নগাঁও জিলাৰ জুৰীয়াত সংখ্যালঘু ছাত্ৰ-ছাত্রীৰ জলপানিৰ ধনৰ নামত সংঘটিত বৃহৎ বিত্তীয় কেলেংকাৰিৰ বিৰুদ্ধে গোচৰ ৰুজু হোৱাৰ পিছত শনিবাৰে গুৱাহাটীৰ পৰা অহা চি আই ডিৰ দলে জুৰীয়াত উপস্থিত হৈ তদন্ত আৰম্ভ কৰে৷
জুৰীয়াৰ বহু কেইখন বিদ্যালয়ত ২০১৭-১৮ বৰ্ষত সংখ্যালঘু ছাত্ৰ-ছাত্রীৰ জলপানিৰ ধনৰ নামত কোটিটকীয়া বিত্তীয় কেলেংকাৰিৰ সংঘটিত হোৱা বুলি চি আই ডিত ৰুজু হৈছিল গোচৰ। এই বৃহৎ কেলেংকাৰি বিষয়ে গোচৰ ৰুজু হোৱাৰ পিছত শনিবাৰে জুৰীয়াত গুৱাহাটীৰ পৰা বিষয়া সহ চাৰিজনীয়া চি আই ডিৰ দল এটা উপস্থিত হয়৷
জুৰীয়া থানাত বাহৰ পাতি থকা চি আই ডিৰ দলটোৱে ভুৱা তথা বেলেগে বেলেগ বেংক একাউণ্টত জালিয়াতিৰে জলপানিৰ ধন সুমুৱাই উদৰস্থ কৰা দুষ্ট চক্ৰটোক চিনাক্ত কৰিবৰ বাবে তদন্ত আৰম্ভ কৰিছে ৷
প্ৰকৃত সংখ্যালঘু ছাত্ৰ-ছাত্ৰীক জলপানিৰ পৰা বঞ্চিত কৰি ভুৱা ছাত্ৰ-ছাত্ৰী দেখুৱাই কোটিটকীয়া কেলেংকাৰি সংঘটিত কৰা চক্ৰটোক বিচাৰি উলিয়াই আটক কৰিবলৈ তদন্ত আৰম্ভ কৰা চি আই ডিৰ দলটোৱে প্ৰতিজন ছাত্ৰ-ছাত্ৰীৰ ওচৰলৈ গৈ জলপানি লাভ কৰাত কোনে সহায় কৰিছিল আৰু তেওঁলোকৰ একাউণ্টত ক’ৰ পৰা ধন জমা হৈছিল সেই বিষয়ে তদন্ত আৰম্ভ কৰিছে।
এতিয়া চি আই ডিয়ে এই বৃহৎ কেলেংকাৰিটোৰ লগত জৰিত ৰৌ, বৰালি সহ আটাইকে তদন্ত ক্ৰমে গ্ৰেপ্তাৰ কৰিবলৈ সক্ষম হ’বনে সেয়া অৱশ্যে লক্ষণীয় হ’ব।
