২০২৫ চনৰ বিহাৰ নিৰ্বাচন বহু দিশত তাৎপৰ্যপূৰ্ণ। এইবাৰৰ নিৰ্বাচনত পুনৰ প্ৰাসংগিক হৈ পৰিল ৰামবিলাস পাছৱানৰ পুত্ৰ চিৰাগ পাছোৱান। তেওঁৰ নেতৃত্বত এই নিৰ্বাচনত লোক জনশক্তি পাৰ্টিয়ে ভাল ফলাফল লাভ কৰিছে।
কঠিন লেনদেনৰ বুজাপৰাৰ অন্তত জেডিইউ আৰু বিজেপিয়ে চিৰাগ পাছোৱানক মাত্ৰ ২৯খন আসন এৰি দিয়ে। মনে নামানিলেও অৱশেষত তেওঁ লোক জনশক্তি পাৰ্টিৰ মুৰব্বী হিচাপে এন ডি এত যোগদান কৰে। নিৰ্বাচনৰ ফলাফলত দেখা গৈছে যে ২৯খন আসনৰ ভিতৰত ২২খন আসনতে অগ্ৰগতি লাভ কৰিছে এলজেপিৰ প্ৰাৰ্থীয়ে। দলটোৰ সফলতাৰ হাৰ প্ৰায় ৭৫ শতাংশ।
উল্লেখ্য যে ২০২০ চনৰ বিহাৰ বিধানসভা নিৰ্বাচনত এলজেপি বিধ্বস্ত হৈছিল। আসন ভাগ-বতৰাক লৈ নীতিশ কুমাৰৰ সৈতে হোৱা মতানৈক্যৰ বাবে চিৰাগৰ দলে ১৩০খন আসনত প্ৰাৰ্থী প্ৰক্ষেপ কৰিছিল। কিন্তু মাত্ৰ এখন আসনহে লাভ কৰে।
সেই সময়ত ৰাম বিলাসৰ এলজেপি প্ৰায় অপ্রাসংগিক হৈ পৰিছিল৷ তেতিয়া বহু ৰাজনৈতিক বিশ্লেষকে অনুভৱ কৰিছিল যে চিৰাগৰ পিতৃ ৰামবিলাস পাছোৱানৰ দৰে প্ৰভাৱ আৰু ৰাজনৈতিক বুদ্ধিমত্তা নাই।
দলৰ উত্তৰাধিকাৰীক লৈ হোৱা বিবাদৰ বাবে ২০২১ চনত খুড়াক পশুপতি কুমাৰ পৰশৰ সৈতে চিৰাগৰ সংঘাত তীব্ৰতৰ হৈ পৰে। বিভাজন হয় এলজেপি।
পাঁচ বছৰত পৰিস্থিতি সলনি হৈছে। ইয়াৰ পিছত চিৰাগৰ এই কঠিন যুঁজখনে বিহাৰৰ ৰাইজৰ দৃষ্টি আকৰ্ষণ কৰে। ৪৩ বছৰীয়া ৰামবিলাস-পুত্ৰ চিৰাগে যুৱ নেতা হিচাপে নিজকে প্ৰতিষ্ঠা কৰিবলৈ সক্ষম হয়। তেওঁ নিজকে ‘যুৱ বিহাৰী’ বুলি অভিহিত কৰি দলিতৰ স্বাৰ্থ ৰক্ষাৰ নিজৰ দলৰ মূল নীতিত অটল থাকে। এইটোৱেই কাম কৰিলে। এই নিৰ্বাচনত লোক জনশক্তি পাৰ্টিয়ে ভাল ফলাফল লৈ ঘূৰি আহিল। বিহাৰ নিৰ্বাচনত পুনৰ প্ৰাসংগিক হৈ পৰিল চিৰাগ পাছোৱান।
২০২৪ চনৰ লোকসভা নিৰ্বাচনত চিৰাগ আৰু তেওঁৰ দলৰ বাকী অংশৰ কঠোৰ পৰিশ্ৰমৰ ফল লাভ কৰিলে। এলজেপিয়ে প্ৰতিদ্বন্দ্বিতা কৰা পাঁচখন আসনৰ আটাইকেইখন আসনত প্ৰাৰ্থীয়ে জয়লাভ কৰে। সফলতাৰ হাৰ আছিল ১০০ শতাংশ।
