NEET পৰীক্ষাৰ প্ৰশ্নকাকত ফাদিল আৰু সমগ্ৰ দেশতে আলোড়নৰ সৃষ্টি কৰা ধাৰাবাহিক অনিয়মৰ প্ৰতিবাদত দিল্লীৰ যন্তৰ মন্তৰত দেশবাসীয়ে এক অভূতপূৰ্ব আৰু উদ্ভাৱনীমূলক প্ৰতিবাদৰ সাক্ষী হৈ পৰিছে। শনিবাৰে ৰাজধানী দিল্লীৰ মাজমজিয়াত দ্বিতীয় বৃহত্তম গণ প্ৰতিবাদ সাব্যস্ত কৰিছে ব্যংগাত্মক সংগঠন ‘ককৰোচ জনতা পাৰ্টি’য়ে। এই প্ৰতিবাদত যোগদান কৰিবলৈ অহা প্ৰতিবাদকাৰীসকলে ষ্টীলৰ কাঁহী আৰু চামুচ লৈ অহা দেখা গ’ল!
২০২০ চনত ক’ৰোনা মহামাৰীৰ আৰম্ভণিতে প্ৰথমশাৰীৰ ক’ভিড যোদ্ধাসকলক সন্মান জনাই প্রধানমন্ত্রী নৰেন্দ্র মোদীয়ে দিয়া ‘কাঁহী-বাতি বজোৱা’ৰ আহ্বানক অস্ত্ৰ হিচাপে প্রয়োগ কৰি কেন্দ্রীয় শিক্ষামন্ত্রীগৰাকীৰ পদত্যাগৰ দাবী জনায় প্রতিবাদকাৰীসকলে৷
অৱশ্যে চিজেপিৰ প্ৰতিষ্ঠাপক অভিজিৎ দীপকে ২০২০ চনৰ মহামাৰীৰ আহ্বানৰ বিষয়ে পোনপটীয়াকৈ ব্যাখ্যা কৰা নাই। শুকুৰবাৰে প্ৰকাশ পোৱা এক ভিডিঅ’ বাৰ্তাত তেওঁ সমৰ্থকসকলক কয় যে, “কাইলৈ যন্তৰ মন্তৰত প্ৰতিবাদত অংশগ্ৰহণ কৰিবলৈ অহা সকলো পঁইতাচোৰা বা সমৰ্থকে লগত কাঁহী আৰু চামুচ লৈ আহিব । বাকী কাহিনীটো আপোনালোকেতো ভালদৰেই জানে।”
আচলতে এই ‘কাহিনীৰ বাকী’ লুকাই আছে ২০২২ চনৰ ২২মাৰ্চৰ ইতিহাসত।সেই সময়ত ‘জনতা কাৰ্ফিউ’ৰ সময়ত প্ৰধানমন্ত্ৰী মোদীয়ে দেশবাসীক সন্ধিয়া ৫ বজাত ৫ মিনিটৰ বাবে ঘৰৰ বেলকনি বা দুৱাৰত থিয় হৈ কাঁহী-বাতি বা বাচন-বৰ্তন বজাই প্ৰথমশাৰীৰ কোভিড যোদ্ধাৰ সৈতে সংহতি প্ৰকাশ কৰিবলৈ আহ্বান জনাইছিল। পিছলৈ বিৰোধীয়ে বাৰে বাৰে এই কাঁহী-বাতি বজোৱা বিষয়টোক প্ৰতীকী আহিলা হিচাপে ব্যৱহাৰ কৰি মোডী চৰকাৰৰ বিভিন্ন নীতিক সমালোচনা আৰু উপহাস কৰিছে। এইবাৰ এই ছাত্ৰ সংগঠনটোৱেও NEET গোচৰতো একে পথ বাছি লৈছে।
