Student dies while rehearsing Bhagat Singh’s Execution নাটকৰ আখৰাত এক কৰুণ ঘটনাৰ সাক্ষী হৈ ৰ’ল কৰ্ণাটকৰ চিত্ৰদুৰ্গা। ভগত সিঙৰ ফাঁচীৰ দৃশ্যৰ আখৰা চলিছিল। অজানিতে ‘ফাঁচী’ৰ ৰছী টানি ধৰি শ্বাসৰুদ্ধ হৈ মৃত্যু বৰণ কৰিলে সপ্তম শ্ৰেণীৰ এজন শিক্ষাৰ্থীয়ে। ঘৰলৈ উভতি আহি পৰিয়ালৰ সদস্যসকলে ল’ৰাটোৰ ওলমি থকা মৃতদেহটো দেখি ততাতৈয়াকৈ চিকিৎসালয়লৈ লৈ যায়। কিন্তু চিকিৎসকে তেওঁক মৃত বুলি ঘোষণা কৰে।
এনেদৰে পুত্ৰৰ এই মৃত্যুক কোনোমতে মানি ল’ব পৰা নাই পৰিয়ালে। আৰক্ষীয়ে বিষয়টোৰ তদন্ত কৰি আছে।
লগতে পঢ়ক: আপোনাৰ নামৰ কাষত আছে ব্লু টিক! এইবাৰ টকা বিচাৰিব পাৰে টুইটাৰে
কৰ্ণাটকৰ চিত্ৰদুৰ্গাৰ বাসিন্দা ১২ বছৰীয়া সঞ্জয় গৌড়াই বিদ্যালয়ৰ নাটকত অংশগ্ৰহণ কৰিছিল। দেশপ্ৰেমমূলক নাটকখনত সপ্তম শ্ৰেণীৰ সঞ্জয়ে বিপ্লৱী ভগত সিঙৰ চৰিত্ৰত অভিনয় কৰিছিল। তাত এটা ফাঁচীৰ দৃশ্য আছিল। স্কুলত তেওঁ সকলোৰে সৈতে ৰিহাৰ্চেল কৰে। কিন্তু ঘৰলৈ উভতি অহাৰ পাছতো তেওঁ নাটকৰ অনুশীলনত ব্যস্ত আছিল। খালী ঘৰ এটা পোৱাৰ পিছত তেওঁ তাত নিজে আখৰা কৰিবলৈ আৰম্ভ কৰিলে।
ভগত সিঙৰ ওলমি থকা দৃশ্যটো অধিক বিশ্বাসযোগ্য কৰি তুলিবলৈ তেওঁ বাৰে বাৰে দৃশ্যটোৰ ৰিহাৰ্চেল কৰি আছিল। তেতিয়াই বিপদটো ঘটে। সঞ্জয় গৌড়াৰ ডিঙিত ফাঁচ লাগি মৃত্যু হয়। ঘৰলৈ উভতি আহি পৰিয়ালৰ সদস্যসকলে এনে দৃশ্য দেখি শোকত ভাগি পৰে। আৰক্ষীক খবৰ দিয়া হয়।
আৰক্ষীয়ে জানিবলৈ দিয়া মতে তেওঁ ঘৰৰ ফেনত ৰছী এডাল লৈ ফাঁচীৰ অনুশীলন কৰি আছিল। সুৰক্ষাৰ বাবে ভৰিৰ তলত এখন চকীও ৰাখিছিল। কিন্তু চম্ভালিব নোৱাৰাত সেইখন পৰি যায়। তেতিয়া সঞ্জয়ে ডিঙিত ৰছী লগা অৱস্থাত পৰিস্থিতিটো চম্ভালিব নোৱাৰিলে। শ্বাসৰুদ্ধ হৈ তেওঁৰ মৃত্যু ঘটে।
লগতে পঢ়ক: মহাৰাষ্ট্ৰত শোকাৱহ দুৰ্ঘটনা: দ্ৰুতবেগী গাড়ীয়ে মহতিয়াই নিলে তীৰ্থযাত্ৰীক, সাতগৰাকীৰ মৃত্যু
আৰক্ষীয়ে অপ্ৰাকৃতিক মৃত্যুৰ এটা গোচৰ ৰুজু কৰিছে আৰু তদন্ত কৰি আছে। মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হৈছে।
