপ্তাহমানৰ ভিতৰত মধ্যপ্ৰাচ্যত সংঘটিত হৈছে এক নাটকীয় পৰিঘটনা।
উল্লেখ্য যে ৭ বছৰৰ পূৰ্বে ভাঙি পৰিছিল ইৰান আৰু চৌদি আৰৱৰ মাজত থকা ঘনিষ্ঠ সম্পৰ্ক। কিন্তু ৭ বছৰৰ মূৰত আকৌ প্ৰাণ পাই উঠিছে ইৰান আৰু চৌদি আৰৱৰ বন্ধুত্বই। কিন্তু আটাইতকৈ লক্ষ্যনীয় কথাটো হ’ল এই দুই ৰাষ্ট্ৰৰ মাজত বন্ধুত্ব ঘূৰাই অনাৰ ক্ষেত্ৰত মধ্যস্থতাকাৰীৰ ভূমিকা গ্ৰহণ কৰা ৰাষ্ট্ৰখন আমেৰিকা নহয়। চৌদি আৰৱ আৰু ইৰানৰ মাজত পুনৰ সম্পৰ্ক স্থাপনৰ মধ্যস্থতাকাৰীৰ ভূমিকা গ্ৰহণ কৰা ৰাষ্ট্ৰখন হৈছে চীন।
উল্লেখ্য যে যোৱা ১০ মাৰ্চত বেইজিঙত অনুষ্ঠিত হোৱা এখন সন্মিলনত চীনৰ শীৰ্ষ কুটনীতিবিদ ৱাং য়ীৰ লগত উপস্থিত আছিল চৌদি আৰৱ আৰু ইৰানৰ প্ৰতিনিধি বিষয়া। তাতেই ৱাং য়ীয়ে দেশ দুখনৰ মাজত পুনৰ বৈদেশিক সু-সম্পৰ্ক গঢ়ি তোলাৰ প্ৰস্তাৱ দিয়ে। ইয়াৰ পিছতেই ৰাষ্ট্ৰ দুখনৰ মাজত সম্পৰ্ক গঢ়ি তোলাৰ বাবে তীব্ৰ গতিৰে কাম হাতত লোৱা হয়।
ফলস্বৰূপে বৃহস্পতিবাৰে বেইজিঙত ছৌদি আৰৱৰ বৈদেশিক মন্ত্ৰী ৰাজকুমাৰ ফৈছাল বিন ফাৰহান আৰু ইৰানৰ বৈদেশিক মন্ত্ৰী হোছেইন আমিৰ আব্দুল্লাহিয়ানৰ মাজত হোৱা বৈঠকত সিদ্ধান্ত গ্ৰহণ কৰা হয় যে দুমাহৰ ভিতৰত তেহৰাণ আৰু ৰিয়াদৰ মাজত দূতাবাস আৰু যাত্ৰীবাহী বিমান মুকলি কৰা হ’ব।
আনকি ইৰানৰ ৰাষ্ট্ৰপতি ৰাইচীয়ে ছৌদি আৰব ভ্ৰমণৰ বাবে চৌদি আৰৱৰ ৰজা ছলমানৰ পৰা নিমন্ত্ৰণ লাভ কৰাৰ কথাও সদৰী কৰে ইৰানৰ বিষয়া সকলে।
উল্লেখ্য যে এসময়ত আমেৰিকাৰ ৰাষ্ট্ৰপতি জ’ বাইডেনে কৈছিল যে আমেৰিকাৰ হস্তক্ষেপ অবিহনে মধ্যপ্ৰাচ্যৰ দেশ সমূহৰ মাজত বুজা-বুজি হোৱাটো সম্ভৱেই নহয়। সেয়ে এতিয়া আমেৰিকাৰ অনুপস্থিতিত চীনক মধ্যস্থতাকাৰী হিচাপে লৈ দুই দেশৰ মাজত হোৱা সফল বুজা-বুজিয়ে অস্বস্তিত পেলাইছে আমেৰিকাক।