শনিবাৰে দিনৰ ১ বজাৰ পৰা যন্তৰ মন্তৰত আৰম্ভ হোৱা এই প্ৰতিবাদী কাৰ্যসূচীত দিল্লীৰ লগতে চুবুৰীয়া ৰাজ্যৰ ছাত্ৰ-ছাত্ৰীয়েও অংশগ্ৰহণ কৰিছে। যোৱা মাহত এক্স আৰু ইনষ্টাগ্ৰামৰ দৰে ছ’চিয়েল মিডিয়া প্লেটফৰ্মত আত্মপ্ৰকাশ কৰাৰ পিছত চলিত মাহৰ আৰম্ভণিতে সংস্থাটোৱে প্ৰথমটো অন-গ্ৰাউণ্ড আন্দোলন আৰম্ভ কৰিছিল। ফলত শনিবাৰে দ্বিতীয় পৰ্যায়ৰ প্ৰতিবাদৰ পূৰ্বে যন্তৰ মন্তৰ চৌহদত নিৰাপত্তা কটকটীয়া কৰিছে প্ৰশাসনে। ৰিয়েল টাইম বা নিবিড় নিৰীক্ষণৰ বাবে সমগ্ৰ অঞ্চলটোত চিচিটিভি কেমেৰা স্থাপন কৰা হৈছে।
অহা ২১ জুনত NEET-UG পৰীক্ষা পুনৰ অনুষ্ঠিত হোৱাৰ কথা। কিন্তু সংগঠনটোৰ মূল আৰু কেন্দ্ৰীয় দাবী হৈছে প্ৰশ্নকাকত ফাদিল আৰু সামগ্ৰিক প্ৰৱঞ্চনাৰ নৈতিক দায়িত্ব লৈ কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে শীঘ্ৰে পদৰ পৰা পদত্যাগ কৰক।
দিল্লীলৈ যোৱাৰ পূৰ্বে অভিজিৎ দীপকে মহাৰাষ্ট্ৰৰ হিংগোলী জিলাৰ নিজৰ গাঁও সন্তুক পিম্পৰিৰ সাংবাদিকক সম্বোধন কৰি আন কেইবাটাও বিষয়ত কেন্দ্ৰক তীব্ৰ সমালোচনা কৰে। বিশেষকৈ NEET পৰীক্ষাৰ প্ৰাকক্ষণত কেন্দ্ৰই টেলিগ্ৰামত অস্থায়ী নিষেধাজ্ঞা আৰোপ কৰাৰ সিদ্ধান্তৰ তীব্ৰ বিৰোধিতা কৰে। দীপকে কয়, “এই সিদ্ধান্ত গাঁতটো মেৰামতি নকৰি সমগ্ৰ পথটো বন্ধ কৰাৰ দৰেই। টেলিগ্ৰাম নিষিদ্ধ কৰাৰ এই সিদ্ধান্তত কোনো যুক্তি নাই।”
এক সৰ্বভাৰতীয় সংবাদ মাধ্যমৰ সূত্ৰৰ মতে, এই প্ৰসংগত দীপকে কয় যে NEET বিতৰ্কৰ বাবে দেশত ১১ গৰাকী ছাত্ৰ-ছাত্ৰীয়ে আত্মহত্যা কৰিছে। প্ৰধানমন্ত্ৰীৰ পৰা ১ কোটি টকা ক্ষতিপূৰণ দাবী কৰা হৈছে।
ইতিমধ্যে চিজেপিৰ মুৰব্বী অভিজিৎ দীপকে প্ৰধানমন্ত্ৰী নৰেন্দ্ৰ মোডীলৈ মুকলি পত্ৰ প্ৰেৰণ কৰিছে। ইয়াত তেওঁ NEET বিতৰ্কৰ বাবে যোৱা কেইটামান সপ্তাহত আত্মহত্যা কৰা ১১ জন প্ৰাৰ্থীৰ মৃত্যুৰ ওপৰত আলোকপাত কৰি প্ৰতিটো পৰিয়ালক ১ কোটি টকাৰ আৰ্থিক ক্ষতিপূৰণৰ দাবী জনায়।
চিঠিখনত তেওঁ লিখিছে, “মই আজি আপোনালৈ এই চিঠিখন অতি দুখ মনেৰে লিখিছো, যাতে আমাৰ দেশৰ ভৱিষ্যতৰ এই তীব্ৰ সংকট অৰ্থাৎ যুৱ ছাত্ৰ-ছাত্ৰীৰ জীৱন আৰু মানসিক সুস্থতাৰ প্ৰতি আপোনালোকৰ জৰুৰী দৃষ্টি আকৰ্ষণ কৰিব পাৰো।”
