উচ্চতম ন্যায়ালয়ৰ অধিবক্তাৰ ব্যৱহাৰক লৈ ক্ষুব্ধ মুখ্য ন্যায়াধীশ ডি ৱাই চন্দ্ৰচুড়। ভৰ্তি আদালত কক্ষত তেওঁ অধিবক্তাগৰাকীক কঠোৰ সকীয়নি দিয়ে। তাৰ লগতে মুখ্য ন্যায়াধীশগৰাকীয়ে আদালতৰ কক্ষত শিষ্টাচাৰ কেনেকৈ পালন কৰিব লাগে সেই সম্পৰ্কেও ‘পাঠ’ দিয়ে। অধিবক্তাগৰাকীক সম্বোধন কৰি তেওঁ কয় যে ই (আদালত কক্ষ) কোনো ৰে’ল ষ্টেচন নহয়, য’ত আপুনি বিচৰামতে যিকোনো ৰে’লত উঠিব পাৰে।’
বাতৰি অনুসৰি, সোমবাৰে বিয়লি উচ্চতম ন্যায়ালয়ৰ মুখ্য ন্যায়াধীশৰ কক্ষত এটা গোচৰৰ শুনানি চলি আছিল। সেই সময়ত আদালতত উপস্থিত থকা এগৰাকী অধিবক্তাই থিয় হৈ মুখ্য ন্যায়াধীশৰ বিচাৰপীঠক সম্বোধন কৰি কয় যে তেওঁ ন্যায়িক ব্যৱস্থাৰ সংস্কাৰৰ বাবে জনস্বাৰ্থৰ মামলা দাখিল কৰিছে। এই গোচৰৰ শুনানিৰ তাৰিখ এতিয়াও নিৰ্ধাৰণ কৰা হোৱা নাই। তেওঁ এই গোচৰৰ দ্ৰুত শুনানি বিচাৰে বুলিও কয় অধিবক্তাগৰাকীয়ে।
লগতে পঢ়কঃ আজিয়েই পৃথিৱীৰ কাষেৰে পাৰ হৈ যাব ১৩০ ফুট দৈৰ্ঘ্যৰ গ্ৰহাণু; জনাইছে নাছাই
শুনানিৰ সময়ত মুখ্য ন্যায়াধীশগৰাকীয়ে এনে এক তালিকাভুক্ত নোহোৱা বিষয়ৰ কথা উল্লেখ কৰাত ক্ষুব্ধ হৈ পৰে। সংশ্লিষ্ট অধিবক্তাক সম্বোধন কৰি তেওঁ কয়, “আপুনি কোনো ষ্টেচনতে থিয় হৈ থকা নাই যে আপুনি ইচ্ছামতে ৰে’লত উঠিব পাৰে। আপুনি এজন চিনিয়ৰৰ লগত কথা পাতি আদালতত কেনেকৈ আচৰণ কৰিব লাগে শিকক।”
মুখ্য ন্যায়াধীশৰ ককৰ্থনাৰ পিছতো হাৰ নামানিলে অধিবক্তাগৰাকীয়ে। তেওঁ কয় যে “মই ন্যায়িক ব্যৱস্থাৰ বিৰোধী নহয়, কিন্তু ন্যায় ব্যৱস্থাৰ উন্নতি বিচাৰো।”
তেওঁৰ কথা শুনি মুখ্য ন্যায়াধীশে তেওঁ কত প্ৰেকটিছ কৰে জানিব বিচাৰে? তেওঁ জনায় যে তেওঁ উচ্চ ন্যায়ালয় আৰু নিম্ন আদালতত প্ৰেকটিছ কৰে। তেতিয়া মুখ্য ন্যায়াধীশে প্ৰশ্ন কৰে যে তেওঁ কিয় আদালতৰ শিষ্টাচাৰৰ প্ৰশিক্ষণ দিব পৰা জ্যেষ্ঠ এজনৰ সৈতে কাম নকৰে?
লগতে পঢ়কঃ আহক আমি গান্ধীজীৰ আদৰ্শ চাৰিওফালে বিয়পাই দিওঁ! আহ্বান ৰাজ্যৰ ৪৫৫ গৰাকী বিশিষ্ট ব্যক্তিৰ
সোমবাৰে অধিবক্তাক শিকনি দিওঁতে মুখ্য ন্যায়াধীশে পুৰণি ঘটনা উত্থাপন কৰে। চলিত মাহৰ আৰম্ভণিতে মুখ্য ন্যায়াধীশগৰাকীয়ে আদালতৰ কক্ষত উচ্চস্বৰত কথা কোৱাৰ বাবে এজন অধিবক্তাক ধমক দিছিল। অধিবক্তাক কণ্ঠস্বৰ কমাবলৈ নিৰ্দেশ দিলিছিল। মুখ্য ন্যায়াধীশৰ ‘ধমক’ শুনি খৰখেদাকৈ ক্ষমা বিচাৰিছিল অধিবক্তাগৰাকীয়ে।
