ভাৰতীয় ঔদ্যোগিক সুৰক্ষা বাহিনীৰ এজন কৰ্তব্যৰত জোৱানে আজি লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰত নিজৰ বন্দুকৰে গুলীয়াই আত্মহত্যা কৰা ঘটনাই চাঞ্চল্য সৃষ্টি কৰিছে। বিমানবন্দৰৰ কাৰ্গ’ গেটৰ ওচৰত থকা ড্ৰাইভাৰৰ কোঠাতে সংঘটিত হৈছে ঘটনাতো।
ভাৰতীয় বিমান প্ৰাধিকৰণৰ এজন বিষয়াই জনোৱা অনুসৰি চি আই এচ এফৰ সুৰেন্দৰ সিং নামৰ হেড কনিষ্টব’লজনে আজি দিনৰ ১.২৫ বজাত বন্দুকেৰে নিজৰ বুকুত গুলীয়াই আত্মহত্যা কৰে। কনিষ্টব’লজন ৰাতিপুৱা ৫ বজাৰ পৰা দুপৰীয়া ১ বজালৈ কৰ্তব্যৰত হৈ আছিল আৰু নিজৰ কৰ্তব্য সমাপ্ত কৰিয়ে ঘটনাতো সংঘটিত কৰে জোৱানজনে।
বিষয়া জনৰ ভাষ্যমতে মৃত জোৱানজন বিমানবন্দৰৰ ২ নং নিৰীক্ষণ চকীৰ পহৰাত নিয়োজিত হৈ আছিল। নিয়মমতে পহৰা শেষ কৰি জোৱান সকলে বিভাগীয় গাড়ীত উঠাৰ বাবে আৰু অস্ত্ৰ ওভটাই দিবৰ বাবে কাৰ্গ’ গেটৰ ওচৰলৈ যাব লাগে। অস্ত্ৰ ওভোটাই দিবলৈ যোৱাৰ সময়তে ড্ৰাইভাৰৰ কোঠাত প্ৰবেশ কৰি জোৱানজনে আত্মহত্যা কৰে।
আনহাতে, ঘটনা সংঘটিত হোৱাৰ পাছতে জোৱানজনক বি এচ এফৰ চিকিৎসালয়ত ভৰ্তি কৰা হয় যদিও চিকিৎসকে তেওঁক মৃত ঘোষণা কৰে। সমগ্ৰ ঘটনাটোৰ বাবে ইতিমধ্যে বিভাগীয় উচ্চ পৰ্য্যায়ৰ তদন্ত ঘোষণা কৰা হৈছে বুলি বিষয়াগৰাকীয়ে সাংবাদিকক জানিব দিয়ে।