মুছলমান সকলৰ পবিত্ৰ উৎসৱ ঈদ উল ফিতৰৰ প্ৰাকমুহূৰ্তত ৰাজস্থানৰ যোধপুৰৰ জালোৰী গেটত এখন পতাকা আৰু লাউডস্পীকাৰ স্থাপনক কেন্দ্ৰ কৰি সৃষ্টি হয় সাম্প্ৰদায়িক সংঘৰ্ষৰ।
প্ৰকাশিত খবৰ অনুসৰি জালোৰী গেট চাৰিআলিত জালোৰী চকৰ ওচৰত এখন বেনাৰ লগোৱাৰ লগতে এটা লাউডস্পীকাৰ স্থাপন কৰা হৈছিল। ইয়াকে কেন্দ্ৰ কৰি অঞ্চলটোত ইছলাম ধৰ্মাৱলম্বী সকলৰ সৈতে একাংশ হিন্দু লোকৰ বিবাদৰ সূত্ৰপাত হয়।
প্ৰতিবেদন অনুসৰি, ঈদৰ অনুষ্ঠানৰ লগত সংগতি ৰাখি মুছলমান সকলে লগোৱা এই পতাকা আৰু বেনাৰসমূহ একাংশ হিন্দু লোকে আঁতৰাই পেলায়। ইয়াৰ পাছতেই অঞ্চলটোত এক অবাঞ্চিত পৰিস্থিতিৰ সৃষ্টি হয়।
প্ৰতিবাদকাৰী হিন্দু লোকসকলৰ এই কাৰ্যই ইছলাম ধৰ্মাৱলম্বী লোকসকল স্বাভাৱিকতেই বিদ্বেষী কৰি তোলে আৰু দুয়োটা গোটৰ মাজত সংঘৰ্ষ আৰম্ভ হয়।
দুয়োটা গোটৰ মাজত প্ৰথমে শিলেৰে আক্ৰমণ কৰাৰ পিছতে এই সংঘৰ্ষ অধিক ভয়াৱহ হৈ উঠে। ইয়াৰ মাজতে একাংশ হিন্দু লোকে লাউডস্পীকাৰটো নমাই আনে।
ঘটনাস্থলীত সমবেত জনতাক নিয়ন্ত্ৰণলৈ আনিবলৈ আৰক্ষীয়ে প্ৰথমে কন্দুৱা গেছ নিক্ষেপ কৰাৰ লগতে লাঠী চাৰ্জ কৰিবলৈ বাধ্য হয়।
আনহাতে ঘটনাস্থলীত আৰক্ষী আৰু সংবাদ কৰ্মীসকলৰ মাজতো বিবাদ হয় বুলি জানিব পৰা গৈছে। আৰক্ষীৰ লাঠীৰ প্ৰহাৰত এজন সাংবাদিক আঘাতপ্ৰাপ্ত হয় বুলি জানিব পৰা গৈছে।
ঘটনাসন্দৰ্ভত উদ্বেগ প্ৰকাশ কৰি ৰাজ্যখনৰ মুখ্যমন্ত্ৰী অশোক গেহলটে কয় যে প্ৰশাসনক যিকোনো পৰিস্থিতিতে শান্তি-শৃংখলা বজাই ৰাখিবলৈ নিৰ্দেশ দিয়া হৈছে।
ইফালে সংঘৰ্ষৰ পিছতে অঞ্চলটোত ইণ্টাৰনেট সেৱা স্থগিত ৰখা হৈছে আৰু জলৰি গেটত অধিক আৰক্ষী মোতায়েন কৰা হৈছে। পৰিস্থিতি এতিয়া নিয়ন্ত্ৰণত আছে বুলি শীৰ্ষ আৰক্ষী বিষয়াসকলে জানিবলৈ দিয়ে।