শিক্ষামন্ত্ৰীগৰাকীক অপসাৰণৰ দাবী পুনৰবাৰ উল্লেখ কৰি দীপকে কয়, “বিগত এমাহ ধৰি সমগ্ৰ দেশতে ককৰোচ জনতা পাৰ্টিয়ে শিক্ষামন্ত্ৰীৰ পদত্যাগৰ দাবীত ধাৰাবাহিকভাৱে প্ৰতিবাদ সাব্যস্ত কৰি আহিছে। আমি ছাত্ৰ-ছাত্ৰীসকলে মাথোঁ চাব বিচাৰো যে এই সতেজ আত্মাসকলৰ বিদায়ৰ আঁৰত প্ৰশাসনৰ কিবা জবাবদিহিতা বা দায়িত্ব আছে নেকি।”
ইপিনে, মহাৰাষ্ট্ৰৰ শেহতীয়া ৰাজনৈতিক সংকট আৰু শিৱসেনাৰ (ইউ বি টি) লোকসভাৰ ৯ জন সাংসদৰ ভিতৰত ৬ জন সাংসদে পক্ষ সলনি কৰি একনাথ শিণ্ডেৰ শিবিৰত যোগদান কৰাৰ জল্পনা-কল্পনাৰ সন্দৰ্ভত সাংবাদিকসকলে তেওঁক প্ৰশ্ন কৰে। ইয়াৰ উত্তৰত দীপকে সকলো ৰাজনীতিবিদৰ ওপৰতে ক্ষোভ প্ৰকাশ কৰে।
মহাৰাষ্ট্ৰৰ উপ-মুখ্যমন্ত্ৰী দেৱেন্দ্ৰ ফাডনবিছৰ বাসগৃহৰ কথা উল্লেখ কৰি তেওঁ দাবী কৰে যে, “এই নেতাসকলে লাজ পাব লাগে। NEET পৰীক্ষাত আত্মহত্যা কৰা ছোৱালীজনী উপ-মুখ্যমন্ত্ৰী দেৱেন্দ্ৰ ফাডনবিছৰ ঘৰৰ পৰা মাত্ৰ ৫০০ মিটাৰ দূৰত্বত বাস কৰিছিল। কিন্তু সেই পৰিয়াললৈ কোনো ফোন কল বা কোনো ধৰণৰ সহায় পোৱা নাছিল।” তেওঁ আৰু অভিযোগ কৰে যে, “মৃত ছাত্ৰ-ছাত্ৰীৰ পৰিয়ালক দিবলৈ শাসকীয় দলৰ নেতাসকলৰ হাতত টকা নাই, আনহাতে তেওঁলোকৰ হাতত বিধায়ক-সাংসদ ক্ৰয়-বিক্ৰয় কৰিবলৈ কোটি কোটি টকা আছে।”
চলিত মাহৰ ৬ তাৰিখে যন্তৰ মন্তৰত প্ৰথম প্ৰতিবাদ আৰু পুনে, লক্ষ্ণৌ, অমৃতসৰ, বেংগালুৰু, হায়দৰাবাদ আৰু জয়পুৰত ধাৰাবাহিক আন্দোলনৰ পিছত শনিবাৰৰ এই কাৰ্যসূচী আছিল চিজেপিৰ দ্বিতীয়টো বৃহৎ দিল্লী ৰেলী। অৱশ্যে দীপকে স্পষ্টকৈ কয় যে ককৰোচ জনতা পাৰ্টিয়ে কেতিয়াও নিৰ্বাচনত প্ৰতিদ্বন্দ্বিতা নকৰে।
মন কৰিবলগীয়া যে ১৬ মে’ৰ গোচৰৰ শুনানিত উচ্চতম ন্যায়ালয়ৰ মুখ্য ন্যায়াধীশ সূৰ্য কান্তে ‘পইঁতাচোৰা’ আৰু ‘পৰজীৱী’ শব্দ ব্যৱহাৰ কৰাৰ পিছত এই নতুন দলটো অনলাইনত গঠন কৰা হৈছিল। দলৰ প্ৰতিষ্ঠাতা দীপকে পূৰ্বে আম আদমী পাৰ্টিৰ ছ’চিয়েল মিডিয়া মেনেজাৰ হিচাপে কাম কৰিছিল। নিৰ্বাচনত প্ৰতিদ্বন্দ্বিতা নকৰাৰ সন্দৰ্ভত তেওঁ কয় যে, “আমি কিয় নিৰ্বাচনত অৱতীৰ্ণ হওঁ? যদি এই দেশৰ প্ৰতিজন ব্যক্তিয়ে নিজৰ অধিকাৰৰ দাবীত নিৰ্বাচনত অৱতীৰ্ণ হ’বলগীয়া হয়, তেন্তে দেশ কেনেকৈ চলিব?”
