নতুন বছৰৰ আৰম্ভণিতে ধূমপায়ী আৰু ধঁপাত সেৱন কৰা লোকসকলৰ বাবে আহিছে এক ডাঙৰ খবৰ। ১ ফেব্ৰুৱাৰীৰ পৰা দেশত বিড়ি, চিগাৰেট, গুটকা আৰু অন্যান্য ধঁপাতজাতীয় সামগ্ৰীৰ মূল্য বৃদ্ধি পাবলৈ গৈ আছে। কেন্দ্ৰীয় চৰকাৰে এই সন্দৰ্ভত এক নতুন অধিসূচনা জাৰি কৰিছে। কেন্দ্ৰীয় বিত্তমন্ত্ৰী নিৰ্মলা সীতাৰমণে বাজেটত এই সামগ্ৰীসমূহৰ ওপৰত অতিৰিক্ত শুল্ক আৰোপ কৰাৰ যি ঘোষণা কৰিছিল, সেয়া অহা মাহৰ পৰাই কাৰ্যকৰী কৰা হ’ব। বুধবাৰে চৰকাৰে স্পষ্ট কৰি দিছে যে ১ ফেব্ৰুৱাৰীৰ পৰা ধঁপাতজাতীয় সামগ্ৰীৰ ওপৰত নতুন জি এছ টি গাঁথনি প্ৰযোজ্য হ’ব।
কেন্দ্ৰীয় চৰকাৰে বিড়ি, চিগাৰেট আৰু পান মছলাৰ দৰে সামগ্ৰীক বিশেষভাৱে চিনাক্ত কৰি এইবোৰৰ ওপৰত কৰৰ বোজা বৃদ্ধি কৰিছে। যোৱা ডিচেম্বৰ মাহত সংসদত গৃহীত হোৱা দুখন বিধেয়কৰ জৰিয়তে পান মছলা আৰু ধঁপাতজাতীয় সামগ্ৰীৰ ওপৰত নতুন চেছ আৰু অতিৰিক্ত আবকাৰী শুল্ক আৰোপ কৰাৰ পথ মুকলি কৰা হৈছে। চৰকাৰৰ নতুন সিদ্ধান্ত অনুসৰি এই সামগ্ৰীসমূহৰ ওপৰত ৪০ শতাংশ জি এছ টি আৰোপ কৰা হ’ব। ইয়াৰ উপৰি স্বাস্থ্য আৰু ৰাষ্ট্ৰীয় নিৰাপত্তা চেছ নামৰ এক অতিৰিক্ত কৰ আৰু আবকাৰী শুল্কও ইয়াৰ সৈতে যোগ হ’ব।
ইয়াৰ আগতে এই সামগ্ৰীসমূহৰ ওপৰত ২৮ শতাংশ জি এছ টি আৰু অতিৰিক্ত ক্ষতিপূৰণ চেছ আছিল, যাৰ ফলত মুঠ কৰৰ পৰিমাণ আছিল ৫৩ শতাংশ। কিন্তু এতিয়া একেলগে তিনি ধৰণৰ কৰ আৰোপ কৰাৰ ফলত চিগাৰেট আৰু অন্যান্য ধঁপাতজাতীয় সামগ্ৰীৰ দাম যথেষ্ট বৃদ্ধি পাব। কিছুমান সামগ্ৰীৰ মূল্য আগতকৈ দুগুণ পৰ্যন্ত হোৱাৰ সম্ভাৱনা আছে। অৱশ্যে বিড়িৰ ক্ষেত্ৰত মূল্য বৃদ্ধিৰ পৰিমাণ তুলনামূলকভাৱে কম হ’ব পাৰে কাৰণ বিড়িৰ জি এছ টিৰ হাৰ চৰকাৰে ১৮ শতাংশতে ৰাখিছে।
বিশ্বৰ বহু দেশে জনস্বাস্থ্যৰ সুৰক্ষা আৰু চৰকাৰী ৰাজহ বৃদ্ধিৰ বাবে এনে ক্ষতিকাৰক সামগ্ৰীৰ ওপৰত অধিক কৰ আৰোপ কৰে। ভাৰত চৰকাৰেও সেই একেই উদ্দেশ্যৰে এই সামগ্ৰীসমূহৰ ওপৰত সৰ্বাধিক কৰ আৰোপ কৰাৰ সিদ্ধান্ত লৈছে। উল্লেখ্য যে ধঁপাতজাতীয় সামগ্ৰীৰ পৰা ভাৰত চৰকাৰে মুঠ ৰাজহৰ প্ৰায় ৩ শতাংশ লাভ কৰে আৰু এই খণ্ডটোৰ সৈতে দেশৰ বহু লোকৰ কৰ্মসংস্থাপনো জড়িত হৈ আছে।