লোকসভাত সফলতা লাভ কৰাৰ পাছতো এন ডি এৰ মূল দল – বিজেপি আৰু জেডিইউয়ে এইবাৰৰ বিধানসভা নিৰ্বাচনৰ বাবে বিহাৰৰ ২৪৩খন আসনৰ ভিতৰত ২০খনতকৈ অধিক আসন এলজেপি (আৰভি)ক দিবলৈ অনিচ্ছুক হৈ পৰিছিল। তাৰ পিছত চিৰাগে প্ৰশান্ত কিশোৰৰ জন সূৰজ পাৰ্টিৰ লগত আলোচনা আৰম্ভ কৰিলে। তেওঁ কোনো ধৰণে শাসকীয় মিত্ৰজোঁটক সমৰ্থন কৰিবলৈ সাজু নহয় বুলি ইংগিত দিছিল। ইয়াৰ পিছত যুৱ নেতাজনে দৰদাম কৰি শাসকীয় মিত্ৰজোঁটৰ পৰা ২৯খন আসন কাঢ়ি আনিবলৈ সক্ষম হয়।
নিৰ্বাচনৰ পূৰ্বে চিৰাগে উপ-মুখ্যমন্ত্ৰীৰ পদৰ বাবে আগ্ৰহী বুলি ইংগিত দিছিল। “মই দলীয় কৰ্মীসকলৰ আৱেগক সন্মান কৰো। তেওঁলোকে নিজৰ নেতাক সৰ্বোচ্চ পদত চাব বিচাৰে। সেয়াই তেওঁলোকৰ আকাংক্ষা। যদি আপোনাৰ কৰ্মীসকলে বিশ্বাস নকৰে যে আপুনি শীৰ্ষত উপনীত হ’ব পাৰে, তেন্তে আপুনি তেওঁলোকক অনুপ্ৰাণিত কৰাত ব্যৰ্থ হৈছে। মই সদায় বিচাৰিছিলো যে মোৰ পিতৃ ৰামবিলাস পাছোৱান জী প্ৰধানমন্ত্ৰী হওক। মই নাজানো ভৱিষ্যতে কি হ’ব। কিন্তু মই প্ৰথমে এটা স্তৰ অতিক্ৰম কৰি তাৰ পিছত পৰৱৰ্তী কৌশল সিদ্ধান্ত লওঁ। বিহাৰ নিৰ্বাচনৰ পিছত মোৰ তাৎক্ষণিক অগ্ৰাধিকাৰ হ‘ল ২০২৭ চনৰ উত্তৰ প্ৰদেশ আৰু পঞ্জাৱৰ নিৰ্বাচন। তাৰ পিছত ২০২৯ চনৰ লোকসভা নিৰ্বাচনত মই আমাৰ প্ৰধানমন্ত্ৰীক চতুৰ্থবাৰৰ বাবে নিৰ্বাচিত হোৱা চাব বিচাৰো আৰু তাৰ পিছত আমি ২০৩০ চনত গুৰুত্ব দিম।”
ফলাফলৰ কেইদিনমান পূৰ্বে চিৰাগে প্ৰধানমন্ত্ৰী মোদীৰ প্ৰতি অদম্য আনুগত্য পুনৰাবৃত্তি কৰিছিল। নিৰ্বাচনৰ ফলাফল বেলেগ হ’লেও আন যিকোনো মিত্ৰজোঁটত যোগদান কৰাৰ ক্ষেত্ৰত তেওঁ নিজৰ মতামত প্ৰকাশ কৰিছিল। তেওঁ কয়, “মই প্ৰিয়ংকা (গান্ধী) জীৰ সৈতে কথা পাতিছিলো, আৰু মই পুনৰ ক’ব বিচাৰো যে যেতিয়ালৈকে মোৰ প্ৰধানমন্ত্ৰী আছে, মই ক’লৈকো নাযাওঁ। মোৰ আনুগত্য আৰু মৰম আছে। মই তেওঁক (প্ৰধানমন্ত্ৰী মোডীক) অলপ বেছি ভাল পাওঁ।”
