ভাৰতৰ মুখ্য ন্যায়াধীশ বি আৰ গাভাইৰ মাতৃ কমলতাই গাভাই-এ ৰাষ্ট্ৰীয় স্বয়ংসেৱক সংঘৰ দ্বাৰা আয়োজিত বিজয়াদশমী আৰু শতবাৰ্ষিকী অনুষ্ঠানলৈ আমন্ত্ৰণ জনোৱাৰ বাতৰিক নস্যাৎ কৰিছে।
শেহতীয়াকৈ এক বিবৃতি প্ৰকাশ কৰি ড০ কমলতাই গাভাইয়ে এই কথা প্ৰকাশ কৰে।
কমলতায়ে এখন হস্তলিখিত পত্ৰযোগে নিজকে ‘কঠোৰ আম্বেদকাৰপন্থী’ বাবে এই অনুষ্ঠানত উপস্থিত থকাৰ পৰা বিৰত থাকিব বুলি উল্লেখ কৰে।
ইয়াৰ পূৰ্বে কেইবাটাও সংবাদ প্ৰতিষ্ঠানে কমলতায়ে আৰএছএছৰ অনুষ্ঠানত অংশগ্ৰহণ কৰিব বুলি প্ৰকাশ কৰিছিল। কিন্তু কমলতায়ে নিজৰ পত্ৰত এই দাবীক আৰএছএছে প্ৰচাৰ কৰা “ষড়যন্ত্ৰ” বুলি চিহ্নিত কৰাৰ লগতে “সম্পূৰ্ণ মিছা” খবৰ বুলি উল্লেখ কৰে।
উল্লেখ্যে যে, অহা ৫ অক্টোবৰত মহাৰাষ্ট্ৰৰ অমৰাৱতী কিৰণ নগৰস্থিত শ্ৰীমতী নৰসম্মা মহাবিদ্যালয় ময়দানত আৰএছএছৰ অমৰাৱতী মহানগৰ শাখাই আয়োজন কৰা অনুষ্ঠানৰ বাবে কমলতাইক মুখ্য অতিথি হিচাপে আমন্ত্ৰণ জনোৱা হৈছিল।
পূৰ্বে ন্যায়াধীশ গাভাইৰ কনিষ্ঠ ভাতৃ ৰাজেন্দ্ৰ গাভাই-এ ৰাষ্ট্ৰীয় সংবাদ প্ৰতিষ্ঠান এএনআইক জনাইছিল যে তেওঁৰ মাতৃ এই অনুষ্ঠানত অংশগ্ৰহণ কৰিবলৈ সন্মত হৈছে।
সাক্ষাৎকাৰত ৰাজেন্দ্ৰই কয় যে ব্যক্তিগত সম্পৰ্কক ৰাজনৈতিক আদৰ্শৰ সৈতে সনা-পিটিকা কৰাটো উচিত নহয়।
ৰাজেন্দ্ৰ গাভাই-এ কয়, ‘মোৰ পিতৃ (আৰ এছ গাৱাই) দল নিৰ্বিশেষে বহু ৰাজনীতিবিদৰ ঘনিষ্ঠ আছিল। তেওঁ ইন্দিৰাজী আৰু অটল বিহাৰী বাজপেয়ীৰ ঘনিষ্ঠ আছিল আৰু বিভিন্ন অনুষ্ঠানত অংশ লৈছিল। তাৰ অৰ্থ এইটো নহয় যে তেওঁ নিজৰ ৰাজনৈতিক দৃষ্টিভংগীৰ সৈতে আপোচ কৰিছিল।’
ৰাজেন্দ্ৰ গাভাই-এ আৰু কয় যে যিটো অনুষ্ঠানলৈ তেওঁৰ মাতৃ কমলতাইক আমন্ত্ৰণ জনোৱা হৈছিল সেয়া “মূল অনুষ্ঠান” নহয়।
ৰাজেন্দ্ৰই দাবী কৰে যে, ‘মোৰ দেউতায়ো বিগত সময়ত নিমন্ত্ৰণ গ্ৰহণ কৰি বিভিন্ন অনুষ্ঠানত অংশ লৈছিল।মায়ে কেৱল সেই কাৰণেই নিমন্ত্ৰণ গ্ৰহণ কৰাৰ সিদ্ধান্ত লৈছিল।’
উল্লেখ্য যে, বি আৰ গাভাইৰ পিতৃ আৰ এছ গাভাই ৰাজ্যসভাৰ প্ৰাক্তন সাংসদ আছিল। লগতে বিহাৰ আৰু কেৰালাৰ ৰাজ্যপাল হিচাপেও কাৰ্যনিৰ্বাহ কৰিছিল। তদুপৰি আম্বেদকাৰবাদী আন্দোলনৰ জ্যেষ্ঠ নেতা হিচাপে তেঁও ভাৰতীয় ৰিপাব্লিকান পাৰ্টি (আৰ পি আই)ৰ সৈতে জড়িত হৈ নিজাকৈ এটা ফৈদ আৰ পি আই (গাভাই) প্ৰতিষ্ঠা কৰিছিল।
আজি ২৯ ছেপ্টেম্বৰত ৰাজেন্দ্ৰ গাৱাইৰ প্ৰেছ বিবৃতিৰ কিছু ঘণ্টাৰ ভিতৰতে কমলতাইৰ চিঠিখন সংবাদ মাধ্যমত প্ৰচাৰ হ’ল। ইয়াৰ উত্তৰত ৰাজেন্দ্ৰই স্বতন্ত্ৰ সংবাদ মাধ্যম দ্য ৱায়াৰক জনাই যে, ‘মই মোৰ মাক সমৰ্থন কৰোঁ। যদি তেখেতে অনুষ্ঠানত অংশগ্ৰহণ কৰাৰ সিদ্ধান্ত লয় তথাপিও মই সমৰ্থন কৰিম আৰু যদি ইয়াৰ বিৰুদ্ধে সিদ্ধান্ত লৈছে তেন্তে মই সেইটোতো সমৰ্থন কৰোঁ।’
