লংকাত সপ্তম শ্ৰেণীৰ ছাত্ৰীক দলবদ্ধ ধর্ষণ : অভিযুক্ত ৪জন পাষণ্ডক গ্ৰেপ্তাৰ আৰক্ষীৰ

মানৱ সমাজক কলংকিত কৰি শুকুৰবাৰে পুনৰ এক জঘন্য ধৰ্ষণৰ ঘটনা সংঘটিত হৈছে হোজাইৰ লংকাত। লংকাৰ কাকী এজাৰবাৰীত সংঘটিত এই জঘন্য দলবদ্ধ বলাৎকাৰ কাণ্ডৰ বলি হৈছে এগৰাকী সপ্তম শ্ৰেণীৰ ছাত্ৰী।

ইপিনে, নিৰ্যাতিতাৰ পৰিয়ালে দাখিল কৰা এজাহাৰৰ ভিত্তিত কাকী আৰক্ষীয়ে ইতিমধ্যে ঘটনাৰ সৈতে জড়িত চাৰিজন অভিযুক্তক দেওবাৰে গ্ৰেপ্তাৰ কৰে। আৰক্ষীয়ে ঘটনাটো সন্দৰ্ভত ব্যাপক তদন্ত অব্যাহত ৰাখিছে।

নাবালিকাক ধৰ্ষণ কৰি আৰক্ষীৰ হাতত গ্ৰেপ্তাৰ হোৱা পাষণ্ড কেইজন হৈছে কানাই মজুমদাৰ, ৰূপণ ৰায়, ৰোহিত কিস্কু আৰু চুমিত মাৰ্ডী।

জানিব পৰা মতে, ধৰ্ষণকাৰীকেইজনে আৰক্ষীৰ আগত নাবালিকাগৰাকীক তেওঁলোকে ধৰ্ষণ কৰাৰ কথা স্বীকাৰ কৰিছে।

সভ্য সমাজক কলংকিত কৰা এই ঘটনাৰ সৈতে জড়িত অপৰাধীকেইজনক কঠোৰ শাস্তি বিহাৰ দাবী উত্থাপন কৰিছে স্থানীয় ৰাইজে।